44
Areng my Aikupta pri y awm nai Israela chengchi i vui leu pei nai
1 Areng ly Aikupta pri Mikadol mary, Tapaneh mary, Memphi mary hawi tokalawi mang y awm nai Israela cheng bawibawichi i molam y, kai ai leu pei nai ne.
2 Israela chengchi i Tameuh, ati cheaungkhang sa thai nai keung Areng my, “Jerusalem mary hawi takhra Juda marychi ai kaimy ka-jeira tym hai nai ly nangmychi kypkyp my niu chum bo. Huni marychi ly vaini khrairei phra seaungkhrang iy khumi angso savai tlang jo nai ne.
3 Huna nai kamta kaimy tym hai nai ly huni mary i khumichi my hawi y nairachi sa iy kai ai kado patheu u nai deaungkho y ne. Nichi ly tameuh takhrachi teng y apathyp u iy, mychi kypkyp my, nangchi hawi nangchi i amsi pajochi chiu vai y nai tameuhchi ai chiu u bo.
4 Kai ly kaimy i miseaung amochi ai, nangchi teng y avaw avawrei kang pato pi nai ne. Amochi my py nangchi ai, kai i niu ngai y nai amso ngai naichi so y ai nai ang thui pi.
5 Na i py nangchi ly leu tangai u y, tahm py khai u y; tameuh takhrachi teng y apathyp nai hawi y nai reita ai py patlaw u y.
6 Hunai deaungkho y kai ly Juda marychi hawi Jerusalem lamchi salo y, kai i kado theu naira kaleih iy, huni marychi ai mai kang hai ai. Huni marychi ly phra seaungkhrang naimy awm iy, vaini niu nai kamta khumichi i mei ka-niu y ka-jeira lawm bo.
7 “Hunai deaungkho y Israela chengchi i Tameuh, ati cheaungkhang sa thai nai keung kai, Areng my, nangchi ly ati mana nai y nangmychi i tlang tleaung y hina nai ka-jeira tym pa-rei, hawi y naichi sa u lawh mo? Nangchi ly nangchi i cheng myh ai nai neampacho, neampachy, deaungdichi hawi, kanu nei thym naichi ai tama hai ai nai ngai u lawh mo?
8 Nangchi awm u ai nai tym nai hini Aikupta pri y, nangchi ly mynchi molam y hawi, tameuh takhrachi ai chiu nai molam y py, ati mana nai kai ai kado patheu u lawh mo? Nangchi ly nangmychi kypkyp my ataphra iy, khaileaung pri i khumi cheng cheaungkhangchi my cheh naira hawi panui hai naira lawm u ai. Nangchi i amyn y tau iy vaineng abeu u ai.
9 Juda marychi hawi Jerusalem lamchi salo y nangchi i amsi pajochi, Juda samrangchi hawi ajuchi, nangchi hawi nangmychi i ajuchi my hawi y sa naichi ly tami u veng bo a?
10 Na i py nangchi ly vaini khrairei, paleung apanem u y asai rai; kai ai jei kaji u y. Nangchi hawi nangchi i amsi pajochi ai kaimy pei nai reitachi hawi, tanyn ai py teaung patawm u y.
11 “Hunai deaungkho y Israela chengchi i Tameuh, ati cheaungkhang sa thai nai keung kai, Areng ly nangchi i tlang tleaung y ka-jeira tym hai iy, Juda pri phra hai ai.
12 Juda pri y awm jo rai naimy, Aikupta pri y awm ai nai ka-dawn awm nai khumichi ly leaungrei py tleaung y naimy myh kang hai ai. Katheang kalen takhawi y naimy huni khumi bawibawichi ly tavai takai hawi tahum takangra y Aikupta pri y dei u ai. Nichi ly khumichi i mo y ka-jeira lawm ai. Khumichi ly nichi ai panui hai iy, nichi i amyn py, pasawi patau naira y teaung u ai.
13 Kai ly Jerusalem mary ai pajeng nai kamta, Aikupta pri y awm nai khumichi ai py, tavai takai, tahum takang, no kanghawichi hawi kapajeng ai.
14 Aikupta pri y awm ai nai Juda pri i dengdairei theu u nai khumichi theung i ami py, huni ka-jeira i nai tleaung u ai ny y. Dei y nai ami py awm ai ny y. Nangmychi awm ali teang ai nai athang khai naimy kadeaung nai Juda pri y, nichi leaungrei py vawi u ali teang ai ny y. Ngari kamtang avum nai khumi phyrei ny y baly, ami py vawi ali teang ai ny y,” napi.
