5
1 “Pathyp pi nai keungchi awi, tangai u! Israela khumichi awi, hawihai palai tangai u! Samrang kangpreangchi awi, tangai u! Nangmychi kypkyp ly meitang khyp naimy, tara chih ai nai keungchi ne. Huna nai kamta nangchi py pajeng naira avum u ai. Nangchi ly Mizapa mary y pateung nai deaung, Tabor mawira y jang nai mawipy,
2 Akasa mary y tai nai angawm kathiu lawm u bo. Naibaly kai ly nangchi bawibawi ai kapajeng ai.
3 Kai ly Israela chengchi i satang pany nai deaungkho y, nichi i hawi y sa nai taphum ai nai ngo y. Nichi ly kai i tlang tleaung y ka-ym by y nai deaungkho y, kai hawi ataing y leang bo,” napi.
Hosea my myn chiu nai molam y pany hai nai
4 Nichi ly hawi y sa nai molam y, mychi i Tameuh teng y ali u teang thai y. Nichi ly myn chiu naira y paleung apei u nai deaungkho y, Areng ai pany u y.
5 Israela khumichi i paleung len amlyh nai sai ly mychi i vui pany hai ai. Nichi ly mychi i kamngo molam y atlym u nai ne. Juda khumichi py, nichi hawi vanrei atlym u bo.
6 Mychi i beramchi hawi sichi ai Areng teng y apathyp ai nai syn u teu i py, atyhtyh teu. Mymy ly nichi ai khai su veng bo i, nichi ly mymy ai niu pajau u y leang bo.
7 Nichi ly Areng i tlang tleaung y ka-ym by y bo. Nichi i cho chanauchi py mymy i chanauchi ny y. Hunai deaungkho y hini khumichi hawi nichi i khaileaung meingtymchi ly kra y naimy phra ai.
Juda pri hawi Israela prichi tavai pasau nai
8 Kibeah mary theung y baw eng u! Ramah mary theung y satang pei u! Bethavan mary y tavai thau nai aeu u! Benjamin cheng theaungchi awi, tavai thau u!
9 Kamngo pajeng nai kani ang tym bo i, Israela chengchi ly phra u ai. Israela khumichi awi, hini ly tym takengkei ai!
10 Areng my, “Juda chengchi ai lu sa nai keungchi ly Israela pri y tiu iy nichi i khaileaung paviu u nai deaungkho y, kai ly kado theu i tui hawi taphra nai kamta, nichi ai pajeng ai.
11 Israela chengchi ly ana naira avum u bo. Nichi ly kasabawmra pei pajau y nai mynchi teng i, kasabawmra hnei ai nai paleung apei u keh nai deaungkho y, mychi i khaileaung meingtym chau vui bo.
12 Kai ly Israela pri khumichi ai taphra iy, Juda khumichi ai tamyh vui ai.
13 “Israela pri ly my i no-na ai py, Juda pri ly my i tamo kalem nga nai ai py, niu nai khala y, Israela pri ly Suria pri empara samrang teng y chei iy, kasabawmra hnei bo. Na i py empara samrang my ly nichi i no-na ai, hawi so pi thai y leang.
14 Kai ly khrangsi kamta Israela khumichi hawi Juda khumichi ai tiu ai. Kaimy kypkyp my nichi ai dei lawm na pa-rei sei piupa iy khai su ai. Kai ly nichi ai ryh vui nai khala y, ami py nichi ai atleu pajau ai ny y.
15 “Kai i khumichi ly mychi i kamngo molam y patang naira avum iy, kai teng y vawi teang nai neng tym nai ryrei, kai ly nichi ai khai su ai. Nichi ly ngari kamtang avum u nai thym khala, kai ai atho sa naimy hau u ai.”