22
Jeremia my samrang yhm dengtheungchi ai leu pei nai
1-2 Areng ly kai ai Juda samrang yhm y pato iy, samrang Davida i areng atehra y ateh nai Juda samrang hawi vanrei my i bangtangchi, Jerusalem mary i khumichi teng y thui pi ai nai leu ang pei nai ly:
3 “Kai Areng ly nangchi ai leu meitang naimy kahawichi sa u ai nai leu kang pei. Nangchi ly katapawpra avum nai khumichi ai amo hai u. Cheng takhrachi, nuro nukaichochi, ti y baly neampachy lumaichi ai teng y nairachi hawi ana nairachi py so u moh. Hini kachai meingtymra y kamngo by y nai khumichi ai padei u moh.
4 Nangchi ly kai i reita leu pei nai kamta sa u khyp lawh baly, samrang Davida kangpreangchi ly samrang y lawm u jojo ai. Huni bo y nichi ly mychi i bangtangchi, khumichi hawi vanrei keaungngo ka-richi, keaungngochi atang iy, huni samrang yhm katheu pa-kho mang kun theu u aninau ai.
5 Na i py nangchi ly kai i leu tangai u y lawh ai nabaly, hini samrang yhm ly phra seaungkhrang ai, nanai nangchi teng y kang pasawi kheih bo. Hini ly kai, Areng i thui nai leu ne,” napi.Ref 22:5: Mt 23:38; Lk 13:35
6 “Kai i vui Juda samrang i yhm ly Kilead pri kamta py, Lebanon mawi saleung kamta apu i py, kai ly huni meingtym ai khumi angso savai tlang nai daichi ka-vym lawm hai ai.
7 Huni samrang yhm taphra ai nai khumichi kapato ai. Nichi ly atiuchi syn naimy apu parai nai saitleang yhmmawm puichi ai tameang pawn iy, mai theung y aphi u ai.
8 “Naibaly cheng takhra khumi neangneangchi ly huni sahawi mang tako prei naimy, hini mary pui ai ati mana nai y kai Areng ly hina naichi kasa lawh mo, nanai nichi adeng u leungtang ai.
9 Nangchi ly nangmychi i Tameuh, napi nai kai hawi asa nai Leu Maikawm ai khai su iy, tameuh takhrachi ai chiu u lawh nai deaungkho y, hina nai lawm nai py arum u leungtang ai.
Joahaz molam y Jeremia my leu pei nai
10 Juda khumichi awi, samrang Josia molam y meikatui tlo u moh;
ni i dei nai molam y py paleung si hai u moh.
Na i py ni i chapo Joahaz i vui y khri pa-rei, meikatui tlo hai u.
Paleung ka-echi ly nichi ai deung ka-kan hawi u jo ai.
Ni ly my i tapen nai meingtym ai, mana khala py niu ali bi ai ny y.
11 Juda samrang lawm iy ampo Josia i meingtym atheng nai chapo Joahaz i molam y Areng my, “Ni ly hini meingtymra i nai deung ka-kan theu veng bo.Ref 22:11: 2 Areng 23:31-34; 2 Neng 36:1-4
12 Ni ly paleung ka-e my hawi vui nai pri y my dei ai. Momang y mana khala py, hini pri niu ali bi ai ny y leang bo,” napi.
Jehojakim i molam y Jeremia my leu pei nai
13 Amy i yhm ai teng y nai leaungsai hawi sa nai py,
amy i salo sambeuchi ai teng y nai ka-dawn hawi sa iy,
amy i yhm deaungpachi ai jawm my sa hai nai khumi,
huni khumichi i kalop sa nai vang pei y nai khumi ly taham si nai ne.
14 Salo sambeura y takun puichi hawi
kai ly kaimy awm ai nai yhm pui harei kasa ai,
nanai thui nai khumi ly taham si.
Ni ly huna nai thui chum baly my i yhm y thaibeng pa-khochi tleh bo.
Saitleang keung hawi khangpuichi dang naira sa iy,
an kamsen pathym nai ne.
15 Khumi takhrachi i yhmchi tleaung y apu keh pa-rei,
saitleang keung hawi yhmchi sa pajau nai deaungkho y
nang ly hawi keh nai samrang lawm bo a?
Nang i ampo ly amo theu parai naimy awm iy
hawi naira hawi leu meitang teaung jojo nai ne.
