13
1 Amjo amnauchi ai atamen naira ly awm jojo sy.
2 Angvynchi ai kawn ai nai tami u moh:phyreichi ly hunai kamta sa iy pany y naimy kani pri i amtaw thau naichi ai anga hai lawh veng bo.Ref 13.2: AA 18.1–8, 19.1–3
3 Theaung y tla naichi hawi vanrei theaung y tla nai kamta nichi ai pany u jojo ly:nangchi py tlang y awm nai ne teang nai deaungkho y ngari patang naichi ai ly pany u jojo.
4 Khumi bawibawichi ly apom naira ai tahm khai u sy, i ra y py hawi y naira abawi moh sy; angai naichi ai hawi pajang sa naichi ai ly Tameuh my chih ai.
5 Nangchi i paleung awm nai sai ly tangka ai paleung no nai abawi y nai awm sy; nangchi i awm nai ryrei my paleung hawi u; mymy kypkyp my ly, “mana khala y py kang patlaw y ai i, khai py kang khai su y leang mang ” napi.Ref 13.5: Leu 31.6, 8; Josh 1.5
6 Hunaibaly achi ly vam parai pa-rei my,Ref 13.6: Sam 118.6
“Areng ly ang sabawm nai keung ne,
Kai ly kajei y ai;
Khumi my ati ang sa pajau ai mo?”
napi reng nai ne.
7 Nangchi ai kry nai, Tameuh i leu ang thui pi nai keungchi ai ly pany u jojo ly: nichi i awm nai reita y atiti theu naichi ly dawn iy, nichi i ym nai sai amtiu u.
8 Isu Krista ly jangdyh py, vaini py, deungtasa khrairei py huna jojo.
9 Patiu naira amjy takhra takhra hawi, pany vai y nai my py nangchi ai pajau vui ai nai pei u moh:paleung ly cha ai naichira y ny y naimy, pahenra deaungkho y khaw naira nga nai ly hawi:huni mang y asa naichi ly hunira y chawn naira ngo u lawh y leang.
10 Achi ly maicham harei awm i, hunira y ly achura yhm y kalop sa nai keungchi ly cho ngau y.
11 Kamngochi i vui y talam pi nai thi ly Meingtym Kachai y pathyp pi nai keung kalen keh my kun hai iy, huni tawnbawichi i veu ly avang yhm meaungteng y leng vui reng.Ref 13.11: Lev 16.27
12 Hunaibaly Isu py mymy i thi kypkyp i saho y khumichi ai pachai thai ai nai, apai pa-kho palem mang y patang bo.
13 Hunaibaly achi ly mymy ai tahm khai y naira ai pho iy, avang yhm meaungteng y mymy teng y chei u sina.
14 Achi ly hi y avang meingtym kakhaw by y i, vai avang awm ai nai hau nai ne.
15 Hunaibaly mymy i saho y palo naira ly apathyp naira lawn ai nai Tameuh teng y talam u reng sina, huni ly ni i amyn apha y nai labeaung athai ne.
16 Na i py atiti kahawi sa ai nai hawi, atiti paawh y naimy tami u moh, hunai kamta apathyp naira y ly Tameuh ly khrikhri paleung hawi na.
17 Nangchi ai peang nai keungchi i leu tangai u ly, nichi i ngaingai awm u; ati mana nai mo nabaly nichi ly mymychi i sa nai sai thui pi cham ai nai tla nai keung kamta, nangchi i phailo ai ang typ pi nai ne; huni ly paleung mawn nai tarawi y ny y naimy, amo theu nai tarawi y so u sy; huni ny y baly nangchi i vui kamran by y leang bo.
18 Kaichi i vui chiu so pi kyh; kaichi ly cheaungkhangra y hawihai palai awm ai nai tau iy, hawi nai hawi y nai pany naira chai parai nai ly awm, nanai kaichi ly teng khyp naimy apany bo.
19 Naibaly nangchi teng y kai ai ang tym hai kasa bi thai ai nai, huni kamta sa ai nai kang takeng nai tleaung y kang takeng ra nai ne.
Kangkhym i chiu sa nai
20 Naibaly aly nai Tameuh, beram typ nai keung nang parai nai achi i Areng Isu ai ly deungtasarei leu maikawm thi saho y kadeichi theung i dengdairei pathau bi nai keung ly,
21 mymy i mei ka-niu y mymy i kawn nai ngierei Isu Krista i saho y achi ai sa hai iy, mymy i kangai sa ai nai atiti kahawi cheaungkhangra y nangchi ai angym hai sy; mymy teng y nang parai naira deungtasarei awm sy. Amen.
Kangkhym i taviu nai leu
22 Na i py amjo amnauchi awi, pachei nai ly kham u pajau tanga ai nai kang takeng; ati mana nai mo nabaly kai ly nangchi teng y leu maiden chy katajiu veng bo.
23 Achi i amjo amnau Timothei ai ly palawi bo, nanai pany u ba; mymy ly tym kasa baly kai ly mymy hawi nangchi teng y kang jeu ai mang.
24 Nangchi ai peang nai bawibawichi hawi, khumi kachaichi bawibawi teng y kawn nai leu thui pi kyh. Itali pri i nai amjo amnauchi my ly nangchi teng y kawn nai leu thui pi.
25 Nangchi bawibawi teng y pahenra awm sy. Amen.