47
Babulon mary ai tara chih nai
1 Areng my,Ref 47.1-15: Is 13:1—14:23; Jer 50:1, 51:64
“Aw, Babulon mary napi nai neampachy awi,
nang ly samrang atehra tleaung i dengdairei satla iy, khaileaung y ateh.
Vaichi khala nang ly phrumai avum vai y nai anglo lengmyn, sum vai y rai nai mary ne.
Na i py vai, nang ly paleung nau nem nai khumi ny y leang bo!
Vai, nang ly miseaung lawm veng bo!
2 Nang ly choh nip nai lengseaung ai tamie! Dei lawm pa-rei kawi!
Nang i meimai mym nai nidan lei vui! Apu parai nai ateaungchi aleng veng!
Tavo angpeang ai nainote 47:2\xk tavo angpeang ai nai: pri pala naira avum ai nai thui nai ne.\x* nang i baichu kangjiu apa kalau!
3 Nang ly tahm panem naira avum ai i, kangji nga iy
tlang ka-keu awm nai ly khumichi my niu u ai. Kai ly nang ai vawitheung tha ai.
Kai ai ami my py paka pajau ai ny y,” napi.
4 Israela chengchi i chai parai nai Tameuh ly kaichi ai law tleaung hai bo.
Mymy i amyn ly ati cheaungkhang sa thai nai Areng ne.
5 Areng my Babulon mary teng y,
“Tyn teng y nai vengra y ateh.
Khumichi ly nang ai, khumi cheng cheaungkhangchi i samrangnu, nanai palau u bi ai ny y!
6 Kai ly kaimy i khumichi ai kado theu hai nai deaungkho y,
kai i khumichi ny y nai kamta kapalawn nai ne.
Nang i sa thai naira anui y khai bo.
Na i py nang ly huni khumichi tlang tleaung y, pahen nai paleung khai y;
miteaung kehchi ai malawn py, pahyp y nai ana u nai ne.
7 Mymy ly samrangnu lawm jo naimy awm ai, nanai
athang khai i, hini atitichi dawndan y.
Hunichi ati mana tem ai mo, nanai py dawn y.
8 “Nang saw ala ai ngai nai khumi awi,Ref 47:8-9: Amt 18:7-8
amymy ai chymme bo, nanai khumi awi, hini leu tangai ba.
Kai ly Tameuh tanrei len nanai py
kai ka-tawm khumi ly by y, nanai py nang thui bo.
Nang ly mana khala py lumai lawm ai ny y,
mana khala py cho chanauchi alai vai ai ny y nanai py, nang ly athang khai bo.
9 Na i py nang ly kanirei y my, tanarei sala y my,
hini amjy nyhrei avum ai.
Atam kakawp bawibawichi ai teaung i py,
cho chanauchi dei nai my lumai lawm ai.
10 “Nang ly hawi y naichi sa iy, amymy ai ne bo,
ami py niu y, nanai athang khai lawh.
Nang i cheng naira hawi pany thai nairachi my, nang ai lam tamang hai bo.
Nang ly nangmy ai, ‘Kai ly Tameuh ne,
kai ka-tawm khumichi theung y by y,’ nanai thui bo.
11 Taham kasi ly nang i tlang tleaung y tym ai.
Hini ai nang i atam kakawp my paka pajau ai ny y.
Nang ly mana khala py,
amang mang y amang vai y nai phra naira avum ai!
12 Nang i atam naichi hawi laphawichi arawi yb.
Nang ly hunichi ai deaungdichy khala i ka-so teaung nai ne.
Hunichi my nang ai ang sabawm lym ai.
Nang i paleung ka-echi ai py, patheu pajau tan pajau lym ai.
13 Nang teng y tau pei nai miteaung keh neangneang awm teu i py,
nang ly ati sai py so thai y leang.
Ka-si taukichi ai khen patawm nai khumichi,
Kani khusangra y jyhchi patleh takhra iy,
lo tlei tleirei tym ai nai atitichi ai nang teng y thui pi yb nai khumichi,
nang ai tau pei nai miteaung kehchi ly jeu iy, nang ai atleu u sy.
14 “Nichi ly choh-ali kamta lawm iy,
mai ly nichi ai kang ai!
Nichi ly mymychi ai malawn py atleu u pajau ai ny y.
Mai kangveaungchi ly bi-um ai nai a-awm nai mai ny y i,
nichi i vui ly khri pa-rei ango ai.
15 Nangmy deungrei adeng ahui nai, ka-sichi ai khen iy tau pei nai py,
nang i tlang tleaung y hina nai kamta lawm hai ai.
Hunichi bawibawi ly nang ai khai su iy, mychi i ngai nai mang y theu u pawn ai.
Nang ai atleu ai nai khumi leaungrei py awm ai ny y.