3
Jona ly Areng i leu pei nai tangai nai
1 Naibaly Areng my Jona teng y,
2 “Angthau ly Ninevi mary pui mang y chei; kai i leu pei nai kamta mary i khumichi teng y pany hai,” nanai tlen pa-nyh leu pei bi nai ne.
3 Hunai deaungkho y Jona ly Areng i leu pei nai tangai iy, Ninevi mary y chei bo. Ninevi mary ly khri pa-rei len i, mary kakau tako prei baly kani thomrei ateng nai ne.
4 Jona ly Ninevi mary theung y kun iy kanirei lam tako i, “Kani vui palyhrei kani y Ninevi mary ly phra ai!” nanai aeu bo. Ref 3:4-5 Mt 12:41; Lk 11:32
5 Ninevi mary i khumichi ly Tameuh i leu pei nai ym u bo. Hunai deaungkho y uikheih nai ka-ma-ra hawi, kamawn, areng takhawi y naimy biu hai iy paisiu amchiu u ai nai leu pacheang u.
6 Huni satang ai Ninevi samrang my thai nai khala y, samrang atehra i nai ang thau i, samrang ateaung aleng vui iy paisiu amchiu bo. Naibaly maidym theung y ateh nai ne.
7 Naibaly Ninevi samrang ly mary i khumichi teng y satang thai hai ai nai leu pei. Ni i leu pei nai ly “Hini leu ly samrang hawi bangtangchi i leu pei nai ne. Amimi py teicha teinei cho moh sy. Khumi bawibawichi hawi sichi py, beramchi py, teicha cho moh sy, tui py nei moh sy.
8 Khumi bawibawichi hawi tawnbawichi ly paisiu amchiu u ai nai tla. Khumi luteng ly paleung apei parai naimy Tameuh teng y chiu sa ai nai tla. Huni bo y amy i hawi y nai hawi, sa ta-li naichi khai su ai nai tla.
9 Huna khala naini Tameuh ly paleung amtlau tan amtlau lym ai. Kado theu nai py rym tan rym lym ai. Achi py tlang hengra nga pajau ai!” napi.
10 Tameuh ly huni khumichi i sa nai saichi ai py, hawi y nai saichi khai su nai ai py, niu nai khala y paleung amtlau i, leu pei nai kamta nichi ai pajeng y nai ne.