18
Mikha hawi Dan cheng theaungchi
1 Huni neng khala Israela cheng theung y samrang by y leang rai; Dan cheng theaungchi py takhra Israela chengchi kamta, mymychi i vui khu ka-peang harei py by y leang rai; hunai deaungkho y mychi tiu iy saleaung khuteng acha ai nai meingtym hau u nai ne.
2 Dan khumichi ly khu ka-peang hau ai nai, mychi cheng theaung yhm dengtheungra i, sa thai naira awm nai khumi leaung pangrei vawi iy, Zorath mary hawi Esatola mary i dengdairei pato bo. Nichi ly Ephraim pri mawitleaung mang y tym u nai khala ly Mikha i yhm y anga u.
3 Nichi ly huni yhm y awm nai thym khala, Levi thawndeang i katheu nai leu raawi ai dawn pany u vau i, ni teng y chei iy, “Nang ly hinira y ati mana tym mo? nang ai hini meingtym y ami my ang hawi nai mo?,” nanai deng u.
4 Ni my ly “Kai ly Mikha hawi kalop molam y ka-deu harei awm; ni ly kai ai vang ang pei i, ni i pathyp pi nai kalop ang sa hai,” napi.
5 Huna nai khala nichi my, “Kaichi ly hini khuleaungra y eaung naira nga ai mo, ngo y ai mo, nanai Tameuh teng y deng pi kyh cham,” napi u.
6 Pathyp pi nai keung my, “Nangchi ati sai py paleung mawnra by y leang; Areng my hini khuleaungra y, nangchi ai ang kry nai ne,” nanai pathang.
7 Naibaly huni khumi leaung pangreichi ly Laisa mary mang y chei u bo. Huni mary i khumichi ly Sidon mary i khumichi kamta, awmnem naimy awm u nai ne nanai py, ami hawi py ka-jo ka-thui awm vai y nanai py, nichi ngai nai ngierei nga u nanai py, nichi ly Sidon mary i khumichi hawi khri pa-rei palo naira y awm nai ne iy khumi takhrachi hawi py amkawm u y nanai py pany u bo.
8 Nichi leaung pangreichi ly Zorath mary hawi Esatola mary y tym u ali teang nai khala ly amjo amnau ka-bichi my, “Nangchi ati amjy avum u mo?,” nanai deng u.
9 Nichi my, “Jeu u, Laisa mary ai tiu u sina; huni pri ly khri pa-rei hawi nai kaichi niu bo; hini meingtym y awm u jo ai rai a? Awn u kaliki! huni pri y chei iy tiu u sina!
10 Huni meingtym y nangchi tym u nai khala khumichi ly den py ym thai y nai by y nai avum u ai. Huni khu ka-peang ly kau parai iy, khumichi i ngai nai saichi py awm angym nai ne. Huni khu ka-peang ly Tameuh my nangchi teng y ang pei nai bo,” napi u.
11 Naibaly Dan cheng theaung theung i khumi leaung chungvai tariureichi ly tavai thau ai nai angveirym iy, Zorath mary hawi Esatola mary i dengdairei amsa u bo.
12 Nichi ly Juda pri, Kiria Jarim mary y tai u. Huna nai molam y huni meingtym ai ly Dan tavai taira, nanai vaini khrairei amyn awm jo nai ne.
13 Nichi ly hu i nai khuleaung amsa u bi i, Ephraim mawitleaung pri y awm nai Mikha i yhm y tym u bo.
14 Huna nai khala ly Laisa khu khen nai khumi leaung pangreichi my, mychi i ahawichi teng y, “Hi y awm nai yhmchi theung i, yhm hareira y tangka hawi mawm nai myn harei awm nai nangchi pany u a? Huni yhm theung y takhra mynchi hawi Ephod harei py awm. Achi ly mana sa ai mo, nanai nangchi mana dawn u mo?,” napi.
