19
Areng my Aikupta pri pajeng ai nai satang
1 Hini leu pei nai ly Aikupta pri i vui ne. Ref 19:1-25: Jer 46:2-26; Ezek 29:1—32:32
Areng ly tamai salo y atang iy, Aikupta pri mang y chei kaliki nai ne. Aikupta pri i mynchi ly mymy i mo y jei hyn u bo. Aikupta pri i khumichi py o-a sorai lawm u bo.
2 Areng my, “Aikupta pri theung y tavai atiu hai ai nai kachyh iy, amjo amnau tengtawi, yhm deaungpa tengtawi ka-jo pakei ai. Mary haihochi tengtawi py, samrang haihochi tengtawi py, mychi tengtawi atiu iy kamjau kamteang akhai u ai.
3 Kai ly Aikupta chengchi i dawn pasym naichi phra hai iy, nichi i paleung ka-dawn py phra hai ai. Nichi ly mychi i chiu nai mynchi teng y, kasabawmra hnei u ai. Vawinam pakun kawp naichi teng y chei iy leu deng ai i, khumi kadeichi i phailochi teng y katau hnei u ai.
4 Kai ly Aikupta chengchi ai ana piupa nai samrang hawi y nai kiu tleaung y au iy, huni samrang ai ly nichi ai peang hai ai. Hini ly ati cheaungkhang sa thai nai keung kai, Areng my pei nai leu ne,” napi.
5 Naing tavo ly tui di iy kangryh kangryh ai.
6 Tavo vum tlawnra y awm nai tavo micheaungchi py, tui kangryh kangryh iy kaveaung mui ai. Japang uipo, samji keungchi ly deirawm ai.
7 Naing tavo peang y pati nai amti amjangchi py deirawm pawn ai i, ali theung y akheang kamlang ai.
8 Naing tavo y ngo hau iy apacho nai khumi bawibawichi py vo tangam u ai. Nichi i sakawichi hawi paleupychi py, teaung ai nai nga u ai ny y.
9 Kanihmai ka-syn kalang kyn naichi ly paleung phra atho di u ai i,
10 peh aneang nai keungchi hawi tau cheng nai kalop sa keungchi py, athosi u ai.
11 Zoan mary i khumichi ai lu sa nai keungchi ly tau ka-khumchi lawm u lawh ly! Aikupta pri i tau pei nai amyn kamthang khumi kachengchi py, hawi y nai katauchi pei u lawh ly! Nichi ly amychi ai ati mana nai y, jangni i khumi kachengchi hawi samrangchi kangpreang ne, nanai samrang teng y thui ai nai vam u lawh mo?
12 Aw Aikupta samrang awi, nang ai tau pei nai khumi kachengchi ly ma mang y mo? Aikupta pri i vui ati cheaungkhang sa thai nai keung Areng ly ati mana dawn pasym yb nai ati awm mo, nanai nang teng y thui pi tan thui pi lym ai.
13 Zoan mary hawi Memphi mary i lu sa nai keungchi ly tau ka-khumchi ne. Nichi ly mymychi i khumichi ai lam patei nai keungchi ne, nanai dawn u teu i py, nichi my teng y nai lam patei pi bo.
14 Areng ly nichi ai dawn pany thai y nai katauchi pei hai nai deaungkho y, Aikupta khumichi ly tamang u iy, amy i amleura y atlym nai pavui tapai nai khumi kamta, atlym u khikha na bo.
15 Khumi kanang py ne sy, khumi kamawn py ne sy, khumi kahawi py ne sy, khumi hawi y nai py ne sy, ami py mychi i Aikupta pri i vui kasabawmra pei u pajau y leang.
Aikupta pri ly Areng ai chiu ai
16 Aikupta chengchi ly neampachy kamta, jeisi nai neng kani tym ai. Ati cheaungkhang sa thai nai keung Areng ly nichi ai pajeng ai nai kiu pahyn naimy awm, nanai niu u nai khala y, nichi ly jei hyn u ai.
17 Aikupta khumichi ly mychi i vui ati cheaungkhang sa thai nai keung Areng my khai pi yb nai khym taham adawn ali teang nai tleirei, Juda pri y jei u ai.
18 Huni neng tym nai khala ly Aikupta pri mary pangreichira y Hebrai leu teaung u ai. Huni marychira y awm nai khumichi ly vaineng abeu iy, Areng teng y leu meitang adeu u ai. Huni marychi theung i mary harei ai ly “Kani areng i mary,” nanai amyn pathi ai.
19 Huni neng tym nai khala y Aikupta pri y Areng i vui maicham harei sa ai. Mymy ai tahm pasang iy leng nai leungcheng harei ly pri khujyhra y awm ai.
20 Hunichi ly Aikupta pri y ati cheaungkhang sa thai nai keung Areng awm, nanai pany hai nai ka-ma-rachi lawm ai. Khumi mipuichi ly ana nai avum iy, Areng teng y kasabawmra nga ai nai aeu u nai khala y, mymy ly nichi ai atleu ai nai khumi leaungrei pato pi ai.
21 Areng ly mymy ai Aikupta chengchi my pany ai nai sa ai. Huna nai khala y nichi ly mymy ai pany iy chiu u ai. Mymy teng y tawnbawi hawi kapathyprachi syn u ai. Nichi ly mymy i mo y leu meitang adeu iy, huni leu meitang adeu nai kamta sa u ai.
22 Areng ly Aikupta chengchi ai pajeng ai nai ne teu i py, nichi i tamo kalemchi tama hai ai. Nichi ly Areng teng y ali teang nai deaungkho y, nichi i hnei takeng nai raawi tangai pi iy, nichi i no-na tama hai ai.
23 Huni neng tym nai khala y Aikupta pri hawi Asuria pri sala y, lam manglai pui harei sa ai. Huni prichi ra i khumichi ly pri harei hawi pri harei ly, vanrei chiu sa achu u ai.
24 Huni neng tym nai khala y Israela pri ly Aikupta pri, Asuria pri hawi paleang chakyh ahyh ai. Huni pri thomreichi ly khaileaung pri vereichi i vui hawi naira lawm ai.
25 Ati cheaungkhang sa thai nai keung Areng my, huni prichi ai amtheaung naira pei iy, “Kai i khumi Aikupta chengchi awi, kaimy sa nai Asuria chengchi hawi, kaimy vawi takhra nai khumi Israela chengchi awi, nangchi ai kaimy amtheaung naira pei ai,” napi.