3
Palai satang
1 Kai i amjo amnauchi awi, patiu nai keung neangneang y awm u moh, achi ai tara chih nai sai aneng kyh ai, na na inangchi pany.
2 Atiti neangneangra y achi bawibawi tamang reng. Ami py leu thui naira y tamang y baly huni khumi ly khumi ka-cheang, mymy i tlang py bomrei amkym pajau nai khumi ne.
3 Khen cham, achi i leu tangai thai ai nai keungngochi i labeaung y tamo pakau baly, mymychi i ngan bomrei py achi my tami pajau.
4 Khen cham, samphochi ly khri pa-rei len iy, ali ho parai naimy hunichi ai hm i py, kalawi pataw nai keung my ly mymy chei hai ai nai ngai naira tleirei y kalawi pataw naira theangchi chy nai hawi pahi.
5 Hunai kamta teang palai ly tlang i kangprei theangchi chy teu, naibaly khri pa-rei am-e veng. Khen cham, mai maiden chy naimy thengreung ai khri pa-rei kang hai nai ly.
6 Naibaly palai ly mai ne; achi i tlang kangpreichi theung y hawi y reng naira ly palai ne:huni ly tlang bomrei chai hai y i, khaileaung pri ai kang hai, naibaly ngari angawm ly palai ai kang hai teang.
7 Mawichi, tavochi, avah naichi, pangli theung y awm naichi ly, hunichi cheaungkhang ai ly khumichi my khawn thai, khawn py khawn reng bo.
8 Na i py palai ai ly ami ami py khawn thai vai y, dei nai asi my kawi iy, awm pypy thai y nai pa-rei kamngo sa nai keung ne.
9 Achi ly huni hawi Areng, Ngaai ai ly palo, huni hawi teang Tameuh ka-tawm sa nai khumi ai ly pasawi teang bi: labeaung harei naira i nai palo nai hawi amsawi py theu lawh bi.Ref 3.9: AA 1.26
10 Kai i amjo amnauchi awi, huna nai ly avo y leang.
11 Tuino harei i nai tui katui hawi tui kakho hawi theu reng a?
12 Kai i amjo amnauchi awi, thaidu keung y olive athai athai thai a? ti y baly kreip angjyn y thaidu athai athai thai a? Hunai kamta teang tui lum nai ly tui katui patheu pajau y.
Salo mang i cheng naira
13 Nangchi theung y khumi kacheng hawi leu pany thai nai khumi ly ami mo? Mymy i amhi amtlau nai sai kahawi deaungkho y leu anui parai nai hawi cheng parai naimy mymy i atiti sa nairachi amteng hai sy.
14 Naibaly nangchi paleung y paleung ano naira khota nai hawi aei naira awm baly, leu meitang ai am-e hai u lawh moh, paka ai nai py ka-chawi thui u moh.
15 Hini cheng naira ly salo mang i dengdairei ang kathiu nai ny y leang, khaileaung pri i hawi, tlang i ngai naira i hawi, vawinam teng i theu nai teu.
16 Paleung ano naira hawi, aei nai awm naira y ly khrukhra naira hawi atiti kamngo cheaungkhang awm reng.
17 Na i py salo mang i dengdairei cheng naira theu nai ly angchei y chai vui rai, hunai bo y ly aly ai nai ngai i neaung py hawi parai, ado ai nai py ngai, pahen naira hawi athai kahawi my kawi, naibaly patle takhra y i tapawp nai py by y.
18 Hawi naira athai ly aly naira sa nai keungchi i vui aly naira tiu nai ne.