15 Naibaly nichi ly Levi theaung thawndeang awm nai Mikha i yhm mang y chei u i, ni hawi ka-vum sa u.
16 Atiu ai nai aeng yb nai Dan cheng theaung tavaimi leaung chungvai tariureichi ly apai katheu pa-khora ajeng u bo.
17 Khen paviu nai khumi leaung pangreichi ly yhm theung y kun u i, tangka hawi mawm nai myn hawi takhra mynchi py, Ephod py la u bo. Huni neng khala y pathyp pi nai keung ly tavaimi leaung chungvai tariureichi hawi vanrei, apai katheu pa-khora awm nai ne.
18 Mikha i yhm y huni khumichi kun u i, mynchi hawi Ephod ai la u nai khala y, pathyp pi nai keung my nichi teng y, “Nangchi ly ati sa u nai mo?,” nanai deng.
19 Huni khumichi my, “Awm pypy, leu sairei py katheu moh; nang ly kaichi hawi vanrei abang iy, kaichi ai tau pei nai keung y awm pi ba. Khumi leaungrei yhm dengtheung i vui pathyp pi nai keung sa pi nai tleaung y ly Israela cheng theaung verei i vui pathyp pi nai keung sa pi nai ly hawi keh y a?,” napi u.
20 Huna nai khala y pathyp pi nai keung ly khri pa-rei amo theu i, mynchi hawi Ephod syn naimy, huni khumichi hawi vanrei abang jo bo.
21 Nichi ly alengli teang iy tako u bo. Mychi i cho chanauchi, tawnbawichi hawi vawnsai ateaung alangchi ai, mo mang y pato man bo.
22 Huni khumichi tako u chum nai khala y Mikha ly my i yhm deaungpachi ai kachu iy hui nai ne. Nichi ly Dan cheng theaungchi ai hui nai kai i,
23 kaau hai bo. Dan khumichi py amhi iy khen i, Mikha teng y, “Ati aly awm mo? Hini khumi mipuichi hawi ati mana nai y hui u nai mo?,” nanai deng.
24 Mikha my nichi teng y, “Ati aly awm mo,’ nanai nangchi ati mana nai y thui u nai mo? Nangchi ly kai i pathyp pi nai keung hawi, kai i sa nai mynchi syn u pawn lawh ly! kai teng y ati awm jau mo?,” napi.
25 Dan cheng theaungchi my ni teng y, “Hini khumichi ly kado theu iy, nangchi ai tiu hai ai nai ngai y baly, leu sairei py katheu u bi moh; nang hawi nangmy i yhm dengtheungchi dei pawn na,” napi.
26-28 Naibaly nichi ly tako u. Mikha ly nichi ai amtang pajau ai ny y nanai pany i, yhm mang y ali teang bo. Dan cheng theaungchi ly pathyp pi nai keung hawi Mikha i sa nai mynchi syn u iy, tlamsa naimy awm nai khumichi i Laish mary mang y chei u i, tiu u bo. Huni mary ly Berehoba mary awm nai leaunghawira y awm. Nichi ly mary i khumichi ai padei iy, mary ai py mai leng vui bo. Nichi ai atleu nai khumi leaungrei py by y. Ati mana nai mo nabaly Laisa mary ly Sidon mary hawi palo parai i, Laisa mary i khumichi ly takhra khumichi hawi amkawm nai pipi by y nai deaungkho y ne. Dan cheng theaungchi ly huni mary palum teang iy, saleaung khuteng cha u bo.
29 Huni Laisa mary amyn py Jakob i chapo, mychi i amsi pajo Dan ai pany jo ai nai, Dan mary nanai amyn pathi palai nai ne.
30 Dan cheng theaungchi ly Mikha i sa nai myn ai tahm khai iy chiu u bo. Mosi i katu, Kerashom i chapo Jonathan ly Dan cheng theaungchi i vui, pathyp pi nai keung kalop sa. Ni i kangpreangchi py Israela chengchi ai langheng hawi nai neng ryrei, pathyp pi nai keung kalop sa pi.
31 Siloh mary y Tameuh ai chiu nai Tabynako awm nai ryrei ly Mikha i sa nai myn py, huni meingtym y awm jo nai ne.