3
Reita leu pei nai a, ym nai a?
1 Aw Kalatia pri i cheng y nai khumichi awi, nangchi ai ly ami my ang dawi mo? Krista Isu ai tahen nai ly nangchi i mei ka-niu y my chai pyn pa-rei amteng hai chy bo.
2 Hini harei nangchi teng i dengdairei pany ai nai kangai; nangchi ly Phailo nga u nai ly Reita i atitichi sa nai deaungkho y a, thai iy ym nai deaungkho y a?
3 Nangchi ly hina tanrei pathu u a? Phailo y amteaung u chum veng nai iy, tlang y angym u pajau ai a?
4 Nangchi ly huna tanrei atiti patang u rumrang a? (Patang rumrang tatang nai ne i khyly.)
5 Naibaly nangchi teng y Phailo ang pei nai keung hawi nangchi theung y atiti rengrang sa nai keung ly, Reita i atitichi i sa nai deaunkho y sa nai a, ym nai deaungkho y tangai naira y sa nai a?
6 Hunai kamta Abraham ly Tameuh ai ym i, huni ym naira ly mymy i tlang tleaung y hawi naira y palawn bo.Ref 3.6: AA 15.6; Rom 4.3
7 Hunaibaly pany u, ym naira y awm naichi ly, hunichi kypkyp ly Abraham i chanauchi ne.Ref 3.7: Rom 4.16
8 Naibaly Tameuh i cha-iu ly Tameuh ly ym naira deaungkho y Cheng Takhrachi ai ly eaung hai ai, nanai pany hai rym i, “Nangmy y ly cheng cheaungkhangchi ly amtheaung hai naira nga ai,” nanai Abraham teng y Satang Kahawi thui pi yb bo.
9 Hunaibaly ym naira y awm naichi ly ka-ym awm nai Abraham hawi amtheaung hai naira y ly awm teang nai ne.
10 Reita i atitichi sa naira y awm naichi ly amsawi lawi nai anui y awm u lawh veng; “Reita cha-iu y bawibawi tajiu nai kamta sa ai nai awm jo y nai ngierei ly amsawi lawi reng,” nanai tajiu nai ne.Ref 3.10: Leu 27.26
11 Naibaly ami py Tameuh i mei ka-niu y ly Reita deaungkho y eaung naira ngo y leang, nanai amteng angchi yb nai ne. Ati mana nai mo nabaly, “khumi kahawi ly ym naira y heng ai,’ nanai ne.Ref 3.11: Hab 2.4
12 Reita ly ym naira i nai ny y leang, na i py, “Hunai kamta sa nai keung ly hunira y ly heng ai,” nanai ne.”Ref 3.12: Lev 18.5
13 Hunaibaly Abraham ai amtheaung hai naira ly Krista Isu y ly Cheng Takhrachi i tlang tleaung y awm thai ai nai, Krista ly achi i jeng y amsawi lawi nai ne i, Reita i pasawi naira i dengdairei achi ai atleu bo;Ref 3.13: Leu 21.23
14 (ati mana nai mo nabaly, “Dengkeaung y dang nai ngierei ly amsawi lawi nai ne,” nanai tajiu nai ne:) hunaibaly achi ly ym naira deaungkho y adeu nai Phailo ly nga pajau ai.
Reita leu pei nai hawi adeu nai
15 Amjo amnauchi awi, khumi kamta kathui nai ne; khumi i leu maikawm py ne sy, khaw hai chum nai bo y ly taprei vai y, tabi py tabi panawi vai y leang.
16 Naibaly Abraham teng y hawi, mymy i kangpreangchi teng y py atiti leu adeu hai nai ne. Khumi neangneangchi i molam leu thui nai kamta, “Kangprengchi teng y py,” tapi y; na i py leaungrei molam leu thui nai kamta, “Nang i kangpreang teng y py,” napi nai ne lawh veng; huni ly Krista ne.Ref 3.16: AA 12.7
17 Naibaly hina nai kathui nai ne. Leu maikawm Tameuh i khaw hai chum nai ly, Reita saneng chungvai palyh pangngo saneng phairei nai bo y tym nai ly huni leu adeu nai ai ly ati sai py so hai y naimy tamo hai y leang.Ref 3.17: Theu 12.40
18 Amtym ai nai ly Reita deaungkho y ne baly, leu adeu nai deaungkho y ny y leang bo; na i py leu adeu nai deaungkho y Tameuh my Abraham teng y pei nai ne.Ref 3.18: Rom 4.14
19 Naibaly Reita ly ati mana nai y awm nai mo? Adeu nai nga ai nai kangpreang tym y ryrei ly taphra nairachi deaungkho y tabi panawi bo, naibaly kani pri i amtaw thau naichi ai teaung iy savai i kiu y chih nai ne.
20 Naibaly savai nanai ly khumi leaungrei i khyh ne vai y leang; Tameuh naini harei khyh.
Reita leu pei nai hawi patyp nai
21 Naibaly Reita ly Tameuh i leu adeu naichi ai ly paka nai sai a? Ny y leang; Reita y ang paheng thai nai ly ang pei chum makho baly, hawi naira ly Reita deaungkho y awm takengkei ai nai tla.
22 Na i py Isu Krista ai ym nai deaungkho y atiti adeu nai ly mymy ai ym nai keungchi teng y pei nai lawn thai ai nai, Tameuh i cha-iu ly kamngo i anui y ati cheaungkhang bebe kho hai veng.
23 Na i py ym naira tym y rai khala y, ym naira amteng ai nai vui ly kho hai iy, Reita i anui y achi ai ang typ nai ne chy bo.
24 Hunaibaly achi ly ym nai deaungkho y eaung naira nga thai ai nai, Reita ly achi ai Krista teng y ang pahawi nai ne.
25 Na i py vai ly ym naira tym nai bo y ly, achi ly pahawi nai keung i anui y awm y leang bo.
26 Nangchi ly Krista Isu ai ym u nai deaungkho y Tameuh i chanau lawn u be bo;
27 nangchi theung y Krista y baptisma nga nai ngiereichi ly Krista ai amthyp u bo.
28 Hunai ra y ly Juda khumi py Krik khumi py awm thai y leang, hunaira y ly miseaung py miseaung ny y nai py awm thai y leang, hunaira y ly neampachy py neampacho py awm thai y leang;
29 Krista y ly nangchi bawibawi bomrei lawn u bo. Naibaly nangchi ly Krista i ne u baly, nangchi ly Abraham i kangpreang, leu adeu nai kamta amtym ai nai keungchi ne u bo.Ref 3.29: Rom 4.13