7
Samrang Ahaz i vui leu pei nai
1 Juda pri y Uzia i katu, Jotham i chapo Ahaz samrang lyn nai thym khala y, tavai atiu nai ne. Suria samrang Rezin hawi Israela samrang Remaliah i chapo Pekah nini ly Jerusalem mary ai tiu u teu i py, huni mary ai peang vui pajau y. Ref 7.1: 2 Areng16:5; 2 Neng 28:5-6
2 Suria risachi ly Israela khu ka-peang theung y tym u bo, nanai Juda samrang thai nai khala y, ni hawi vanrei ni i khumi mipui bawibawichi ly khri pa-rei jei u bo. Ali theu iy ahyn nai dengkeaung ngamchi kamta, nichi i paleung ahyn u nai ne.
3 Areng ly Isaia teng y, “Nang i chapo Shear Jashub ai palau iy samrang Ahaz hawi ka-vum so. Nang ly ni ai salo tuikan tui paleaung nai tui lam katemra i, kanih aneng nai keungchi i kalop sa nai meingtym sahawi i lam salo y avum ai.
4 Ni ai tau awm ai nai, paleung khaw ai nai, kaso theu y ai nai hawi paleung khrukhra y ai nai thui pi. Samrang Rezin hawi vanrei Suria khumichi i kado theu nai hawi samrang Pekah i kado theu nai ly maisaku nyhrei mang theu nai maikhyh tanrei, ka-jeira pei pajau y leang.
5 Suria pri i samrang hawi Israela pri i samrang nini ly kangviu y tau harei sa hawi bo.
6 Nichi ly Juda pri theung y kun iy khumichi ai mymychi mang y abang ai nai pajei pahyn iy, Tabeel i chapo ai samrang palyn ai nai dawn u yb nai ne.
7 Na i py Areng my satang thai hai nai ly “Hina nai ly mana khala py tym ai ny y.
8 Ati mana nai mo nabaly Suria pri i atho ly Damaska mary ne iy, Damaska mary i atho py samrang Rezin ne nai deaungkho y ne. Israela pri py saneng vuitariu saryh pangrei sala y phra ai i, pri harei kamta khaw pajau ai ny y leang bo.
9 Israela pri i atho ly Samari mary ne iy, Samari mary i atho py samrang Pekah ne.
Nangchi ly Tameuh ai hawihai palai ym y lawh baly, mana khala py angdo u pajau ai ny y,” napi.
Emmanuela satang rengrang ka-ma-ra
10 Areng ly Ahaz teng y mymy i savai pato iy leu pei bi nai ly,
11 “Rengrang ka-ma-ra harei patei pi ai nai nang i Areng Tameuh teng y hnei ba. Huni rengrang ka-ma-ra ly tavau pri i dengdairei py, kani pri mang i dengdairei py ne lym ai,” nanai thui hai bo.
12 Ahaz my, “Kai ly Areng ai cham ai nai ngai y. Hunai deaungkho y rengrang ka-ma-ra hnei ai ny y,” napi.
13 Huna nai khala Isaia my, “Aw samrang Davida i katu chanauchi awi, vai tangai ba. Nang ly khumi mipuichi ai niu ngai y ai nai pa-rei sa nai ly paleung anyp y i, Tameuh ai py niu ngai y ai nai pa-rei sa ai nai ngai lawh a?
14 Vai, Areng mymy naimy nang ai rengrang ka-ma-ra harei ang patei pi ai. Neampachy anglo leaungrei ly deaungdi aniu ai i, chapo tapen ai. Ni ly huni chapo ai, “Emmanuela”note 7:17\xk Emmanuela: hebrai leu y “achi hawi vanrei awm nai Tameuh” nanai sai ne. \x*nanai amyn pathi ai.Ref 7.14: Mt 1:23
15 Huni deaungdi ly tleaungri acheang iy dawn pany thai nai neng tym nai khala y, kanu hawi khawihang naini cha nei ai.
16 Huni neng kani tym y rai khala my, nang jei nai samrang leaung nyhrei i pri ly khumi angso savai tlang nai lawm ai.
17 “Israela hawi Juda pri nyhrei akhawi takhra nai neng dengdairei amteaung iy, avum vai y nai patang nairachi ai Areng ly nang hawi nang i khumichi tlang tleaung y py, samrang i yhm dengtheungchi tlang tleaung y py tym hai ai. Mymy ly Asuria samrang ai ang hawi ai.
18 “Huni neng tym nai khala Areng ly Aikupta chengchi ai pathauchi kamta, Naing tavo kangprei syh mang dengdairei py, Asuria chengchi ai khawichi kamta mychi pri i dengdairei py tym u ai nai, amsui sai hawi ka-ma-ra pei ai.
19 Nichi py lengseaung nawi parai nai leaunghawichi, lengseaung tapiuchi, aleng reaung awm nai ngiereichi hawi, sui tlai naira ngiereichira y, adeng mengmeaung naimy tym u ai.
20 “Huni neng tym nai khala y Areng ly Euphrat tavo vai i Asuria empara samrang napi nai sam vau kawp nai keung ai alai iy, nangchi i labeaung muichi py, sam hawi tlang muichi py vau hai ai.
21 “Huni neng tym nai khala, li sa nai khumi leaungrei teng y sicho nu harei hawi mi-i nyhrei nai awm khyh teu i py,
22 ni ly my i cha nei ai nai ngai nai ryrei, kanu tuichi nga ai. Huni pri y dei kamthum khumichi ly kanu tui hawi khawihang cha nei ai nai nga u ai.
23 “Huni neng tym nai khala kreip keung sangrei awm iy, tangka sangrei vang teng nai kreip akhobai tleireira malawn py, aleng reaung cheaungkhang beng hai mang ai.
24 Thailiho chyn syn y naimy ami py huni meingtym y chei vam ai ny y. Pri verei y malawn py aleng reaung cheaungkhang hawimy beng hai mang na ai.
25 Vaichi khala y thengthai keungchi ui mang nai mawi aheung ngiereichi py, aleng reaung cheaungkhang beng mang nai deaungkho y, huni meingtymchira y ami py chei u ai ny y. Sichi, beramchi i vui sui tlaira naini lawm ai,” napi.