16
Jeremia i heng nai molam y Areng i kangai
1 Huni bo y Areng ly kai teng y leu ang pei bi nai ne.
2 Areng my, “Hina nai meingtym y nang ly yhmtheaung so moh, cho chanau tapen moh.
3 Hini meingtym y tapen nai cho chanauchi hawi nichi i amhm ampochi teng y ati mana naichi tym ai mo, nanai nang ai kang thui pi ai.
4 Nichi ly jei ai hawi nai kanghawi avum iy dei u ai. Ami py nichi i vui vo tangam u ai ny y. Nichi i veuchi py up ai ny y. Huni veuchi ly khaileaung salo y si ei pakheng mang nai kamta awm ai. Nichi ly tavai keung y dei u ai; ti y i py tahum takangra y dei u iy nichi i veuchi ly tavochi hawi daichi mawi kasichi i teicha lawm ai.
5 Areng my, “Nang ly vo tangam nai yhm y kun moh. Ami i vui py paleung si hai moh, pahen moh. Vai ly nichi ai tlamsa naira kapei ai ny y. Tamen nai pahen nai py patei ai ny y.
6 Kamawn kanang patleh y naimy huni pri i khumichi ly dei u ai. Na i py ami py nichi i veu up ai ny y. Nichi i vui py vo tangam u ai ny y. Paleungsi nai ka-ma-ra amymy ai tamo kalem nga hai nai, sam avau nai py sa u ai ny y.
7 Nangmy tamen nai khumi leaungrei dei nai molam y paleung awmnem hai ai nai ami py sikeung hawi vanrei cha nei ai ny y. Amhm ampo dei nai khumichi malawn py, ami py pahen naira amteng pi ai ny y.
8 “Nang ly nichi cha nei pawi sa nai yhm y kun moh. Huni khumichi hawi vanrei ateh ahawi iy cho nei moh.
9 Israela chengchi i Tameuh, ati cheaungkhang sa thai nai keung kai Areng my leu pei nai tangai. Kai ly nichi i amo theu nai raawichi hawi apom pawira y amo theu nai raawichi ai ly hini meingtym y tama hai ai. Hini atitichi tym nai ly hini meingtym i khumichi niu u ai.Ref 16:9: Jer 7:34, 25:10; Amt 18:23
10 “Hini atitichi ai khumi mipuichi teng y nangmy thui pi nai khala y, nichi my, Areng ly ati mana nai kaichi ai hina tanrei pajeng ai nai leu pacheang lawh mo? Kaichi ly ati ka-jo ka-thui awm lawh mo? Kaichi i Areng Tameuh tlang tleaung y ati katamang u lawh mo?” nanai nang teng y ang deng u ai.
11 Naibaly nichi teng y Areng my, ‘Nangchi i amsi pajochi ly kai ai khai su iy tameuh takhrachi ai chiu u bo. Nichi ly kai ai khai su i, kai i leu py tangai u y bo.
12 Na i py nangchi ly nangmychi i amsi pajochi tleaung y malawn py, khri pa-rei hawi y nairachi sa u nai ne. Nangchi bawibawi ly paleung tang, hawi y iy kai i leu tangai u y.
13 Hunai deaungkho y kai ly nangchi ai, nangchi hawi nangchi i amsi pajochi tym vai y nai pri y paryh pawn ai. Huni pri y nangchi ly tameuh takhrachi ai, vum kanithun chiu u ai. Kai teng i tamen naira ly mana khala py, nangchi nga u ai ny y,’ nanai leu ang pei nai thui pi,” napi.
Pri palara i vawi u teang nai
14 Areng my, “Ami py kai teng y Israela khumichi ai Aikupta pri i dengdairei pahawi nai keung Tameuh kangheng ne, nanai vaineng abeu u y nai neng tym ai.
15 Huna nai vaineng abeu ai nai tleaung y khumichi ly kai teng y Israela khumichi ai tosyh pri mang i dengdairei py, nichi ai kaimy ahei hai nai pri takhrachira i dengdairei py, pahawi ali teang nai Tameuh kangheng ne, nanai vaineng abeu u ai. Kai ly nichi ai mychi i pri, mychi i amsi pajochi teng y kaimy pei nai pri y pahawi ali teang ai,” napi. Hini ly kai Areng i thui nai leu ne.
Pajeng naira tym ai nai
16 Areng my, “Kai ly hini khumichi ai patiu ai nai ngo sara neangneangchi pato ai. Mawi katheang kalen ngiereichi hawi lengseaungchi sala y, nichi ai hau ai nai mawi sara neangneangchi kapato ai.
17 Nichi i sa nai kalopchi ai kai niu; kai niu pajau y nai ati sai py by y. Nichi i kamngo sa naichi ly kai i mei ka-niu y aheu thai y.
18 Nichi ai mychi i kamngo hawi, hawi y nai saichi molam y phy nyhrei kapajeng ai. Ati mana nai mo nabaly khumi kadei kamta heng y nai mynchi saho y, kai i pri ai chai nem hai y bo. Mychi teng y kaimy pei nai pri y tameuh ka-chawichi hawimy kawi hai bo,” napi.
Areng ai ka-ym awm, nanai Jeremia i chiu sa nai
19 Aw Areng, nang ly kai ai kry iy atho pei bo. Patang naira avum nai khala sabawm bo. Khaileaung pri katemra i dengdairei khumi cheng cheaungkhangchi ly nang teng y jeu iy, “Kaichi i amsi pajochi chiu nai tameuhchi ly tameuh ka-chawi ne, atyhtyh teu. Hawi naira pei pajau y nai mynchi ne.
20 Khumi ly amymy chiu ai nai tameuh so thai na a? So thai y leang. Sa lawh teu i py hunichi ly tameuh tatang lawm ai ny y,” nanai Jeremia thui nai ne.
21 Areng my, “Huna nai tym lawh baly kai ly kaimy i phum-ang nang parai nai ai, nichi teng y kapei ai, pany hai bebe ai. Kai ly Areng ne, nanai nichi pany u ai,” napi.