23
Joba
1-2 Kai ly vai khrairei Tameuh ai tiu naimy katangam bo;
tangam y nai awm pajau y.
3 Mymy ai mani meingtym y avum pajau ai mo?
Mymy i awm nai meingtym y mana chei ai mo,
nanai kapany ai nai ngai parai.
4 Kai ly kaimy i kalop, mymy teng y amti pi ai.
Kai mang i pany hai ai awm nai ngiereichi amti pi ai.
5 Kai i tlang tleaung y mymy ly ati leu pei ai mo,
ati mana pathang pi ai mo, nanai kai pany ai nai ngai.
6 Tameuh ly sa thai naira len parai nai teaung iy,
kai hawi ajo athui ai a?
Huna nai sa ai ny y; mymy ly kai i hnei takeng nai pathang pi ai.
7 Kai ly khumi kahawi ne nai deaungkho y,
Tameuh teng y sa nai leaungsai amti pi pajau.
Huna nai khala mymy ly kai teng y kamngo by y, nanai satang thai hai pi ai.
8 Kai ly nisi mang y Tameuh ai kahau,
na i py huni meingtym y mymy ly by y.
Nidym mang y hau nai khala py, mymy ai avum y.
9 Tameuh ly tosyh ngan tokalawi ngan mang y, kalopchi sa naimy awm;
na i py mymy ai kai avum y.
10 Na i py Tameuh ly kai i kheukanchi niu nai ne.
Mymy ly kai ai cham lawh baly, kai teng y kamngo by y, nanai pany ai.
11 Kai ly mymy i vawi patyp nai lam y,
ka-ym awm naimy katako nai ne.
Mana khala py langvawi lamtang amphri vai y.
12 Kai ly Tameuh my leu pei nai kamta, kasa jojo nai ne.
Mymy i ngai nai kamta tako nai ne;
kaimy i kangai tako y leang.
13 Mymy ly mana khala py, paleung ka-dawn takhra vui y.
Ami py mymy ai ka-keng ka-awi so pajau y.
Mymy i sa ai ngai nai paka pajau y
14 Mymy ly kai i vui khai pi nai katauchi sa pi takengkei ai;
huni dawn tau nai ly nawi parai nai katauchi theung i harei ne.
15 Hunai deaungkho y kai ly mymy i mo y jei hyn naimy kaawm.
16-17 Ati cheaungkhang sa thai nai Tameuh ly kai i atho di hai vui bo.
Veng nai deaungkho y kai i meichi ly niu pajau y teu i py
kai ai jei hyn hai nai ly veng naira ny y, Tameuh ne.