JOSUA
Josua cha-iu ly Mosi i kalop amtym nai keung Josua my lu sa iy, Israela chengchi kanan pri y kun nai tarawi y tiu nai sai pany hai nai cha-iu ne. Hini cha-iu theung y pany ai hawi nai saichi ly: Jordan tavo angpeang nai, Jeriko mary y tiu nai, A-i mary y atiu nai, Tameuh hawi mymy i khumichi Leu Maikawm kangtha asa palai nai huni satangchi ne. Hini cha-iu theung y dawn patyp ai hawi nai harei ly nangchi ly chiu ai nai Tameuh ai vaini vawi takhra u, kai hawi kaimy i yhm dengtheungchi na baly Areng ai naini kachiu u ai,” (24:15) nanai ne.
1
Tameuh my Josua teng y Kanan pri tiu ai nai leu pei nai
1 Areng i miseaung Mosi dei nai bo y Areng my Mosi i bangtang Nun i chapo Josua teng y,
2 “Kai i miseaung Mosi ly dei bo. Nang hawi Israela cheng bawibawichi ly Jordan tavo angpeang u iy, kaimy kang pei ai nai pri theung y kun ai nai vaimy angvei u rym.
3 Mosi teng y kaimy adeu yb nai kamta, nangchi tiu ai nai khu ka-peang bawibawi ly nangchi teng y kaimy kang pei ai.Ref 1:3-5. Leu Thui 11:24-25
4 Nangchi i pri ly tokalawi mang daichi ka-vym dengdairei, tosyh mang Lebanon mawi tym pa-rei; nisi mang Euphrat tavo dengdairei, Hiti pri katlen iy nidym mang Mrethe pangli tym pa-rei kau ai.
5 Josua awi, nang heng nai ryrei ly ami py nang ai tiu pajau ai ny y. Kai ly Mosi hawi vanrei awm nai kamta, nang hawi py vanrei awm ai, nang ai mana khala py kangkhai su ai ny y. Nang hawi vanrei kang awm jojo ai.Ref 1:5: Leu Thui 31:6, 8; Heb 13:5
6 Nang ly atho sa iy vam parai naimy awm ba. Nang ly hini khumichi ai lu sa iy, nichi i amsi pajochi teng y kaimy pei ai adeu nai pri y kun iy tiu vui ai nai tla.
7 Atho sa iy vam parai naimy awm ba. Kai i miseaung Mosi my pei nai reita bawibawichi ai takhawi y naimy kry ba. Reita leu pei nai ngierei ai ati sai py takhawi y naimy kry baly, nang ly nangmy dawn nai kamta eaung ai.
8 Nang i chiu sa naira tleirei y Reita leu tajiu nai cha-iu avawrei phain ai nai tla. Huni cha-iu ai vum, kanithun phain amtiu iy, huni theung y abawi nai reitachi kry ai nai tla. Huna nai sa baly nang ly eaung naira nga ai.
9 Hunai deaungkho y kai i leu pei nai kamta vam parai naimy awm ba. Jei nai awm moh. Paleung phra moh. Nang i Areng Tameuh ly nang i chei naira tleirei y nang hawi vanrei awm nai ne,” nanai leu pei bo.
Josua my khumichi teng y leu pei nai
10 Naibaly Josua ly lu sa naichi ai palau i, Tai tleirei y awm nai khumichi teng y chei hai iy,
11 “Kani thomrei sala y nangchi i Areng Tameuh my ang pei ai nai pri y tiu vui ai nai Jordan tavo angpeang ai nai tla ai i, aly ngai nai cha-nei vawnsaichi angvei u rym,” nanai satang thai hai bo.
12 Naibaly Josua ly Ruben theaung, Kad theaung hawi Manase theaung ka-hyhreichi teng y,
13 “Jordan tavo nisi mang i khu ka-peang y nangchi awm ai nai, nangchi i Areng Tameuh my pei ai, nanai Areng i miseaung Mosi my leu pei nai pany u.
14 Nangchi i aju chanauchi, beram, si, mi-i napi nai tawnbawichi ai ly hini meingtym y daw jo iy, nichi theung i tavai ateaung syn pajau nai neampacho ka-cheang ngiereichi ly takhra Israela chengchi i mo mang tavo angpeang u kaliki ai nai tla.
15 Nangchi i Areng Tameuh my pei nai Jordan tavo nidym mang i pri tiu u pajau ai nai pa-rei, nichi ai sabawm ai nai tla. Israela chengchi tlamsa naimy awm u nai khala, nangchi ly Areng i miseaung Mosi my pei nai Jordan tavo nisi mang i pri y vawi u pajau ai,” napi.
16 Nichi my Josua teng y, “Kaichi ly nang i leu pei nai ngierei tangai iy, nang i pato nai meingtym y kachei u ai.
17 Mosi i leu tangai nai kamta, nang i leu py tangai ai. Areng Tameuh ly Mosi hawi vanrei awm nai kamta, nang hawi py vanrei awm hai sy.
18 Nang i peang nai akhi vui iy, leu pei nai ngai y nai khumi ly dei naira avum ai. Hunai deaungkho y atho sa iy vam parai naimy awm ba,” nanai pathang u bo.