15
Tameuh my Abram hawi Leu Maikawm asa nai
1 Huni bo y, Areng ly Abram teng y paleung mei y niu hai nai ly “Abram jei moh; Kai ly nang ai ka-jeira i nai ama hai iy, nang ai len parai nai kawn vang kang pei ai,” napi.
2 Na i py Abram my, “Sa thai naira angym nai Areng, kai ly chanau by y pui naimy nang i pei nai kawn vang ly mana kanga thai ai mo? Kai i yhmtheaung kamtym ly Damaska mary y awm nai Elieza ne ryp veng bo.
3 Nangmy kai ai chanau pei y nai deaungkho y kai i yhmtheaung kamtym ly kai i miseaungchi theung i leaungrei my amtym ai nai tla ai,” napi.
4 Naibaly Areng my Abram teng y, “Hini miseaung Elieza ly nang i yhmtheaung kamtym ne y leang; nang i yhmtheaung kamtym ly nangmy i chapo kypkyp ne ai,” nanai thui pi nai py Abram thai bo.
5 Areng my Abram ai angam mang y theu hai i, “Kani mang y angdeang ly ka-sichi ai kati cham; nang i kangpreangchi ly hunai kamta nawi teang ai,” napi.Ref 15:5 Rom 4:18, Heb 11:12
6 Abram ly Areng ai ym nai deaungkho y, Areng ly amo theu i kawn pi bo.Ref 15:6 Rom 4:3, Kal 3:6, Jak 2:23
7 Naibaly Areng my Abram teng y, “Kai ly nang ai hini pri kang pei kypkyp ai nai, Babulon pri Ura mary dengdairei pahawi nai keung ly Kai, Areng ne,” napi.
8 Na i py Abram my, “Sa thai naira angym nai Areng, kai ly hunichi mana pany pajau ai mo?” napi.
9 Mymy ly Abram teng y, “Saneng thomrei awm nai si nu harei, saneng thomrei awm nai mi-i nu harei, saneng thomrei awm nai beram katai harei hawi yhm buhu harei, amprym buhu harei, kai teng y jeu hai,” napi.
10 Abram my huni tawnbawichi ai Tameuh teng jeu hai iy umtang y se bawibawi i, se angchi phy nyhrei khai; na i py tavochi ai ly se y.
11 Langnachi ly huni mawi salo y chym, na i py Abram my paryh pawn nai ne.
12 Kani dym bo nabaly Abram ly aseaung i, i nem bo; naibaly ka-jei hawi parai nai ly mymy i tlang tleaung y tym.Ref 15:12 Job 4:13-14
13 Areng my Abram teng y, “Nang i kangpreangchi ly cheng takhra theung y angvyn kamta awm ai; nichi ly saneng chungvai palyhrei miseaung y awm ai i, pahyp y naimy ana naira neangneang avum ai.Ref 15:13 Theu 1:1-14, Ataw 7:6
14 Na i py kaimy nichi ai pahyp y naimy ana nai, miseaung y khai nai keungchi ai pajeng ai i, nichi ly cheng takhrachi theung i nai yhmtheaung neangneang syn naimy theu u ai.Ref 15:14 Theu 12:40-41, Ataw 7:7
15 Nang ly khri pa-rei miteaung cheang iy, awmnem naimy dei ai i ang pavum ai.
16 Nang ly kangpreang deung palyhrei nai bo y hini pri y tym teang ai; ati mana nai mo nabaly Amori chengchi ly khumi aso y nai molam y pajeng naira avum nai khala, nichi ai hini pri i nai kaimy patheu vui ai nai deaungkho y ne,” napi.
17 Kani dym i veng nai khala y, maikhyh laawm hawi maiteaung ly vaimy amteng i, mawi phy nyhrei sala aleaung bo.
18 Huni neng huni meingtym y Areng ly Abram hawi Leu Maikawm asa bo. Mymy ly Abram teng y, “Nang i kangpreangchi teng y, Aikupta pri khujyh dengdairei Euphrat tavo tym pa-rei,Ref 15:18 Ataw 7:5
19 kenit pri, Kenizi pri, Kadamoni pri,
20 Hiti pri, Perizi pri, Rephaim pri,
21 Amori pri, Kanan pri, Kirakashi pri hawi Jebusi pri bawibawichi kang pei nai leu adeu mang,” napi.