23
Sarah dei nai hawi Abraham my tapreaung khaileaung van nai
1 Sarah ly saneng chungvai atlo apom phai saryhrei heng nai ne.
2 Ni ly Kanan pri Hebron mary y awm nai khala dei i, Abraham ly paleung si vo tangam hai bo.
3 Mymy ly aju veu heung naira i theu iy Hiti chengchi teng y chei i nichi teng y,
4 “Kai ly nangchi theung y angvyn kamta ne; kai i aju veu up ai nai khaileaung meingtym jo pi kyh,” napi.Ref 23:4 Amt 7:16, Heb 11:9,13
5 Nichimy pathang nai ly “Areng awi, kaichi i leu tangai kyh rai,
6 kaichi ly nang ai sa thai naira awm nai keung leaungrei nanai kang niu; kaichi teng i hawi keh nai tapreaung y nang i aju veu up teu. Kaichi bawibawi ly nang i aju ai up ai nai ngai hai mang,” nanai pathang u bo.
7 Naibaly Abraham ly nichi i mo y lu meung iy,
8 “Hini meingtym y up ai nai ngai hai u nabaly pahen parai naimy Zohar i chapo Ephron teng y,
9 ni i peang nai taki mang i khaileaung Makapela angawm kai teng jo ai nai deng pi kyh. Vang thui nai ryrei kai teng y jo ai nai takeng pi u kyh,” napi.
10 Ephron py mychi Hiti chengchi hawi vanrei, leu arum nai meingtym mary apai pa-kho y ateh teang nai ne; huni meingtym y awm achu nai khumi bawibawichi i ka-thai y,
11 ni my, “Tangai rai ba, areng awi, Tapiu hawi khaileaung py nang ai kang pei mang. Nangmy i aju ai up ai nai hi y awm nai kaimy i amjychi i mei ka-niu y kang pei mang,” napi.
12 Na i py Abraham ly Hiti chengchi i mo y lu meung naimy,
13 Ephron teng y khumi bawibawichi i ka-thai y my, “Pahen parai naimy kai i thui nai tangai rai ba; hini khaileaung ly kaimy van ai. Hini meingtym y kaimy i aju ai up ai nai deaungkho y vang talam pi kyh,” napi.
14 Ephron i pathang nai ly “Areng awi, tangai rai ba,
15 huni khaileaung meingtym ly tangka chungvai palyhrei teng khyh nai ne; ani sala y ati thui bi ai mo? Hu y nang i aju ai up phai up teu ba,” napi.
16 Abraham ly Ephron my mipuichi i ka-thai y thui nai tangka chungvai palyhrei pei ai nai ngai i, ka-pai sa naichi i kaji neh nai kamta neh iy pei pi bo.
17 Ephron i peang nai Mamre mary nisi mang i Makapela y awm nai khaileaung hawi huni theung i tapiu py, dengkeaungchi py Abraham i lawm ai nai,
18 apai pa-kho y leu arum naichi i mei ka-niu y Abraham teng y au bo.
19 Naibaly Abraham my aju Sarah i veu ai ly Kanan pri i khaileaung tapiu angawmra y up bo.
20 Hunai deaungkho y Hiti chengchi i khaileaung py, angawm py, Abraham i peang nai tapreaung lawm nai ne.