42
Khumichi ly mychi i vui chiu sa pi ai nai Jeremia teng y takeng nai
1 Naibaly Kareah i chapo Johanan hawi Heshaiah i chapo Azariahchi note 42:1\xk Azariah: Hebrai leu y “Jezania” nanai sai ne.\x*raurei, tavailu areng bawibawichi ly khumi amjy cheaungkhangchi hawi vanrei tym u iy,
2 kai teng y, “Kaichi i takeng nai so pi kyh ba! Kaichi i Areng Tameuh teng y kaichi i vui chiu so pi kyh. Heng jo rai nai kaichi bawibawi i vui chiu so pi. Vaichi khala ly kaichi py vuikanai nawi parai. Na i py vai ly nang i niu nai kamta, kaichi ly maidenrei chy khyh bo.
3 Kaichi ly ati lam tako iy ati kasa u ai nai avo mo, nanai lam patei pi ai nai, kaichi i Areng Tameuh teng y chiu so pi,” nanai takeng u nai ne.
4 Kaimy py, “Hawi mang; nangchi i takeng nai kamta achi i Areng Tameuh teng y chiu sa pi ai. Naibaly mymy i leu pei nai ngiereichi ai apha y naimy kang thui pi be ai,” napi.
5 Hunaibaly nichi ly kai teng y, “Kaichi ly nang i dengdairei Areng Tameuh my leu pei naichi kapatawm u y lawh baly, Areng ly kaichi mang y ka-ym awm iy teng nai pany hai nai ne sy.
6 Nang ai Areng Tameuh teng y chiu sa ai nai kang takeng u bo. Kaichi ngai i py ne sy, ngai y i py ne sy, nang i leu pei naichi kapatawm u ai mang. Mymy i leu tangai baly kaichi i vui cheaungkhangra y hawi ai,” nanai thui u bo.
Areng my Jeremia i takeng nai ai pathang pi nai
7 Kani horei nai khala y Areng ly kai teng y leu pei nai ne.
8 Hunai deaungkho y kai ly Johanan ni hawi vanrei awm nai tavailu arengchi hawi, khumi bawibawichi ai kapalau bo.
9 Kaimy nichi teng y, “Nangchi my kai ai pato iy ahui nai Israela chengchi i Areng Tameuh my,
10 ‘Nangchi ly hini pri y awm jo ai nai ngai u lawh teu baly, kai ly nangchi ai taphra y naimy palum ai. Kai ly nangchi ai akyn y naimy pati ai. Nangchi i tlang tleaung y kang tym hai nai ka-jeirachi molam y, kai ly khri pa-rei paleung mawn parai.
11 Babulon samrang ai jei u moh jau. Kai ly nangchi hawi vanrei awm bo i, nangchi ai ni i kiu i nai atleu ai.
12 Ati mana nai mo nabaly kai ly nangchi i tlang tleaung y pahen nai deaungkho y, ni my nangchi ai ang pahen ai i, nangmychi i pri y vawi hai ali teang ai. Hini ly kai, Areng i thui nai leu ne,” napi.
13 “Na i py Juda pri y awm rai naichi awi, nangchi ly nangmychi i Areng Tameuh i leu tangai u y naimy, hini pri y awm ai nai akhi ai nai tlo y. ‘Kaichi ly hini pri y awm ai nai ngai y;
14 Tavai ka-jeira avum bi y ai nai, tavai pasau ai nai baw katyn thai bi y ai nai, kajeu kanglam by y nai Aikupta pri y kaichi kachei u ai,’ nanai nangchi thui ai nai avo y.
15 Huna nai kamta nangchi thui u lawh baly, Israela chengchi i ati cheaungkhang sa thai nai Areng Tameuh my, ‘Nangchi ly Aikupta pri y chei iy awm u ai nai tau angchi khyp lawh teu baly,
16 nangchi jei u nai tavai ka-jeira ly nangchi ai hiu iy ang kai pa ai. Nangchi mawn u nai tahum takang py, nangchi nithun ang hui ai. Hunaibaly nangchi ly Aikupta pri y dei u ai.
17 Aikupta pri y chei iy awm u ai nai leu pacheang yb nai khumi ngiereichi ly tavai takai y mo, tahum takang y mo, ti y baly no kanghawi man iy mo, dei u takengkei ai. Nichi ly dei y naimy leaungrei py tleaung u ai ny y. Nichi ly kaimy tym hai ai nai ka-jeira i nai leaungrei py tleaung u ai ny y,’ napi.
18 “Israela chengchi i Areng Tameuh my, ‘Aikupta pri y nangchi chei u ai nabaly, kai ly kaimy i kado theu naira ai Jerusalem mary i khumichi i tlang tleaung y tym hai nai kamta, nangchi i tlang tleaung y py tym hai teang ai. Khumichi i mo y nangchi ly paso ai nai hawi parai i, nangchi ai panui hai naimy nangchi i amyn ly vaineng tau naira y teaung u ai. Nangchi ly hini meingtym ai, mo mang y mana khala py niu u ali teang ai ny y,’ nanai leu pei bo,” napi.
19 Hunaibaly kaimy thui pi bi nai ly “Juda pri y awm rai nai nangchi ai, Aikupta pri y chei y ai nai Areng my leu ang pei nai ne.
20 Nangchi ly khrikhri pa-rei tamang u bo, nanai vai, nangchi teng y pany hai bo. Nangchi ly ‘Kaichi i vui Areng Tameuh teng y chiu so pi kyh ba. Nang teng y leu pei nai ngiereichi py, kaichi teng y thui pi pateang ba. Kaichi ly mymy i leu pei nai kamta sa ai,’ nanai thui ai nai kai ai nangchi i Areng Tameuh teng y pato u bo.
21 Vai ly nangchi teng y kang thui pi chum veng bo. Na i py nangchi ly nangmychi i Areng Tameuh my kai ai pato iy, thui hai nai leu pei nai ngiereichi akhi u nai ne.
22 Hunai deaungkho y nangchi ly tavai takai y mo, tahum takang y mo, ti y baly no kanghawi y mo man iy, nangmychi chei iy awm ai nai pri y dei u ai,” nanai thui pi bo.