15 Huna nai khala y mychi i ajuchi ly tameuh takhrachi teng y apathyp u, nanai pany nai khumichi, huni meingtym y angdo nai neampachychi hawi, Aikupta pri tokalawi mang y awm nai Israela chengchi raurei, khumi humchi ly kai teng y,
16 “Areng i amyn y nang i thui nai leuchi ly kaichi tangai ai nai ngai y.
17 Kaichi ly kaimychi vaichi khala kasa u reng naichi ai naini kasa u ai. Juda marychi hawi Jerusalem lamchira y, kaichi hawi kaimychi i amsi pajochi, kaichi i samrang hawi lu sa naichi my sa reng nai kamta, kani khusang samrangnu, napi nai kani anglo teng apathyp iy, ni i vui kreip hang katalamrachi leih pi ai. Huna nai thym khala kaichi ly kajeu kawi pa-rei cha ai nai nga; nang chawn naimy patang palai nai py by y nai ne.
18 Na i py kani khusang samrangnu ai apathyp nai, ni i vui kreip hang katalamra leih naichi ai anawn u nai dengdairei kaichi ly kra pa-rei avaw naimy, kaichi i chengchi ly tavai takai hawi tahum takang y dei u lawh bo,” nanai thui pi u nai ne.
19 Hunaibaly neampachychi my, “Kaichi ly kani khusang samrangnu i amyn ka-tawm takochi paawp iy, huni samrangnu teng y apathyp nai hawi, ni i vui kreip hang katalamrachi kaleih u nai khala, kaichi i juvochi my py, kaichi i sa nai ai hawi pany u i, ngai u bawibawi nai ne,” nanai thui u bi bo.
20 Huna nai khala y kai ly kaimy ai hina nai thui u nai neampacho neampachychi hawi, khumi bawibawichi teng y,
21 “Juda marychi hawi Jerusalem mary lamchira y nangchi hawi, nangchi i amsi pajochi, nangchi i samrangchi hawi lu sa naichi, mipuichi my talam nai kapathyprachi molam y Areng pany y, nanai py, tami veng bo, nanai py, nangchi athang khai u a?
22 Vai malawn py nangchi i pri ly phra seaungkhrang naimy, khumi angso savai tlang jo rai. Areng ly nangchi i hawi y naira sa naichi ai kham pi pajau y nai deaungkho y, huni pri ly khumichi i mo y amso ngai naira lawm nai ne. Khumichi my py huni pri i amyn ai pasawi patau naira y teaung u lawh bo.
23 Nangchi ly tameuh takhrachi teng y apathyp iy, leu pei naichi tangai y nai deaungkho y, Areng i tlang tleaung y kamngo sa nai ne i, vai ly hina nai kamta ngari kamtang avum u nai ne,” napi.
24-25 Kai ly Israela chengchi i Tameuh, ati cheaungkhang sa thai nai keung Areng my, Aikupta pri y awm u nai Juda khumichi molam y, “Nangchi hawi nangchi i ajuchi ly kani khusang samrangnu teng y vaineng adeu u bo; ni teng y apathyp ai, nanai py, ni i vui kreip hang katalamrachi talam ai, nanai py adeu iy adeu nai kamta sa u nai ne. Hawi mang! Nangchi i adeu nai khaw sy! Nangchi vaineng adeu nai kamta so u!
26 Na i py Aikupta pri y awm nai Israela chengchi teng y kai, Areng ly kaimy i nang parai nai amyn y adeu nai ly vai nangchi tangai u. Nangchi vaineng asa u naira y, ‘Areng ly heng nai ne!,’ nanai kai i amyn thui ai nai mo mang y mana khala py nangchi ai kang pei ai ny y.
27 Nangchi nang chawn ai nai tleaung y ly phra u ai nai kang sa ai. Aikupta pri y awm nai Juda khumichi ly leaungrei py tleaung y na pa-rei, tavai takai hawi, no kanghawi y dei u ai.
28 Na i py nangchi theung i maidenreichychi ly dei y naimy, Aikupta pri i dengdairei Juda pri y vawi u ai. Huna nai khala y Aikupta pri y tym u nai Juda khumi heng rai naichi ly mychi i leu hawi kai i leura y, ami i leu ly teng keh mo, nanai pany u ai.
29 Kai ly hini meingtym y nangchi ai kang pajeng ai, nanai py nangchi ai kang tamyh ai, nanai kai i leu teng khyp ai, nanai py nangchi teng y kai Areng my pany hai ai.
30 Kai ly Juda samrang Zedekiah ai, mymy ai padei ai nai ngai iy my i paleung ka-e Babulon samrang Nebukhadnezar teng y au nai kamta, Aikupta samrang Hophra ai py mymy ai padei ai ngai nai paleung ka-echi kiu y au teang ai,” nanai leu pei nai ly neampachychi teng y pany hai keh nai ne.Ref 44:30: 2 Areng 25:1-7