37
Josepha hawi mymy i amjo amnauchi
1 Jakob ly ampo i awm nai meingtym Kanan pri y awm jojo.
2 Hinichi ly Jakob i dengtheungchi i satang ne. Josepha ly saneng holai saryhrei awm nai khala y, ampo i aju miseaung nu Zilpah hawi Bilaha nini i chapochi hawi vanrei beramchi, mi-ichi typ nai ne. Mymy ly amjochi i sa nai sai hawi y naichi ampo teng y amti pi reng.
3 Jakob my Josepha ai ly chapo bawibawichi theung y khrei keh nai ne; ati mana nai mo nabaly miteaung khala y mymy ai tapen nai deaungkho y ne. Mymy ly Josepha i vui apu parai nai baichu kangjiu note 37:3 37:23 baichu kangjiu; ti y baly mawi en awm nai baichu kangjiu. * aneng pi takhra bo.
4 Ampo my Josepha ai nichi tleaung y khrei keh nai y, ni i amjochi ly ni i tlang tleaung y niu ngai y i, leu kahawi py arum hai u vai y.
5 Vumrei nai ly Josepha amang theu i amjochi teng y amti pi; hunai y nichi ly niu ngai y tleaung y niu ngai y ra bo.
6 Mymy ly nichi teng y, “Kai i amang theu nai tangai u rai.
7 Achi bawibawi ly hlau y chei i cho kawm taeang nai ne; kai i chohkawm ly atlymra i nai kataw angdo mesare iy, nangchi i chohkawmchi ly kai i chokawm ai taki teungtareung naimy chiu u bo,” napi.
8 Amjochi my, “Nang ly nangmy ai kaichi i tlang tleaung y peang nai keung samrang lawm ai, nanai dawn nai sai a?” napi u. Amjochi ly mymy i amang molam y py, mymy ai niu ngai y tleaung y niu ngai y ra bo.
9 Naibaly Josepha ly amang theu taleang bi i, amjochi teng y, “Kai ly amang theu taleang bi bo; amang mang y kanito py, lo py, ka-si holai hareichi py kai ai chiu u nai ne,” napi.
10 Mymy ly ampo teng y amang thui pi i ampo my, “Nang i amang ly ati mana nai mo? Ngamhm hawi kai py, ngamjo ngamnauchi py nang ai chiu ai, nanai sai a?” napi nai preng.
11 Josepha ai ly amjochi my niu ngai y ra bo; na i py ampo my huni amang niu nai ly paleung theung y pateung me jo.Ref 37:11 Ataw 7:9
Josepha ai jo vui nai
12 Kanirei nai khala y Josepha i amjochi ly ampo i tawnbawi kanghuchi typ ai nai Sekhem mary mang y chei u bo.
13 Jakob my Josepha teng y, “Ngamjochi tawnbawi kanghu typ nai Sekhem mary mang y chei,” napi.
Josepha my, “Chei ai mang,” napi.
14 Ampo my, “Chei ly ngamjochi py, tawnbawichi py mana awm mo khen cham; kai teng y amti thui pi ali teang,” napi. Hunaibaly Josepha ly ampo my pato nai kamta Hebron leaunghawi dengdairei chei i, Sekhem mary y tym bo.
15 Daichi theung y amki nai thym khala khumi leaungrei my niu i, “Nang ly ati hau nai mo?” napi.
16 Ni my, “Tawnbawi kanghu typ nai kaimy i amjochi ai hau nai ne; nichi ly ma y awm mo, kai ai thui pi pajau a?” napi.
17 Huni khumi my, “Nichi ly hi i nai theu u veng bo. Dothan mary mang y chei u ai, nanai thui u nai kathai,” napi. Naibaly Josepha ly amjochi ai hui i Dothan mary y nichi ai avum bo.
18 Nichi teng tym y rai khala y, kamlo mang dengdairei mymy ai niu u; hunai thym khala y nichi ly mymy ai padei vui ai nai arum u nai ne.
