KALATIA
PRI KHUMICHI TENG Y PAWLA I
CHA PA NAI
1
1 Pawla, amtaw thau nai khumi (khumichi i pato nai ny y i, khumi i saho y py ny y leang, Isu Krista hawi ni ai kadeichi theung i dengdairei pathau nai keung Ampo Tameuh i saho y ne lawh nai) hawi, kai teng y amjo amnau awm nai bawibawichi hawi:
2 Kalatia pri i palau takhra kamkawmchi teng y pa nai.
3 Ampo Tameuh hawi achi i Areng Isu Krista teng i dengdairei pahenra hawi awmnem naira ly nangchi teng y awm sy;
4 mymy ly achi i Tameuh hawi Ampo i kangai y vai dymkhawn i khaileaung pri kamngo parai naira theung i nai achi ai alaw hai thai ai nai, achi i kamngochi i jeng y mymy ly apei bo;
5 Ampo Tameuh teng y ly nang parai naira deungrasarei awm sy. Amen.
Harei khyh nai Satang Kahawi
6 Nangchi ly Krista i pahen nai saho y ang palau nai keung teng i nai Satang Kahawi takhra mang y abi u praw vui nai ly kai ly rengrang tlai kana nai ne;
7 huni ly takhra ny y leang; nangmychi ai khrukhra hai nai, Krista i Satang Kahawi ai takhra hai ai ngai nai ami mo awm atyhtyh nai teu.
8 Na i py kaichi my mo, kani mang i dengdairei satla nai kani pri i amtaw thau nai my mo Satang Kahawi kaichi i kang thui pi nai ny y nai, Satang Kahawi takhra ang thui pi lawh baly amsawi lawi kalei sy.
9 Jangvaini y kang thui pi nai kamta ly vai kang thui pi bi ai; Satang Kahawi nangchi i ym nai ny y baly, ami py Satang Kahawi takhra ang thui pi lawh baly amsawi lawi kalei sy.
10 Ti y baly vai kai ly khumi ai kaparawi nai a? Tameuh ai a? Khumichi ai kawn hai ai nai katau nai a? Vai khumichi ai kawn hai nai kaawm rai baly, kai ly Krista i miseaung ny y ai bo.
Pawla amtaw thau lawn nai
11 Hunaibaly amjo amnauchi awi, kai i Satang Kahawi kang thui pi nai ly khumi i leu ny y leang, nanai nangchi ai kang pany hai nai ne.
12 Khumi teng i dengdairei kanga nai ny y i, khumi my ang patiu nai py ny y leang, Isu Krista my amteng hai nai deaungkho y teu.
13 Judachi i Reita y jangni i kai i awm nai sai ly nangchi ly pany u angchi yb veng nai teu bo. huna nai Tameuh i palau takhra kamkawm ai kaimy khri pa-rei ana iy khrukhra hai reng nai ly;Ref 1.13: Ataw 8.3, 22.4–5, 26.9–11
14 naibaly kai i amsi sangumchi i leu taviu naira y kai ly khri pa-rei atho kasa keh nai deaungkho y Judachi i Reita y kai i chengchi theung y kai i tleaungri neangneangchi ai kakatlen veng bo.Ref 1.14: Ataw 22.3
15 Na i py nei i taku theung i dengdairei kai ai ang takhra hai nai hawi, ni i pahen nai deaungkho y kai ai ang palau nai keung Tameuh my ly,Ref 1.15–16: Ataw 9.3–6, 22.6–10, 26.13–18
16 Cheng Takhrachi theung y ni i satang thui pi thai ai nai, ni i Chapo ai ly paleung hawi parai naimy kai ai amteng hai nai thym khala y ly tlang hawi thi hawi adeng kang y naimy,
17 kai ly amtaw thau nai khumi ny y rai khala i amtaw thau nai ne chum veng naichi teng y, Jerusalem avang y kachei y naimy Arabi pri y kachei praw lawh veng; naibaly Damaska avang y ka-li teang bo.
18 Naibaly saneng thomrei bo y ly Kipha ai de ai nai Jerusalem avang y kachei i, mymy teng y kani holai pangrei kaawm.Ref 1.18: Ataw 9.26–30
19 Na i py amtaw thau nai takhrachi ai naini Areng i amjo amnau Jakob ai leaungrei ny y baly ami ai py kaniu y.
20 Khen u cham teu, nangchi teng y kai i leu tajiu naichi ly Tameuh i mei ka-niu y py ka-chawi ny y leang mang.
21 Huni bo y ly Suria hawi Kilikia pri y kachei bo.
22 Naibaly Judai pri i Krista y awm nai palau takhra kamkawmchi ly kai ai meimai pany u y jojo rai;
23 nichi ly, Jangni y achi ai ana reng nai khumi ly, jangni y ym nai leu ai taphra reng nai ly vai ly huni i leu thui pi lawh, nanai amichi i thui nai harei pany u khyh.
24 Naibaly kaimy deaungkho y Tameuh ai palo u bo.