5
Nangmychi i tlamsa nai ai akry u
1 Krista my ly miseaung ny y ai nai ang patheu jau chy bo; hunaibaly khaw pa-rei angdo u ly, miseaung i langvui savan y ly atang u reng moh jau.
2 Khen cham, kai Pawla nangchi teng y leu thui pi nai ly, lengkhym takip hai u baly Krista ly nangchi i vui ati sai py kamran by y ai.
3 Ne, Reita i leu bawibawi patawm ai nai awm nai keung ne, nanai lengkhym takip hai nai ngierei teng y kang pany hai bi nai he.
4 Nangchi Reita y eaung ai nai tau nai keungchi awi, nangchi ly Krista hawi amprei u bo: nangchi ly pahenra ai ly atlym pi u veng bo.
5 Achi ly Phailo i saho y ym naira deaungkho y hawi naira i athang khai naira ajeng nai ne.
6 Krista Isu y ly lengkhym takip nai py, takip y nai py ati sai py kamran by y leang; ym naira y ly tamen naira deaungkho y atiti sa nai naini kamran awm nai teu.
7 Nangchi ly hawihai palai angpreng u veng chy bo; nangchi ai ly leu meitang patawm y ai nai ami my ang paka mo?
8 Hini parawi naira ly nangchi ai ang palau nai keung teng i dengdairei ny y leang.
9 Angbo maidenrei chy naimy tako phi verei num be veng.Ref 5.9: 1 Kor 5.6
10 Nangchi i dawn nai ly takhra lawh y leang, nanai kai ly nangchi ai Areng y ly kang ym nai ne; na i py nangchi ai khrukhra hai nai keung ly ami py ne sy, mymy i tlang tleaung y leu atlym nai ly patang ai.
11 Na i py amjo amnauchi awi, kai ly lengkhym takip nai leu kathuipi jojo makho baly ati mana nai kai ai ly ana jojo mo? Hunai kamta ne baly kraws i paka nai sai tama hai bo.
12 Nangchi ai khrukhra hai nai keungchi ly ataphra u tlam tlam i khyly kangai nai ne.
13 Amjo amnauchi awi, nangchi ai ly miseaung ny y ai nai ang palau u nai ne; na i py nangchi i miseaung ny y naira ly tlang i vui ka-vo teaung u reng moh ly, tamen naira y phai asabawm u leungtang.
14 Ati mana nai mo nabaly, “Nangmy ai atamen nai kamta ly nang i saleaungchi ai py tamen ai nai tla,” napi nai leu sairei naira y ly Reita bawibawi ly angym be veng bo.Ref 5.9: 1 Kor 5.6
15 Na i py nangchi ly akei u iy acha u leungtang makho baly, atamo hai u leungtang y ai nai amkym u.
Phailo kangai hawi tlang i kangai
16 Hunaibaly kai ly kang napi; Phailo y tako u, hunaibaly nangchi ly tlang i ngai phi teng y nai patawm u y ai.
17 Tlang my ly Phailo ai tiu iy amymy ngaingai sa ai nai ngai: phailo py tlang ai tiu iy amymy ngaingai sa ai nai ngai; hunaibaly nangchi ly nangchi i atiti sa ai tau naichi ly so u thai y; hunini ly aawi hawi cheng vui veng.Ref 5.17: Rom 7.15–23
18 Na i py Phailo my nangchi ai pahawi baly, nangchi ly Reita i anui y awm u y leang mang.
19 Naibaly tlang i atiti sa naichi ly hawihai amny; huni ly hinichi ne he;
20 angai naichi, chai y naichi, paleaung naichi, myn y chiu naichi, dawi sa naichi, aniu ngai y naichi, ajo naichi, atakho naichi, kado theu naichi, atakai naichi, amy ngaingai sa naichi, ym takhra naichi, akeng naichi,
21 pavui naichi, mhm pawi y amo theu naichi, hunichi ka-tawm ly; huni sa reng naichi ly Tameuh i peang naira amtym u y ai, nanai jangni y kang thui pi rym nai kamta vai py kang thui pi rym nai he.
22 Na i py Phailo i athai ly tamen naira hawi, amo theu naira hawi, awmnem naira hawi, amnym naira hawi, neaung hawi naira hawi, hawi naira hawi, ka-ym awm naira hawi, leu anui naira hawi, amkym thai naira hawi ne;
23 hunai kamta aawi cheng y ai nai Reita leu pei nai ha py by y leang.
24 Naibaly Isu Krista i khumichi ly tlang hawi mymy i kamngo dawn naira hawi, ngai phi teng y naira hawi raurei tahen u veng bo.
25 Achi ly Phailo y heng nai ne baly, Phailo y tako u teang sina.
26 Apacheang leungtang iy, paleung ano nai tahm apasang u moh sina.