Ni i sa nai ngiereichi ly eaung naira nga.
16 Ni ly khumi kamawnchi i ka-jo ka-thui padyh padawi pi nai deaungkho y,
atitichira py aly naira nga bo.
Hini ly Areng ai pany naira i hawi naira ne.
17 Na i py nang ly amy i vui dawn khyh nai paleung hawi,
amy hawi ai naira naini paleung apei khyh nai ne.
Kamngo by y nai khumichi ai padei iy, amy i chengchi ai khrikhri pa-rei ana,
nanai Areng my thui bo,” napi.
18 Hunai deaungkho y Josia i chapo Juda samrang Jehojakim i molam y Areng my thui nai lyRef 22:18: 2 Areng 23:36—24:6; 2 Neng 36:5-7
“Ni dei nai khala y ami py paleung si vo tangam u ai ny y.
‘Ka-jei hawi parai na, kai i ahawi awi, ka-jei hawi parai na!’ nanai ami py aawi u ai ny y.
Ni i vui y ami py vo hai ai ny y.
‘Aw kai i areng! kai i samrang,’ nanai aawi nai py awm ai ny y.
19 Keaungngo kano kasau kadei ai veu pavum nai kamta,
ni ai ryh iy, Jerusalem mary apai angam mang y
aphi u vui ai,” nanai ne.
Jerusalem mary i khym taham molam y Jeremia i leu pei nai
20 Jerusalem mary i khumichi awi, nangchi i amsawi amnaichi ly tavai sum u ai.
Hunai deaungkho y nangchi ly Lebanon mawi saleung y lyn u iy kahau u.
Bashan pri mang y chei iy aeu u.
Moba pri mawichi salo mang raawi pajeng parai naimy kaau u.
21 Nangchi nang chawn nai thym khala y, Areng ly nangchi ai pany hai pi bo.
Na i py nangchi ly tangai u y.
Nangchi ly deaungdichy khala i dengdairei, hina nai kamta sa u jojo.
Areng i leu ai mana khala py tangai ai nai ngai u y.
22 Nangchi ai lu sa nai keungchi ai ly ali y pakheang pawn ai.
Nangchi i amsawi amnaichi ly langheng y patiu nai avum u ai.
Nangchi i sa nai hawi y nai saichi molam y
nangchi i mary ly tahm anem iy kangji nga ai.
23 Nangchi ly Lebanon mawi i syn nai saitleang keungchi sala y chymme naimy awm u ai.
Na i py deaungdi tapen ai achai nai neampachy kamta,
no patang naira avum nai khala, nangchi ai ly khri pa-rei pahen ai nai hawi ai.
Jehojakhin ai Tameuh my tara chih nai
24 Areng ly Jehojakim i chapo Juda samrang Jehojakhin ai, “Nang ly kai i lamtang kiu y awm nai pajawp typ nai ka-ma-ra kiusabyh ne lawh teu i py, kai ly Tameuh kangheng ne nai y, kai ly nang ai kang pajiu vui ai.Ref 22:24: 2 Areng 24:8-15; 2 Neng 36:9-10
25 Nang ai padei ai ngai nai khumichi, nang i jei nai khumichi i kiu y kang au ai. Nang ai Babulon samrang Nebukhadnezar hawi, my i tavaimichi i kiu y kang au ai.
26 Kai ly nang hawi nang i amhm ai nangchi chun nai meingtym ny y nai pri y kang paryh vui ai. Nangni ly huni pri y dei hawi mei ai.
27 Nangmy ni i kadeaung nai pri y mana khala py, tym hawi ali teang ai ny y,” napi.
28 Jeremia my, “Samrang Jehojakhin ly ami py aly ngai y iy aphi su nai chy-y ka-kawi kamta lawm lawh bo a? Naibaly ni hawi ni i cho chanauchi ly mychi pany vai y nai pri y, pri pala vui nai bo a?
29 Aw pri, aw pri, aw pri!
Areng i leu pei nai tangai ba.
30 “Hini khumi ly cho chanau so y ai nai pajeng naira avum bo.
Ni ly mana khala py eaung naira ngo y nai khumi lawm ai.
Samrang Davida y amtym ai nai hawi
Juda pri y peang ai nai katu chanauchi ngo y ai.
Hini ly kai, Areng i thui nai leu ne,” napi.