4
Angchei i arum nai
Eliphe
1-2 Joba awi, kai ly nang ai kang thui pi baly, paleung hawi y nai awm na a?
Kai ly kaawm pypy jo thai y.
3 Nang ly khumi neangneangchi ai thui parip.
Atho di naichi ai khaw hai.
4 Atho di akawm iy atlym vi nai khumi ai,
nang ly atho pei nai leu thui naimy khaw hai bo.
5 Patang naira avum ai nai vai, nang teng y kamki tym nai khala ly
nang ly patang naira avum vam y na pa-rei, ngam su naimy awm bo.
6 Nang ly Tameuh ai chiu naimy ahihawi iy, kamngo thui bira by y na pa-rei, awm nai khumi ne nai deaungkho y,
nang i paleung theung y ym iy, athang khai thai nai ka-dawn awm ai avo nai ne.
7 Nang adawn ali teang cham rai; mani khumi kahawi ly
khri pa-rei patang naira avum vai mo, nanai kai ai thui pi cham.
8 Khumichi ly sa tamang nai li thawn iy,
kamngo ti hei u nai kaniu.
Vai i neng khala huni khumichi ly hawi y nai hawi sa tamang nai athaichi pakym u ai nai tla bo.
9 Tameuh ly kado theu nai deaungkho y, ali kamchai kamta nichi ai taphra pawn bo.
10 Khumi hawi y naichi ly khrangsi kamta, hang u reng nai ne.
Na i py Tameuh ly nichi i hang nai katyn anawn hai iy, nichi i hochi takheaung pi pawn bo.
11 Nichi ly cha ai nai daichi mawi avum y nai, khrangsichi kamta dei u.
Nichi i cho chanauchi py, ahei u akyhkyh bo.
12 Vaichi khala kai teng y amteng hai nai raawi katyn ly kangjaichy ang tym bo.
Huni amteng hai nai raawi katyn ly kangjaichy ala nai deaungkho y, kathai hawi hai y.
13 Khumichi ly i kamhm tup nai khala,
mo mang i vui ka-dawnchi molam y athengra na bo.Ref 4.13: Joba 33.15
14 Kai ly athengra i, kaso tahyn theu naimy kaawm bo.
Kai i tlum tlang verei py, jei nai paleung hawi anghyn na.
15 Ali theu pryn nai ly kai i meimai y aho pryn nai khala,
kai ly khuma aphau na bo.
16 Mo-cha harei angdo nai kai ly niu.
Kai ly khen kalingie teu i py,
huni mo-cha ly ati amjy mo, nanai kathui thai y.
Hunaibaly tynteng y nai theung i, theu nai katyn thai bo.
17 Huni katyn my, “Khumi ly Tameuh i mo y,
khumi kahawi lawm pajau na a?
Mani khumi ly amy ai sa nai keung i mo y, kamngo by y naimy awm pajau na a?
18 Tameuh ly mymy i kani pri amtaw thau naichi ai malawn py ym y.
Mymy ly kani pri amtaw thau naichi ai kamngo niu.
19 Mymy ly khaileaung hawi sa nai, spryh hawi palum iy mipo ai kamta taphra pajau nai,
heng nai amjy khumi ai ym ai, nanai nang ly athang khai a?
20 Khumi ly khawn mang y heng naimy awm i py,
dym tengsa neng y ami py dawndan y naimy dei reng nai ne.
21 Ni ly my i yhmtheaung katui ngiereichi sum i iy.
tau kacheng by y naimy dei nai ne,” napi.