14
Ka-jei awm nai niheang
1 Kani heng nai molam y Areng my kai teng y leu ang pei nai ly
2 “Juda pri ly vo tangam naimy awm;
Juda marychi ly paha naimy awm bo.
Huni mary i khumichi ly paleung mawn nai deaungkho y, khaileaung y jawn u na bo.
Jerusalem mary ly aeu iy kasabawmra hnei u bo.
3 Khumi kanangchi ly mychi i miseaungchi ai pato iy,
tui deu hai nai khala y,
nichi ly tuikan y tym u i py tui avum y.
Nichi ly tui kacheang ka-keu naimy ali u bo.
Nichi ly paleung phra athosi naimy
dawn tamang tyh na i, lu amym u nai ne.
4 Ati mana nai mo nabaly kani heng nai deaungkho y,
khaileaung ly jengha bo.
Li hlau sa naichi ly paleung hawi y nai y,
lu amym u bo.
5 Sisiu nu ly adym angdengra y
tapen ang vawi nai cho ai khai su bo.
Ati mana nai mo nabaly acha by y nai deaungkho y ne.
6 Keaungngo karamchi ly mawi saleungchira y angdo naimy,
khivachi kamta jeng taho u na bo.
Nichi ly teicha alam nai deaungkho y
mei phawnja na bo.
7 Kai i khumichi my kai teng y,
‘Kaichi ly kaimychi i kamngo my thui tamawn teu i py, aw Areng,
kaichi ai nangmy i amyn y sabawm kyh ba.
Kaichi ly nang ai avaw avawrei, nithun kathun u bo.
Nang i tlang tleaung y kamngo kasa u lawh bo,’ nanai aeu u.
8 Nang naini Israela chengchi i vui athang khai naira ne.
Kaichi ka-jeira avum nai khala y, atleu pi nai keung ne.
Ati mana nai y nang ly kaichi i pri angvyn kamta,
dymreichy jei khyh nai khuleaung angvyn amlawn lawh mo?
9 Ati mana nai y nang ly mynkym vui nai kamta py,
sabawm ai nai sa thai naira by y nai tavaimi risa kamta py, lawm lawh mo?
Aw Areng, nang ly kaichi hawi vanrei awm khyp na a!
Kaichi ly nang i khumichi ne i,
khai su moh kyh ba,’ nanai takeng u bo”
10 Areng ly nichi i molam y, “Nichi ly kai teng i nai preang ai nai ngai u; mychi i kheu kan pakym ai nai ngai u y. Hunai deaungkho y kai ly nichi ai kawn y. Nichi i sa tamang naichi kapany pi jo iy, nichi ai kapajeng ai,” napi.
11 Areng my kai teng y, “Nang ly nichi ai sabawm ai nai kai teng y hnei moh.
12 Nichi ly biu hai naimy kasabawmra hnei takeng teu i malawn py, kai ly khumichi i aeu nai raawi katangai pi ai ny y. Nichi ly kai teng y leng patlum nai kapathypra hawi katalamrachi talam i py, kai ly kawn pi ai ny y. Huna nai kakawn pi ai nai tleaung y ly tavai keung y dei hai ai. Takang theu hai iy no kanghawi y dei hai asi,” napi.
13 Huna nai khala y kaimy, “Aw Areng, hini pri y tavai takai hawi takang theu nai ka-jeira tym ai ny y; tlamsa naira naini awm ai, nanai amochi my thui nai ly nangmy pany nai ne,” napi.
14 Na i py Areng my, “Amochi ly kai i amyn y ka-chawi thui u nai ne. Kai ly nichi ai kapato y leang. Nichi teng y ati sai py kataviu y. Ati sai py amteng hai y. Nichi i thui pi nai paleung mei hawi niu naichi ly kaimy amteng hai naichi ny y. Nichi i thui yb nai leuchi ly ati sai py ny y i, mychi phym atyhtyh nai teu.
15 Kaimy pato nai ny y pawi naimy kai i amyn angam iy, hini pri y tavai takai hawi tahum takang ka-jeira tym ai ny y, nanai thui u nai amochi ai, kai mana kasa ai mo, nanai nang teng y kai Areng my thui pi ai. Kai ly nichi ai tavai keung hawi tahum takang y dei hai ai.
16 Nichi i thui nai leu tangai u naichi py, nichi kamta dei u teang ai. Tahum takang hawi tavai takai deaungkho y, nichi i veuchi ly Jerusalem mary i lamchira y khai su ai. Hunichi ai amichi my py up ai ny y. Aju chanau raurei, nichi bawibawi py hunai kamta lawm u ai. Mychi i hawi y nai lai y, mychi ai kapajeng ai,” napi.
17 Kai i paleung mawn nai sai khumichi teng y , hina nai thui pi ai nai Areng my leu pei nai ne.
“Kai i meichi ly vum kani avaw y naimy, meikatui tlo na sy.
Kai i chengchi ly khri pa-rei tamo kalem nga iy,
khri pa-rei no patang nai deaungkho y,
mana khala py vo nai anawn y naimy awm sy.
18 Adym angdeang mang y kachei nai khala y,
tavai keung y dei nai khumi tlaiveuchi kaniu nai ne.
Mary theung y kun nai khala y,
kajeu kanglam y dei nai kaniu bo.
Amochi hawi pathyp pi nai keungchi ly
mymychi ati sa mo, nanai tamang tyh naimy mychi ngaingai sa u bo.”note 14:18 Amochi... sa u; ti y baly amochi hawi pathyp pi nai keungchi ai, mychi pany vai y nai pri mang y hawi pawn bo.
Areng teng y khumichi my ahui nai
19 Aw Areng, nang ly Juda pri ai khai su angchi khyp nai bo a?
Kaichi i no-na hawi sa ai nai ngo y na pa-rei
nang ly ati mana nai y kaichi ai
khri pa-rei tamo kalem nga hai lawh mo?
Kaichi ly amo theu naira kadeaung u teu i py, atyhtyh teu bo.
No-na hawi ai nai athang khai u teu i py, jei hynra naini avum u nai ne.
20 Aw Areng, kaichi ly kaimychi i kamngo hawi,
amsi pajochi i kamngochi molam y ahui bo mang.
Kaichi ly nang i tlang tleaung y katamang u lawh bo.
21 Nang i leu adeu naichi pany pi jo kyh ly khensi-me moh kyh ba.
Nang i nang parai nai sai apu nai
areng atehra, napi nai Jerusalem mary ai tahm panem moh kyh ba.
Nang ly kaichi hawi asa nai Leu Maikawm ai taphra moh kyh ba.
22 Khumi cheng cheaungkhangchi my chiu nai mynchi ly kani nai hai thai y leang.
Kani tui ly mymy ngai ngai kani amaichi tlo hai thai y leang.
Nang naini hini atitichi ai sa thai khyh nai deaungkho y,
Kaichi i Areng Tameuh, kaichi ly nang ai athang khai u nai ne.