14
Samson hawi Timnah mary i neampachy
1 Kanirei nai khala Samson ly Timnah mary y tym i, huni mary y Philistia neampachy leaungrei ai avum.
2 Ni ly yhm y vawi teang iy amhm ampo teang y, “Timnah mary y kai i khrei nai neampachy leaungrei awm; ni hawi apom ai nai ngai i, kai i vui deng pi kyh,” napi.
3 Na i py ni i amhm ampo my ni teng y, “Nang ly neampachy leaungrei nga ai nai, Areng ai chiu y nai Philistia chengchi teng y, ati mana nai chei lawh mo? Amychi cheng theung y py ne sy, amychi nupai theung y py ne sy, neampachy leaungrei ai hau iy niu y nai sai a? " nanai deng. Samson my ly my i ampo teng y, “Huni neampachy ai naini, kai i vui deng pi kyh; ni ai kai ly khrei nai ne,” napi.
4 Na i py Areng ly Philistia chengchi ai tiu ai nai neng kahawi hau nai deaungkho y, Samson ai hina nai sa hai nai ne, nanai ly ni i amhm ampo ly pany y. Huni neng ly Israela chengchi tlang tleaung y, Philistia chengchi my pajau nai neng ne.
5 Hunaibaly Samson ly amhm ampo hawi vanrei, Timnah mary y chei u bo. Nichi ly kreip akhochi tako prei nai thym khala, Samson ly khrangsi kataichy hang nai thai.
6 Areng i sa thai naira ly Samson i tlang tleaung y tlenrei khyhmy hamhai bo. Hunaibaly Samson ly my i kiu makeng nyhrei hawi mi-icho ai theihkrei nai kamta theihkrei vui bo. Na i py ni ly my i sa nai kalop ai amhm ampo teng y thui pi y.
7 Naibaly ni ly neampachy teng y chei iy leu arum; ni ly neampachy ai khri pa-rei khrei nai ne.
8 Naibaly kani kra kyh nai khala, Samson ly huni neampachy hawi apom ai nai chei bi bo; ni ly huni lam, lam manglai en vui iy, my i vaichi khala padei nai khrangsi ai khen ai nai chei i, khrangsi veu taku theung y khawiphi hawi khawichi awm lawh nai niu khala, lyh parai na.
9 Ni ly khawibyn ai kiu hawi takhawi i, lam tako nai tarawi y cha prei. Amhm ampo teng y tym nai khala, nini ai py maidenreichy pei pi i, cha hai bo. Na i py khawi hang ai khrangsi veu taku theung i nga nai ly Samson my nini teng y thui pi y.
10 Ni i ampo ly lengngo i yhm y chei taleang bi. Samson ly thawndeang deaungdichi i reita kamta, cha-nei pawi sa nai ne.
11 Avang saleaung i khumichi my ni ai niu baly, thawndeang deaungdi leaung phaireichi ai, ni hawi vanrei pawira abawi hai ai nai pato bo.
12-13 Samson my nichi teng y, “Kaimy nangchi ai achi-aki ai. Nangchi ly apom pawi kani saryhrei, pawi lui y rai khala thui pachai pajau lawh baly, kanih jeung phairei hawi baichu phairei kang pei ai; thui pachai pajau y lawh nabaly, nangchi my kai ai kanih jeung phairei hawi baichu phairei pei ai nai tla,” napi.
Nichi my, “Achi-aki jau, kaichi tangai ai,” napi u.
14 Samson my,
“Cha nai theung i cha ai naira,
atho ham nai theung i tui parai naira theu lawh,” napi,
Kani thomrei tym i py, nichi ly achi-aki nai thui u pachai thai y rai.
15 Palyh kani y nichi ly Samson i aju teng y, “Nang i juvo ai parawi hyp iy, huni achi-aki nai kaichi pany ai nai thui pi sy; hina nai kamta nang so y lawh baly, nang hawi vanrei ngampo i yhm py, kaichi my mai leng vui ai; nangni aju juvo ly kaichi i vawnsai lawm ai nai ngai i, kaichi ai palau nai ny y a?” nanai kado theu hai bo.
16 Naibaly Samson i aju ly meikatui tarauthau naimy chei i ni teng y, “Nang ly kai ai khrei nai ny y; niu ngai y nai teu. Kai ai thui pi y naimy kai i ahawichi teng y achi-aki nai ly kai ai thui pi pachai y lawh be!” napi. Samson my, “Khen cham, kai ly amhm ampo teng y malawn py thui pi y naimy, mana nai nang teng y kang thui pi lawh ai mo?,” napi
17 Neampachy ly hini molam y, pawi kani saryhrei vo nai ne. Na i py saryh kani y neampachy my tabihang nai deaungkho y, Samson ly achi-aki nai thui pi bo.Naibaly neampachy ly Philistia khumichi teng y thui pi teang.
18 Hunaibaly kani saryhrei nai kani y Samson ly takun theung mang kun y rai khala, mary theung i khumichi my ni teng y,
“Khawi hang tleaung y tui keh nai ly ati awm rai mo?
Khrangsi tleaung y atho awm keh nai ly ami awm rai mo?” napi,
Samson my,
“Nangchi ly kai i si nu hawi li thawn nai ny y baly,
kai i achi-aki nai thui pachai thai y leang,” napi.
19 Areng i sa thai naira ly Samson teng y tlenrei khyhmy atho ham hai nai deaungkho y, ni ly Asakelon mary y chei iy, khumi leaung phaireichi ai padei i, nichi teng i ateaung kahawichi la pi pawn nai khala, achi-aki nai thui pachai thai nai khumichi teng y pei pi. Huni bo y ni ly kado theu i, yhm mang y vawi bo.
20 Naibaly my i aju ai ly apom nai khala y angdo hai nai neampacho hawi apom hai vui nai ne.