5
Deborah hawi Barak nini i khulym
1 Huni kani y Deborah hawi Abinoam i chapo Barak ly hina nai khulym thui hawi nai ne.
2 Areng ai palo u!
Israela chengchi ly tavai atiu ai nai leu pacheang yb bo.
Khumi mipuichi py paleung apei parai i, amo theu naimy abawi u.
3 Samrangchi awi, tangai u!
Pri peang nai keungchi awi, adawn u patyp!
Israela chengchi i Areng Tameuh i nang parai nai sai palo ai nai
kai ly khulym thui naimy taro beu ai.
4 Aw Areng, Sira mawi salo y nang jeu iy,
Edom pri i dengdairei tavai thau nai khala,
khaileaung amchyh na i, kani mang my kani nai hai.
Khupanymchi dengdairei kanitui tla bo.
5 Mawichi ly Sinai mawi i ArengRef 5.5: Theu nai 19.18
Israela chengchi i Areng Tameuh i mo y ahyn na bo.
6 Anath i chapo Shamka deung y py,
Jaela deung y py,
khuleaung chei naichi ly huni pri mang tako u y leang bo.
Khuleaung chei naichi ly lam takitavaichi mang naini tako u nai ne.
7 Israela pri i marychi ly avang jimeung lawm veng bo;
Kai Deborah ly Israela chengchi i amhm kamta lawm y rai khala,
huni marychi ly avang jimeung lawm yb veng bo.
8 Huni bo y Israela chengchi ly tameuh takhrachi ai
vawi u takhra nai khala, huni pri y tavai tiu u bo.
Israela pri y khumi meaung kateaung palyhrei awm nai theung y
khupui harei, ti y baly tivi harei syn nai khumi awm a?
9 Kai ly Israela tavai luchi teng y py,
paleung apei naimy tavai theung y kun u nai khumi mipuichi teng y py, paleung bie nai ne.
Hunaibaly Areng ai palo u!
10 Atangra salo y ateh iy, keaungngo kano kasau kangleung atang u nai khumichi awi,
chei nai tleirei y kheu mang tako nai khumichi awi,
hini satang adawn pasym u.
11 Tangai u! tuikanchi sahawi y tukulula nai khumi mipuichi ly
Areng i eaung nai pawi satang py,
Israela chengchi i eaung nai pawichi satang py, thui u nai ne.
Huna nai khala Areng i khumichi ly mymychi i marychi dengdairei amsa u bo.
12 Mo mang y amtheung, Deborah awi, momang y amtheung ba!
Mo mang y amtheung! khulym thui ly! Momang y amtheung!
Abinoam i chapo Barak awi, mo mang y lyn;
nang i langheng hawi naichi ai hawi ba!
13 Naibaly ka-ym awm nai khumichi ly mymychi i luchi teng y jeu u bo;
Areng i khumichi ly tavai tiu ai nai angveirym naimy, ni teng y jeu u bo.
14 Nichi ly Benjamin cheng theaungchi nithun abang iy,
Ephraim khu ka-peang dengdairei, leaunghawi theung mang y satla u.
Tavai lu arengchi ly Makhira cheng theaung theung i nai py,
tavai luchi ly Zebulon cheng theaung theung i nai py, theu u bo.
15 Iskara cheng theaungchi i lu sa naichi ly Deborah hawi vanrei abang u;
Iskara cheng theaungchi ly Barak hawi vanrei abang u;
nichi ly Barak hawi vanrei abang iy, leaunghawi theung mang y satla u bo.
Na i py Ruben cheng theaungchi ly adyh adawi y nai deaungkho y,
abang ai nai thui khyp pajau y.
16 Nichi ly ati mana nai y beramchi hawi vanrei, awm u jo lawh mo?
Beram kanghuchi ly beram typ nai keungchi my, palau nai raawi tangai ai ngai u nai y a?
Ruben cheng theaungchi adyh adawi y nai ly ne.
Nichi ly mychi i paleung theung y thui khyp pajau y.
17 Kad cheng theaungchi ly Jordan tavo nisi mang y awm u jo;
Dan cheng theaungchi py, samphochi sahawi y awm u jo.
Aser cheng theaungchi ly
pangli peang sahawi y awm u jo nai ne.
18 Na i py Zebulon khu hawi Naphtali khu i khumichi ly
tavai keung y mymychi i tlang areu naimy atho sa u bo.
19 Mekido micheaung sahawi i Taanach mary ra y,
samrangchi ly jeu iy atiu u;
Kanan samrangchi ly tavai atiu u i py,
tangka lawm ai nai ly ngo u y.
20 Ka-si taukichi ly kani mang y atiu u;
nichi ly kani khusang mang y amki prei nai thym khala,
Sisera ai tavai tiu u bo.
21 Tui ho parai nai kishon tavo ly lem na i,
paleung ka-echi ai amjau hai pawn bo.
Kai ly tavai thau ai, atho haiho hawi mo mang y lyn ai.
22 Huna nai khala keaungngochi ly atho sa nai ataleh iy,
kheu muikenchi hawi khaileaung kalai piu na.
23 Areng i kani pri amtaw thau my, “Meroza mary ai pasawi u;
huni mary i khumichi ai pasawi u.
Nichi ly Areng mang y asa ai nai jeu u y;
mymy i vui atiu ai nai tavaimichi jeu u y,” nanai thui.
24 Keneti cheng Heba i aju Jaela ly
kanih yhm y awm nai neampachychi theung y
taham hawi keh.
25 Sisera ly tui nei ai nai hnei i py, Jaela my sikanu pei pi;
apu parai nai khau hawi sikanu pei pi nai ne.
26 Ni ly kanih yhm thang nai thengbeang kamsui harei ai,
kiu Makengrei mang la iy, Makengrei mang ly kalop sa hai nai
saki harei syn iy, Sisera i lu y tahen bo;
thengbeang kamsui ly Sisera i lu prida vui nai ne.
27 Sisera ly atlym i,
Jaela i kheu keung y angto y na.
Ni ly khaileaung y atlym i,
Jaela i kheu keung y dei bo.
28 Sisera i amhm ly thaibeng pa-kho mang angdeang;
ni ly amhi mawi angpang nithun mang khen ryry.
“Ni i ka-ri ly ati mana nai y patyh lawh mo?”
“Ni i keaungngochi ly ati mana nai vawi patyh lawh mo?” nanai tangam naimy thui bo.
29 Ni i khumi kacheng,
samrang yhm i khumichi my,
30 “Nichi ly patiu iy phy amji ai nai vawnsaichi hau u ai;
tavaimi leaung leaungrei i vui, anglo leaungrei leaung nyhrei ai py,
Sisera i vui vang kateng ateaung hawi, samrangnu i vui kaneaung awi ai nai pau thun nai ateaungchi py,
hau nai deaungkho y ne lym ai,” nanai pathang u i, mymy py adawn pasym veangveang nai ne.
31 Aw Areng, nang i paleung ka-e bawibawichi ly hina nai kamta sum u sy;
na i py nang i ahawichi ly achaw deaung nai kani si nai kamta, angvang phang sy!
Naibaly Kanan pri y saneng vui palyh ryrei tlamsa nai ne.