29
Joba i pany hai nai kangtem
1 Joba my thui bi nai leu ly hini ne.
Joba
2 Kai i awm nai sai ly Tameuh my kai ai
ang kry nai thym khala i kamta, awm ali teang ai nai kangai parai.
3 Huni neng khala Tameuh ly kai hawi vanrei awm nai ne.
Kaveng theung y tako nai thym khala py,
kai ai kangvang ang pei.
4 Huni neng kanichi ly kai i nang chawn ai nai neng kani ne.
Tameuh ly kai hawi amrawi i, kai i yhm y ama hai iy ang kry nai ne.
5 Huni neng khala ati cheaungkhang sa thai nai Tameuh ly kai hawi vanrei
awm nai deaungkho y, kai ai chapo chanauchi my ang awm hai mang nai ne.
6 Kai i sichi, mi-ichi teng i kanu hang neangneang nga;
kai i Olive keungchi ly lengseaung nawi nai meingtymra y malawn py, prau nai ne.
7 Mary i miteaung kehchi leu ka-rumra y
kai chei nai tleirei,
8 khumi ka-cheangchi ly kai ai niu baly lam aheng u bo.
Miteaung acheang naichi ly ang thau iy tahm khai u.
9 Mipuichi ai lu sa naichi ly leu katheu nai anawn u vui bo.
10 Aly len keh nai khumichi malawn py awm u sup bo.
11 Kai ai nui vai nai khumi, kai i satang pany reng nai
khumi bawibawichi ly kai i sa nai saichi palo u.
12 Khumi kamawnchi, jeaungmang nai nuro nukai chochi
vo hang nai khala, kai ly kasabawm nai ne.
13 Khrikhri pa-rei paleung mawn nai khumichi my kai ai palo u.
Kai ly neampachy lumaichi ai awmnem naira pei pi bo.
14 Kai ly hawi naira hawi, adyh adawi naira y atyp jojo.
15 Kai ly mei kamjuchi i mei kamta,
kheu kangbaichi i kheu kamta lawm bo.
16 Kai ly khumi kamawnchi i ampo kamta ne; Patang naira avum nai
apany vai y nai khumichi i, atitira y abawi pi nai ne.
17 Khumi hawi y naichi i nuh khei vui iy,
nichi i kiu y ana naira avum nai khumichi ai atleu pi bo.
18 Kai ly heng sau naimy awm ai nanai py, amy i yhm y paleung savairu naimy
dei ai nanai py, athang khai jojo nai ne.
19 Kai ly tangjynchi tui avawrei nga iy, changpichi py kadam tui
sui nanai pa-rei nga nai dengkeaung keung hawi atawm.
20 Khumi luteng ly kai ai palo u nai ne.
Kai i atho ly mana khala py bai y.
21 Kaimy tau pei nai khala, khumichi ly awmsup naimy
kai i thui nai ai hawihai tangai u bo.
22 Kai thui chum nai khala, nichi my thui panawi bi ai nai sairei py by y.
Kai i leuchi ly kani tuichi kamta, nichi teng y num jo bo.
23 Li hlau sa naichi ly kanipui tym en nai kanitui kadeaung nai kamta,
khumi bawibawichi ly kai i leu ajeng naimy awm u nai ne.
24 Nichi paleung phra atho di nai khala,
nichi ai kaimy panui pi yhm bo.
Kai i amo theu nai meimai niu nai khala, nichi atho nga u.
25 Kai ly nichi i vui ka-vo sa pi iy, leu pacheang pi bo.
Amy i tavaimichi ai lu sa lam patei pi nai samrang kamta,
kai ly nichi ai lu sa iy lam patei pi bo.
Nichi paleung phra atho di nai khala, kai ly nichi ai paleung pahawi pi nai ne.