28
Jeremia hawi amo ananiah
1 Huni saneng napi nai, Zedekiah i samrang lyn nai palyh saneng, pa-ngo lo y Azura i chapo Kibeon mary y awm nai amo ananiah ly Achura yhm theung y awm nai pathyp pi nai keungchi hawi, khumichi i mo y Jeremia teng y,Ref 28:1: 2 Areng 24:18-20; 2 Neng 36:11-13
2 Israela chengchi i Tameuh, ati cheaungkhang sa thai nai keung Areng my, “Kai ly Babulon samrang i sa thai nai taphra vui bo.
3 Hini Achura yhm i, samrang Nebukhadnezar my Babulon mary mang y syn vui nai yhmtheaung katui ngiereichi ai, saneng nyhrei sala y hini meingtym y, katym hai ali teang ai.
4 Kai ly Jehojakim i chapo Juda samrang Jehojakhin ai py, Juda pri i dengdairei Babulon pri mang y abawi jo nai, langheng hawi nai khumichi hawi vanrei, kahawi ali teang ai. Ne, Babulon samrang i sa thai naira kataphra takengkei ai. Hini ly kai Areng i thui nai leu ne,” napi.
5 Huna nai khala y kai ly Achura yhm theung y angdo nai pathyp pi nai keungchi hawi, khumi bawibawichi i mo y ananiah teng y,
6 “Nang i thui nai kamta tym sy! Areng ly hina nai kamta sa ai nai py kai athang khai! Mymy ly nang i thui nai kamta tym hai takengkei ai nai py, Babulon mary y tawn vui nai Achura yhm i yhmtheaung katuichi hawi, langheng hawi vui nai khumi bawibawichi ai py, hawi ali teang ai, nanai kai ly athang kakhai khyp nai ne.
7 Na i py nang hawi vanrei khumi bawibawichi teng y, kai i thui nai leu ly tangai ba.
8 Nang hawi achi i deung ny y rai nai, jangni i amochi my thui nai ly khumi cheng cheaungkhangchi hawi sa thai naira len nai prichi py, tavai ka-jeira, takang theu nai hawi, no kanghawi avum u ai, nanai thui u rym nai ne.
9 Na i py tlamsa naira awm ai, nanai thui akan yb nai amochi ly ni i leu thui nai tym khyp khala naini, ni ly Areng my pato angchi khyp nai amo ne, nanai palawn pajau ai,” napi.
10 Huna nai khala y ananiah ly kai i kaneaungra i tamtleang leng vui iy khei piupa i,
11 khumi bawibawichi i mo y kai ai, “Khumi cheng cheaungkhangchi tlang tleaung y samrang Nebukhadnezar i patli nai tamtleang ai, hina nai kamta khei piupa vui ai. Hini ly saneng nyhrei sala y tym ai, nanai Areng my leu pei nai ne,” napi. Huna nai khala kai ly katako veng bo.
12 Neng kra y nai sala y Areng ly kai teng y,
13 ananiah teng y chei ly “Nang ly dengkeaung hawi sa nai tamtleang khei vui pajau teu i py, mymy ly tamo tamtleang hawi theng ali teang ai.
14 Israela chengchi i Tameuh, ati cheaungkhang sa thai nai keung Areng ly khumi cheng cheaungkhangchi tlang tleaung y tamo tamtleang ang tleang ai i, nichi ly Babulon samrang Nebukhadnezar i miseaung y awm u ai, nanai leu ang pei bo. Areng my daichi mawichi malawn py Nebukhadnezar i miseaung achei hai ai, nanai leu pei yb bo,” nanai thui hai nai ne.
15 Hunaibaly kai ly ananiah teng y, “ananiah awi, tangai ba! Areng ly nang ai ang pato nai ny y. Nang ly hini khumichi ai, nangmy ka-chawi leu ym ai nai sa nai ne i,
16 nang ai nawi su veng ai, nanai Areng my thui khyp veng bo. Nang ly Areng ai khumichi my tiu ai nai kachyh nai ne i, hini saneng dym y naimy dei ai,” napi.
17 Naibaly amo ananiah ly huni saneng saryh lo y my dei vui bo.