19 Nichi leaung leaungrei adeng u, “Khen cham amang sara ang jeu bo;
20 Jeu u, ni ai padei u veng sina; mymy i veu ai ly tui by y nai tuikanchi theung i ha harei theung y aphi u vui sina. Achi ly mymy ai daichi mawi my kei vui bo, nanai thui ai. Naibaly mymy i amang ly kachah mo, kachah y mo, nanai achi pany pajau ai,” napi.
21 Ruben ly nichi i arum nai thai i, Josepha ai atleu ai nai atho sa bo. Mymy ly “Ni ai padei u moh;
22 hini daichi ka-vym theung y awm nai tuikan theung y palo u sina; ni ai ly no pei u moh sina,” napi. Mymy ly Josepha ai atleu ai ngai nai hawi ampo teng y pato ali teang ai ngai nai deaungkho y hina nai thui nai ne.
23 Josepha ly amjochi teng y tym nai khala y, amjochi my ni i baichu kangjiu ai ly leng vui bo. note 37:23, 37:3 baichu kangjiu; ti y baly mawi en awm nai baichu kangjiu. *
24 Naibaly ni ai patiu u i, tui by y nai tuikan theung y pala u bo.
25 Nichi ly biu cha u nai thym y, rimiu cheaungkhang hawi Murachi kula-iu tleaung y tang naimy Kilead pri dengdairei Aikupta pri mang y khuleaung chei nai Ismaela cheng kamkawm harei ai niu u nai ne.
26 Juda my amjochi teng y, “Achi ly amychi i amnau ai tleh vui iy pheaung y pa-rei apha phyh teu i py ati kamran awm ai mo?
27 Ni ly achi hawi thi ngan kamji kypkyp ne i, mymy ai no pei y naimy Ismaela chengchi teng y phai jo u veng sina,” napi. Amjochi my py ngai u bawibawi bo;
28 naibaly Midian khumi ka-pai sa nai keungchi ly huni mang tako u prei i, amjochi my Josepha ai ly tuikan theung i atheu kalau teang iy Ismaela cheng khumichi teng y tangka chang apomrei hawi jo u veng bo. Naibaly nichi my Josepha ai ly Aikupta pri mang y hawi u jo nai ne.Ref 37:28 Amtaw 7:9
29 Ruben ly tuikan theung y khen ali teang i, Josepha by y vui nai y paleung si nai mymy i baichu sei vui na bo.
30 Naibaly amnauchi teng y chei ali teang i, “Deaungdi ly tuikan theung y by y veng lawh be! Kai mana sa ai mo?” napi.
31 Naibaly nichi ly mi-i harei tleh iy Josepha i baichu ai mi-i thi theung y pani u.
32 Nichi ly baichu syn i ampo teng y, “Hini kaichi my niu nai baichu ly ngaai nangmy chapo i ne a?” napi u.
33 Ampo ly huni baichu ai ma i, “Ne, hini ly kai i chapo baichu ne na a! Kai i chapo ai ly daichi mawi kasichi my kei piupa iy padei veng nai bo hi ly!” napi.
34 Jakob ly paleung si nai mymy i baichu sei piupa iy, paisiu amchiu bo. Mymy ly chapo i vui y paleung si nai kra parai pa-rei vo tangam na bo.
35 Mymy i chapo chaniu leilachi my py khri pa-rei parawi, na i py mymy ly nichi i parawi nai leu ai tangai pi y i, “Kaimy i chapo i vui y paleung si vo tangam nai hawimy kai ly dei iy tavau kho y ka-vum ai,” napi. Hunai deaungkho y mymy ly chapo Josepha i vui y paleung si paleung mawn jojo nai ne.
36 Hunai thym khala Midian khumichi ly Josepha ai Aikupta pri i Potiphar teng y jo vui bo: Potiphar ly samrang ai typ nai keung tavailu leaungrei ne.