18
Laawm beu nai keung i yhm y Jeremia tym nai
1 Areng my kai ai,
2 “Laawm beu nai keung i yhm y chei. Nang ai kaimy leu kang pei ai,” napi.
3 Hunai deaungkho y kai ly hu y chei i, laawm beu nai chau tami nai laawm beu nai keung ai niu bo.
4 Ni ly my i sa nai alai laawmra y tamo niu nai khala y, huni alai khaileaung ai la iy, takhra amjy harei mang y sa takhra vui nai ne.
5 Huna nai khala Areng my kai ai,
6 “Laawm beu nai keung ly khaileaung laikan ai sa nai kamta, kai py nangchi Israela chengchi ai so pajau y a? Aw Israela chengchi awi, khaileaung laikan ly laawm beu nai keung i kiu y awm nai kamta, nangchi chengchi py kai i kiu theung y awm u nai ne.
7 Kai ly mana khala py hina nai khumi chengchi hawi hina nai prichi ai akyn vui, kataphra vui, katamyh vui ai, nanai thui lawh teu i py,
8 huni khumi chengchi ly uikheih u lawh baly, kai ly paleung amtlau ai i, vaichi khala thui naichi kaso y naimy awm ai.
9 Na i py kai ly hina nai khumi cheng, ti y baly hini pri y kapalum kapachai ai, nanai thui lawh teu i py,
10 huni khumi chengchi ly kai i mo y kamngochi sa iy kai i leu tangai u y lawh ai nabaly, kai i paleung amtlau vui ai i, vaichi khala y thui nai, hawi nairachi kaso pi y naimy awm vui ai.
11 Huna nai y kai ly Juda khumichi hawi Jerusalem mary i khumichi ai, ka-awi sa ai tau nai hawi kapajeng ai sa rym naichi py thui pi. Khumi bawibawichi kamngo sa nai anawn u ai nai hawi, mychi i heng nai hawi amhi amtlau naichi takhra u ai nai Areng my leu pei nai thui pi ba.
12 Huna nai khala nichi my, “Kaichi ly amtlau vui pajau y leang; ati mana nai amtlau vui ai mo? Kaichi ly kaimychi ngai ngai paleung tang naimy, hawi y nai kasa u ai,” nanai thui u ai.
Areng ai Israela khumichi my khai su nai
13 Hunai baly Areng my,
Israela chengchi ly ka-jei hawi parai naichi sa u!
Jangni y hina naichi tym vai a?, nanai
khumi cheng cheaungkhangchi teng y deng u cham.
14 Lebanon lengseaung mawi saleungchi ly kadam tlo y nai neng awm reng a?
Huni mawi dengdairei tavo micheaung kasavaichi ly tui kang nai awm vai a?
15 Na i py kai i khumichi ly kai ai tami u bo.
Nichi ly ati sai py ny y nai mynchi vui y mui katuichi leng patlum u lawh.
Nichi ly mychi tako ai avo nai lam y athei iy, atlym u bo.
Lam kangngym tako u y. Nichi ly ka-ma-ra khai y nai
amny amcha y nai lam mang tako u nai ne.
16 Nichi ly hini pri y khumi angso savai tlang nai pri hawi,
amso ngai hawi jojo nai pri lawm hai bo.
Huni sahawi mang tako prei nai khumi bawibawichi ly
dawn tamang tyh iy mychi i lu heng u ai.
17 Kai ly kaimy i khumichi ai nisi ali my hm nai spryhchi kamta,
paleung ka-echi mo y ahei hai ai.
Kai ly nichi ai nithun kathun vui ai.
Kai ly nichi ka-jeira avum nai khala y, kasabawm pi ai ny y,” napi.
Jeremia ai padei ai nai dawn paviu nai
18 Huna nai khala khumichi my, “Jeremia ai paleang veng sina! Achi ai parip nai pathyp pi nai keungchi, tau pei nai khumi kachengchi hawi, Tameuh i leu thui pi nai amochi ang khai pi jojo nai ne. Jeremia ai achi my seu u sina. Ni i thui nai leu py tangai u moh sina,” nanai thui u bo.
19 Hunai deaungkho y Jeremia my, “Areng, kai i thui naichi tangai pi kyh ly paleung ka-echi my kai ai ang thui nai leu tangai ba.
20 Hawi naira ai hawi y naira my atleu pajau na a? Na i py nichi ly kai tla ai nai hum angawm tai u lawh. Kai ly nang teng y jeu iy nichi ai kado theu hai y ai nai, nichi i jeng y kang takeng nai ly pany pi jo kyh ba.
21 Na i py aw Areng, Nang ly nichi i cho chanauchi ai kajeu kanglam y dei hai ly nichi ai tavai keung y sum hai ba. Neampachychi ai mymychi i juvochi, cho chanauchi hawi amprei hai ba. Neampachochi ai dei hai iy thawndeang ka-cheangchi ai tavai keung y sum hai ba.
22 Nichi i yhm hlauchi ai lawm ai nai khrukhra hai nai khumi kanghuchi ai pato miu ba. Nichi ly jei hyn u naimy aeu u na sy. Nichi ly kai tla ai nai hum angawm tai u bo. Kai i vui deaung py pateung u bo.
23 Na i py aw Areng, kai ai padei ai nai dawn paviu nai khumichi ai, nang ly pany nai ne. Nichi i hawi y nai sai pahen pi moh ba. Nichi ai mychi i kamngochira i nai lawi tleaung hai moh kyh ba. Nichi ai sum hai iy kado theu nai thym khala, nichi ai pasum takengkei kyh ba,” nanai takeng bo.