38
Samrang Hezekia no nai hawi no hawi ali teang nai
(2 Areng 20:1-11; 2 Neng 32:24-26)
1 Huni neng thymthang khala y samrang Hezekia ly deivi na pa-rei no nai ne. Amoz i chapo Isaia ly no de ai nai samrang teng y tym i, “Nang ly tuni no naira i hawi ali teang ai ny y nai deaungkho y, nang i kangkhym kangtem leu taviu ai awm naichi taviu ai nai, Areng my leu ang pei bo. Hunai deaungkho y dei ai nai angveirym ba,” napi.
2 Hezekia ly angpang mang y motha iy,
3 “Aw Areng, kai ly nang ai ka-ym awm naimy chiu iy, nangmy sa hai ai ngai nai kamta atho kasa nai ai pany pi jo kyh ba,” nanai chiu sa chum baly paleung si nai khrikhri pa-rei vo nai ne.
4 Naibaly Areng ly Isaia ai
5 Hezekia teng y pato ali teang bi i, “Nang i amsi pajo Davida i Tameuh kai, Areng ly nang i chiu sa hnei takeng nai thai i, nang i meikatuichi kaniu bo. Kai ly nang ai mo mang y saneng holai pangrei heng ai nai kang pei ai.
6 Kai ly nang hawi vanrei hini Jerusalem mary ai Asuria empara samrang kiu i nai atleu ai. Hini mary ai ama hai ai, nanai samrang Hezekia teng y thui pi,” napi.
21 Isaia ly samrang teng y, “Samrang nang i uisalutabaura y thaidu athai bi baly, huni ang vawi ly hawi pyn vui ai,” napi.
22 Naibaly samrang Hezekia my, “Kai ly Achura yhm y chei pajau ai, napi nai ly ati ka-ma-ra deaungkho y pany pajau ai mo?,” nanai deng.
7 Isaia my, “Areng ly mymy i leu adeu nai kamta sa ai, nanai nang ai pany hai ai nai ka-ma-ra harei patei pi ai.
8 Areng ly samrang Ahaz i sa nai kani nari i pa-pui ai nithun mang y kheubyn horei anaw hai vui ai,” napi. Thui pi nai kamta pa-pui ly kheubyn horei anaw nai ne.
9 Hezekia ly no hawi ali teang nai khala y, anui mang i palo nai khulym tajiu nai ne.
10 Kai ly saneng kachi awm ai ny y,
hawi khyp khala my tavau pri y ang vum ai bo,
nanai kadawn nai ne.
11 Hini heng nai deung y kai ly Areng ai py,
khumi angsochi ai py, mo mang y mana kha py
kaniu ai ny y leang bo, nanai dawn nai ne.
12 Taphra vui nai tai kamta py,
pe anengra i nai oh iy ajiu vui nai kanih kamta py,
kai i heng nai deung ly
leu baw iy tem veng bo.
13 Kai i hiuchi ai khrangsi my taai nai kamta,
kai ly no patang nai vumtorei kavo bo.
Tameuh ly kai i heng nai deung dawi hai bo, nanai athang khai.
14 Kai i raawi ly ahyn thlyhthlyh na;
kai ly buhu kamta katangam bo.
Kani mang y khen angdeang nai nawi ala nai deaungkho y, kai i mei khohai na bo.
Aw Areng, hini patangra i nai kai ai atleu pi kyh ba.
15 Hini kalop ai Areng my sa nai ne i, kai ati thui pajau ai mo?
Kai ly paleung kabi tym nai y, i amhm y bo.
16 Aw Areng, kai ly nang i vui, nangmy leaungrei i vui kaheng ai.
Kai i no ang vawi hawi hai iy kai ai heng ai nai pei kyh ba.
17 Kai i paleung bi naira ly paleung savairu nai mang y amtlau vui ai.
Nang ly kai i tlang ai ka-jeira cheaungkhangra i nai atleunote 38:17 atleu: Hebrai leu y “tamen” nanai sai ne.pi bo.
Kai i kamngo ngierei py pahen pi bo.
18 Tavau pri y ly nang ai ami py palo thai y leang.
Khumi kadeichi ly nang i ka-ym awm naira y ym pajau y.
19 Vai, nang ai kaimy kang palo nai kamta
heng nai khumichi naini nang ai palo u nai ne.
Ampochi ly cho chanauchi ai nang i ka-ymra satang thui pi u bo.
20 Aw Areng, nang ly kai i no ang vawi hawi hai bo.
Kaichi ly tarochi beu iy, nang ai palo nai khulym thui u ai.
Kaimychi heng nai sala ryrei ly nang i Achura yhm y palo nai khulym thui ai.