7
Isu hawi mymy i amnauchi
1 Hunai pajau khala y Isu ly Kalili pri y khuleaung chei; Judachi my ni ai padei ai nai hau nai deaungkho y Judai pri y khuleaung chei ai nai ngai y bo.
2 Naibaly Judachi i Tai Chy pawi ly kasa bo.Ref 7.2: Lev 23.34; Leu 16.13
3 Hunaibaly ni i amjo amnauchi my ni teng y, “Nang teng y abangnaichi ly nang i atiti sa naichi niu thai ai nai hi i dengdairei theu ly, Judai pri y chei ba.
4 Ami py amy i satang amthang ai ngai nai khumi ly kangviu y ati sai py so y leang. Hini atitichi ly nang sa tatang baly,khaileaung prichi teng y nangmy ai amteng hai,” napi.
5 Mymy i amjo amnauchi raurei py ni ai ym y.
6 Naibaly Isu my nichi teng y, “Kai i neng tym y leang rai; nangchi naini mana khala y py ngaingai sa pajau.
7 Khaileaung prichi my nangchi ai ly niu ngai y ai nai awm thai y leang mang; kai naini nichi i atiti sa naichi ly hawi y, nanai thui pi pachai reng nai deaungkho y nichi ly kai ai niu ngai y.
8 Nangchi ly pawira y chei u kalau; kai i neng angym y rai nai deaungkho y hini pawi y kachei kalau y leang rai,” napi.
9 Naibaly mymy ly huni leu nichi teng y thui iy, Kalili pri y awm jo rai.
Isu ly Taichy pawi sa naira y chei nai
10 Na i py mymy i amjo amnauchi ly pawi y chei kalau nai bo y ly, ni py ami pany y naimy kangviu kamta chei kalau teang.
11 Naibaly Judachi ly pawira y ni ai hau i, “Mymy ly ma mang y awm mo?” napi.
12 Naibaly khumi mipuichi ly mymy i satang apreaung u lengleang i phyreichi my ly, “Khumi kahawi na a,” napi; phyreichi my ly, “Ma ne ai mo?
13 Khumi mipuichi ai tapawp nai teu,” napi. Na i py Judaichi ai jei nai deaungkho y ami py ni i satang ka-thai ra y thui vam y.
14 Naibaly pawi sa nai khala y Isu my achura yhm kalen pui y chei iy leu patiu.
15 Naibaly Judachi ly, “Hini khumi ly cha amtiu vai y naimy mana pany lawh?” napi i lyh parai.
16 Naibaly Isu my nichi teng y, “Kai i leu patiu nai ly kai i ny y leang, kai ai pato nai keung i teu.
17 Ami py mymy i kangai sa ai nai ngai nai khumi ly leu patiu nai ly Tameuh i patheu nai mo, kaimy i paseang iy thui nai mo, nanai pany ai.
18 Ami py amy i leu paseang iy thui nai ly amy ai apalo naira hau nai teu; pato nai keung ai palo naira hau nai ly huni khumi kypkyp ly meitang ne, mymy teng y ly hawi y naira den py by y.
19 Mosi ly nangchi teng y Reita ang pei y a? Na i py nangchi theung y ami py Reita patawm y leang. Nangchi ly ati mana nai y kai ai padei ai nai hau u lawh mo?” nanai pathang.
20 Naibaly khumi mipuichi my ly, “Nang ai vawinam my nam nai teu:nang ai ami my padei ai nai hau mo?” nanai pathang.
21 Isu my nichi teng y, “Kai i sairei sa naira y ly nangchi bawibawi rengrang tlai napi.
22 Hina nai y na a, Mosi my lengkhym takip ai nai leu ang pei, ne mang ly huni ly Mosi i leu pei nai ny y i, amsichi i leu pei nai teu; naibaly Anawn Kani y py nangchi ly neampacho ai lengkhym takip u reng.Ref 7.22: AA 17.10; Lev 12.3
23 Mosi i Reita taphra y ai nai Anawn Kani y py neampacho ai lengkhym takip u makho baly, Anawn Kani y kai ly neampacho ai angym pa-rei no hawihai veng nai deaungkho y kado theu u a?Ref 7.23: Jh 5.9
24 Salo y khen phriu naimy chih moh, na i py hawihai palai dawn iy chih u,” nanai pathang.
Hini khumi ly Messia a?
25 Naibaly Jerusalem avang i khumi phyreichi ly, “Hini khumi ai ly padei ai hau u nai ny y a?
26 Khen cham, mymy ly mo y thui be i nichi ly sai py tlau y. Mymy ly Krista ne, nanai miteaung kehchi my pany tatang nai sai a?
27 Na i py hini khumi ly ma mang i theu nai mo, nanai achi my pany be; na i py Krista ly ang tym khala y ma mang i theu nai mo, nanai ami py pany ai ny y,” napi.
