THESALONIKA
AVANGCHI TENG Y PAWLA I
CHA PA NAI HAREI
1
1 Pawla nini Silvana hawi Timothei ly, Ampo Tameuh hawi Areng Isu Krista y awm nai Thesalonika avang i palau takhra kamkawm teng y ly: Pahenra hawi awmnem naira ly nangchi teng y awm sy.Ref 1.1: Ataw 17.1
Thesalonika palau takhrachi i heng nai hawi ym nai
2 Achi i Tameuh hawi Ampo i mo y ly ym nai deaungkho y nangchi i atiti sa nai hawi,
3 tamen nai deaungkho y nangchi i sa akawm nai sai hawi, achi i Areng Isu Krista ai athang khai nai deaungkho y nangchi i kham pajau nai sai py tami y naimy pany jo i, kaichi i chiu sa naira y ly nangchi i amyn tabawi iy, nangmychi bawibawi deaungkho y kaichi ly Tameuh teng y kawn nai leu thui jojo nai ne.
4 Tameuh i ngai parai nai amjo amnauchi awi, mymy i nangchi ai ang vawi nai sai ly kaichi pany;
5 huna nai kaichi i Satang Kahawi thui pi nai ly nangchi teng y leu y my tlairei khyh ny y i, sa thai naira y hawi Phailo Kachai y hawi khri pa-rei ym cheng cheng naira y py tym lawh nai ly; kaichi ly nangmychi i vui dawn hai nai nangchi i tlang tleaung y mana tanrei sa mo, nanai ly nangchi pany.
6 Naibaly nangchi ly huni leu ly khri pa-rei patang u nai tarawi y Phailo Kachai y kawn parai naimy tangai u i, kaimychi i hawi Areng i amtiu nai keungchi lawn u bo;Ref 1.6: Ataw 17.5–9
7 hunaibaly Makedonia pri hawi Akaia pri i ym nai bawibawichi i vui y nangchi ly khen pata naira lawn u bo.
8 Ati mana nai mo nabaly Areng i leu ly nangmychi i dengdairei amthang veng bo i, Makedonia hawi Akaia pri y khyh ny y naimy, meingtym tleirei y py nangchi i Tameuh ai ym u nai sai ly amthang veng bo; hunaibaly kaichi my ati sai py thui ai nai aly ngai y leang bo.
9 Mymychi kypkyp my kaichi i nangchi theung y kun ai nai ngai nai sai ly pany hai u reng; naibaly nangchi ly Tameuh kangheng hawi meitang i kalop sa ai nai hawi, mymy i Chapo (kadeichi theung i dengdairei pathau nai i kado theu nai tym ai naira i nai ang lawi hai nai keung Isu ly) kani pri mang i dengdairei satla nai ajeng ai nai,
10 mynchi mang i nai Tameuh mang y hi u pawn nai sai py pany hai u reng nai ne.