5
Kreip akho khulym
1 Tangai ba, kai i ahawi hawi ni i kreip akhobai molam y
hini khulym ly nang ai kaimy kang thui pi ai.
Khri pa-rei paitiu khuta hawi nai mawi salo y
kai ahawi i kreip akhobai awm.
2 Ni ly khaileaung tai piu iy lengseaungchi akhui pawn i,
khai patyp nai di kahawi kreip keungchi ui bo.
Ni ly huni keungchi typ ai nai angdeangra chang sa.
Kreip athaichi ati ai nai angawm py sa.
Ni ly kreip athai myn nai neng ajeng;
Na i py kreip athai bawibawichi ly tho nai ne.
3 Hunai deaungkho y kai i ahawi my, “Nangchi Jerusalem mary i khumichi hawi Juda khumichi awi, kai hawi kai i kreip akhobai sa nai khen u cham.
4 Huni akhobai palum naira y kai ly ati so pi y nai awm mo? Na i py kreip keungchi ly kai i athang khai nai kamta, ati mana nai kreip athai kahawichi jeng y, kreip athai kathochi athai lawh mo?
5 “Kai ly huni kreip akhobai ai hina nai kasa ai. Huni akhobai apai taphra vui iy, lengseaung apai py panawi vui ai. Daichi mawichi tlai hai iy chiu hai piupa ai.
6 Kai ly huni akhobaira y acha keungchi beng hai kha ai. Kreip changpichi tangam pi y iy, khaileaung py taipi pui ai ny y. Aleng keungchi neangneang prau hai ai. Huni akhobaira y kani nai hai y ai nai, khupanymchi ai kaimy paka vui ai,” nanai thui bo.
7 Israela pri ly ati cheaungkhang sa thai nai Areng i kreip akhobai ne;
Juda khumichi ly mymy i ui nai kreip keungchi ne.
Nichi ly kahawi sa ai, nanai mymy ly athang khai;
na i py nichi ly khumichi ai padei u nai ne.
Nichi ly hawi nairachi sa ai, nanai mymy ly athang khai;
Na i py nichi my ana naira avum nai khumichi ly adyh adawi naira nga ai nai aeu u nai ne.
Khumichi i hawi y sa nai
8 Nichi ly taham si! Mymychi teng y awm yb nai yhmchi, li hlauchi vuikanai nawi pa-rei sa naichi awi, kra y naimy khumi takhrachi i vui awm naira meingtym awm ai ny y. Nangmychi tlairei, hini pri theung y awm u ai nai tla ai.
9 Ati cheaungkhang sa thai nai Areng my, “Hini apu parai nai yhm puichi ly khumi angso by y nai yhm kaphrachi lawm ai.
10 Choh teaung apomrei apeaung awm nai kreip akhobai i kreip hang py, palang tariureichy nga ai khyh. Ti teaung apom phai pangrei hei i py, teaungnyh pa-thom si tariurei naini nga khyh ai.”
11 Nangchi ly taham si! Nangchi ly mhm-rah nei u ai nai ang thau kasa iy, dym mang py pavui jojo reng nai ne.
12 Nangchi i pawichi sa naira y tarochi, atymchi, byhlyhchi hawi kreip hangchi abawi reng nai ne. Na i py Areng ly ati mana sa mo, nanai nangchi pany y.
13 Hunai deaungkho y nangchi ly patiu iy langheng hawi nai avum u ai. Nangchi i lu sa naichi ly kajeu kanglam y dei u ai. Khumi bawibawichi ly tui kanghai y dei u ai.
14 Tavau pri ly nichi ai pajawn ai ngai nai deaungkho y, my i labeaung ly ang pachaka na bo. Jerusalem mary i bangtangchi ai py, khru nganglang naimy kadosum nai khumi kanghu puichi hawi raurei, pajawn vui nai ne.
15 Khumi luteng kangji nga iy paleung len nai khumi ngiereichi py, tahm anem naira avum u ai.
16 Na i py ati cheaungkhang sa thai nai Areng ly kahawi sa nai dengdairei mymy i nang parai nai patei pi ai. Mymy i nang parai nai hawi chai parai nai amthang hai ai.
17 Phra seaungkhrang nai marychira y beramchochi ly acha cha naimy, mi-ichi py sui tlaira meingtymchi avum ai.
18 Nangchi ly taham si! Nangmychi i kamngochi my ang kawm cheng nai ly nangchi amprai u pajau y.
19 Nangchi my, “Kaichi niu ai nai Areng ly mymy i leu pei nai kamta, so pi kaliki sy. Israela chengchi i chai parai nai Tameuh ly mymy i dawn tau naichi so pi takengkei na sy. Mymy i dawn tau nai achi khen u sina,” nanai thui lawh.
20 Nangchi ly taham si! Kahawi ai ly hawi y, hawi y nai ai ly kahawi, nanai nangchi thui u reng. Kaveng ai kangvang palawn, kangvang ai kaveng palawn u reng. Nangchi my katui ai kakho, kakho ai katui palawn hai u reng nai ne.
21 Nangchi ly taham si! Amymychi ai khri pa-rei cheng parai, tau awm, nanai athang khai u reng.
22 Nangchi ly taham si! Nangchi rah palang soraichi awi! nangchi ly rah katlen naira y vam parai i, jei nai paleung by y lawh ly!
23 Na i py nangchi ly un langseaung nga lawh teu baly, sa tamang nai khumichi ai pajeng y naimy patleaung vui iy, tamang y nai khumichi ai ly kataw kateng chih pi u y.
24 Hunai deaungkho y chohphi hawi acha kajeichi ly mai kangveaung y kang nai kamta, nangchi i tangjynchi ly rawp iy pauchi py jei pawn ai. Ati mana nai mo nabaly nangchi ly kaichi teng y Israela chengchi i chai parai nai, ati cheaungkhang sa thai nai Areng my leu pei nai khai u su nai deaungkho y ne.
25 Areng ly mymy i khumichi tlang tleaung y kado theu i, pajeng ai nai kiu pheu nai deaungkho y, mawichi ly amchyh neung na ai. Khumi kadei veuchi ly lamchi salo y anyn angso kamta awm jo ai. Huna teu i malawn py Areng i kado theu nai ly rym ai ny y. Mymy ly kamngo pajeng ai nai kiu pheu naimy awm ai.
26 Areng ly ka-ma-ra patei iy, kamlora awm nai cheng takhrachi ai palau ai. Mymy ly nichi ai khaileaung katem mang dengdairei jeu u ai nai, amsui sai hawi ka-ma-ra pei pi ai. Huni khumichi py huni meingtym y jeu u kaliki ai!
27 Nichi theung y akawm nai khumi, avah nai khumi, nanai by y. I kamhm ngam nai khumi, i nai khumi py by y. Nichi i khobaichi asu y, phainai vuichi py leu y.
28 Nichi i thailiho chynchi ly chiu parai i, thailihochi py a-eaung ai nai angveirym bo. Nichi i keaungngo muikenchi ly maiho lengseaung kamta tang iy, ka-ri amlira kheuchi py ali lengli kamta ami kaliki na bo.
29 Nichi i aeu nai katyn ly mawi ai kei naimy ryh iy ni teng i nai ami py lawm pajau y ai nai amtang hai nai khrangsichi i hang nai katyn hawi atawm.
30 Huni neng khala nichi ly pangli tui amsau nai katyn kamta, raawi pajeng parai naimy Israela pri y aeu u ai. Huni pri ai khen u cham rai! Huni ly vengpam, ngari kamtang cheichei lawh ly! Kangvang ly kaveng theung y tama jo nai ne.