28 Hunai deaungkho y Isu ly achura yhm kalen pui y leu patiu nai tarawi y aeu i, “Nangchi ly kai ai pany, kai ly ma mang i theu nai mo, nanai py nangchi pany mang. Kai ly amy ngaingai kang jeu nai ny y leang, kai ai pato nai keung ly meitang khypkhyp ne, ni ai ly nangchi my pany y.
29 Kai naini ni teng i dengdairei kang theu nai deaungkho y ni ai kapany: ni my kai ai pato bo,” napi.
30 Hunaibaly nichi ly mymy ai patiu ai nai hau u, na i py mymy i neng tym y rai nai deaungkho y ami py ni ai nam y.
31 Na i py khumi mipuichi theung i nai khumi neangneangchi ly mymy ai ym i, “Krista ly ang tym nai khala y hini khumi i sa nai tleaung y rengrang nawi keh so na a?” napi.
Isu ai patiu ai nai tamcheaungchi pato nai
32 Naibaly Pharisaichi ly ni i molam y khumi mipuichi i preaung nai leu thai u i, pathyp pi nai keung kalenchi hawi Pharisaichi ly ni ai patiu ai nai miseaung luchi ai pato.
33 Naibaly Isu my, “Tanarei chy sala y nangchi teng y kang awm ai i, kai ai pato nai keung teng y kachei vui ai.
34 Nangchi ly kai ai hau ai i niu ai ny y; kai i awmra y py nangchi jeu thai ai ny y,” napi.
35 Hunaibaly Judachi ly adeng u i, “Achi ly mymy ai niu y ai nai hini khumi ly ma mang y chei ai mo? Krikchi theung i Ahei Naichi teng y chei iy Krikchi ai py leu patiu ai nai sai a?
36 ‘Nangchi ly kai ai hau ai i niu ai ny y:kai i awm naira y py nangchi jeu thai ai ny y,’ nanai ly ati mana nai sai mo?” napi.
Hengra tavo micheaung
37 Naibaly pawi lui nai kani aly len keh nai khala y Isu ly angdo i, “Ami py tui ahai baly kai teng y jeu iy nei sy.
38 Ami py kai ai ym baly Tameuh i cha-iu y tajiu nai kamta tui kangheng tavochi ly ni i taku theung i leaung ai,” nanai aeu.Ref 7.38: Ezek 47.1; Zek 14.8
39 Huni leu ly mymy ai ym naichi i nga ai nai Phailo i satang thui nai ne: Isu ai palo y rai nai deaungkho y Phailo pei y rai.
Khumichi paleung aleang nai
40 Hunaibaly khumi mipui theung i nai phyreichi ly huni leu thai iy, “Hini ly amo ne khyp nai bo he,” napi.
41 Phyreichi my ly, “Hini ly Krista ne na a,” napi. Phyreichi my ly, “Ma! Krista nai Kalili pri y theu rengrang ai mo?
42 Krista ly Davida i kangpreangchi theung i nai, Davida i awm naira avang Bethlehem i nai theu ai nai tla, nanai Tameuh i cha-iu y tajiu nai ny y a?” napi.Ref 7.42: 2 Sam 7.12; Mik 5.2
43 Hunaibaly mymy deaungkho y khumi mipuichi ly amprei iy atakai u bo.
44 Phyreichi my ly ni ai patiu ai nai ngai, na i py ami py ni ai nam y.
Juda miteaung kehchi ym y nai
45 Naibaly miseaung luchi ly pathyp pi nai keung kalenchi hawi Pharisaichi teng y jeu bi i, nichi ly mymychi teng y, “Ati mana nai pahawi u y lawh?” napi.
46 Miseaung luchi my ly, “Hunai kamta khumi ami py tlen py leu thui vai y leang,” nanai pathang.
47 Naibaly Pharisaichi ly mymychi teng y, “Nangchi ai py ang tapawp u teang lawh kha?
48 Miteaung kehchi hawi Pharisaichi theung i nai ami py mymy ai ym bo a?
49 Na i py hini Reita pany y nai khumi mipuichi ly amsawi lawi nai na a,” nanai pathang.
50 Naibaly jangvaini y vum y Isu teng y chei nai Nikodema ly nichi theung y abawi teang i mymychi teng y,Ref 7.50: Jh 3.1–2
51 “Ami i labeaung kypkyp y leu thai iy, ni i atiti sa naichi pany y rai kha y, achi i Reita ly khumi ai chih vai a?” napi.
52 Nichi my ly ni teng y, “Nang py Kalili pri i khumi teang lawh kha? Hau cham. Kalili pri i nai amo ami py theu y leang, nanai pany be,” nanai pathang.
53 Naibaly nichi leaung leaungrei ly amy i yhm y vawi akyh kyh bebe.