14
Pangli kamsen angpeang nai
1 Naibaly Areng my Mosi teng y,
2 “Israela chengchi ly anaw ali teang iy Bala Zephon mary sahawi Pangli Kamsen hawi Mikadol mary sala i, Phihahiro mary ka-do y tai ai nai thui pi.
3 Aikupta samrang my, Israela chengchi ly daichi ka-vym lam tamang nai awm u ajangtang ngaw khyh, nanai dawn ai.
4 Kaimy samrang i paleung tang hai cheng nai deaungkho y, ni ly nangchi ai ang hui ai; naibaly samrang ly kai i eaung naira niu ai i, ni i tavaimichi py kai i nang parai nai saichi niu u ai. Huna nai khala Aikupta chengchi py, kai ly Areng ne, nanai pany u ai,” napi. Israela chengchi ly Areng my leu pei nai kamta sa u bo.
5 Aikupta samrang ly Israela chengchi preang pan nai thai nai khala, ni hawi ni i bangtangchi ly paleung ali vui i, “Achi ly achi i miseaungchi ai tleaung hai vui lawh ly!,” nanai thui u bo.
6 Naibaly samrang ly mymy i tavai ka-ri hawi tavaimichi ai angvei hai rym bo.
7 Ni ly tavailuchi my lu sa nai hawi keh nai ka-ri chungvai tariureichi hawi tavaimichi ai leu pei i tavai thau hai bo.
8 Areng ly samrang i paleung tang hai iy Israela chengchi ai hui u bo; Israela chengchi ly amo theu saunote 14:8 amo theu sau; ti y balyAreng i kry nai saho y.\x* naimy theu u nai ne.
9 Aikupta tavaimichi, tavai keaungngochi, tavai ka-richi Israela chengchi ai hui u i, Bala Zephon mary hawi Phihahiro mary sahawi i Pangli Kamsen peang jei naira y nichi ai kai bo.
10 Israela chengchi ly samrang i tavaimichi my hui nai niu u baly, khri pa-rei jei u i, sabawmra nga ai nai Areng teng y aeu naimy takeng u.
11 Nichi ly Mosi teng y, “Aikupta pri y tapreaung meingtym by y nai deaungkho y nang ly kaichi ai hini daichi ka-vym y dei hai ai nai pahawi nai a? Dawn cham, kaichi ai Aikupta pri i pahawi nai ly ati mana sa nai kha!
12 Hina nai kamta awm lawh na, nanai Aikupta pri i theu y rai khala y, kaichi ly nang ai kang thui pi y nai sai a? Aikupta pri y miseaung achei py khere i khyly hawi alam chybo. Hini daichi ka-vym y dei nai tleaung y ly miseaung achei nai hawi keh alam,” nanai josei u bo.
13 Huna nai khala Mosi my, “Jeih u moh, Vam parai nai awm u; vaini Areng my atleu nai nangchi niu u ai; Aikupta chengchi ai vaini nangchi niu nai ly vai mo mang y nangchi niu u ali bi ai ny y leang bo mang.
14 Areng my ang tiu hai ai i, nangchi paleung bi u moh; nangchi ati sai py sa ai nai ngai y leang,” napi.
15 Areng my Mosi teng y, “Ati mana nai y nangchi aeu u nai mo? Khumi mipuichi ly mo mang y tako phai tako u sy.
16 Nang ly cheaungvawi syn iy, pangli salo y pheu; Tui ly akhawi thla iy teng teng mang y akalym pawn ai i, Israela chengchi ly pangli paichi khaileaung kaphui mang tako ai nai nga u ai.
17 Kai ly Aikupta chengchi ai paleung tang hai nai deaungkho y, nichi ly Israela chengchi nithun hui u kathiu ai. Kai ly samrang hawi vanrei ni i tavaimichi, keaungngo ka-richi ai eaung nai khala ly kai i nang parai nai saichi niu u ai.
18 Huna nai samrang hawi ni i tavaimichi ai eaung nai deaungkho y, kai ly Areng ne, nanai Aikupta chengchi pany u ai,” napi.
19 Israela chengchi i mo mang y pahawi nai Tameuh i angel ly nithun mang y asyh vui iy awm pi khyp bo. Nichi i mo mang y awm nai tamai angjawi py nithun mang y asyh vui nai deaungkho y,
20 Aikupta tavaimichi hawi Israela tavaimichi sala y awm pi khyp nai ne. Tamai angjawi ly Aikupta chengchi mang y veng hai cheng iy, Israela chengchi mang y angvang hai phang bo. Hunai deaungkho y nichi ly mang mang akai thai y nai ne.
21 Mosi ly pangli salo y kiu pheu nai khala, Areng my nisi ali vumtorei aho hai nai deaungkho y, pangli tui ly akhawi thla i akalym pawn iy, tuili paichi ly phui hai rawm veng bo.
22 Naibaly Israela chengchi ly pangli paichi phui rawm nai tui atapang tawp nai sala mang tako u prei bo. Ref 14:22 1Kor 10:1-2; Heb 11:29
23 Aikupta samrang i tavaimichi, keaungngo ka-richi ly Israela chengchi i nithun y hui u kathiu nai ne.
24 Khutawi en khala Areng ly tamai angjawi hawi maiteaung mang dengdai, Aikupta tavaimichi ai khen kathiu i, nichi ai ahei hai phro bo.
25 Mymy ly Aikupta tavaimichi i tavai ka-ri kheuchi phra hai nai deaungkho y, raira avum u bo. Hunaibaly Aikupta chengchi ly “Israela chengchi i jeng y Areng my achi ai tavai ang tiu nai bo, hi i nai athawn u ali sina bo he!” nanai thui u.
26 Areng my Mosi teng y, “Pangli salo y nang i kiu pheu ly Aikupta tavaimichi, tavai ka-richi hawi ka-ri lu sa naichi salo y pangli tui ly tlenrei khyhmy avum hai tawp teang ai,” napi.
27 Hunaibaly Mosi ly pangli salo y kiu pheu i, khawn khutawi nai khala pangli tui ly angchei i kari kamta awm teang. Aikupta chengchi ly tui theung i lawi ai nai atho sa u; na i py Areng my ly nichi ai tui y anum hai chauchau bo.
28 Pangli theung mang Israela chengchi ai hui u nai Aikupta tavai michi, ka-ri lu sa naichi, tavai ka-richi ai py um hai chauchau i, leaungrei py tleaung y dei be nai ne.
29 Israela chengchi ly tui akalym nai sala pangli paichi kaphui mang angpeang prei ai nai nga bo.
30 Huni kani y Areng my Israela chengchi ai Aikupta chengchi kiu i lawi hai bo; naibaly Israela chengchi ly pangli peang y Aikupta khumi kadei veuchi ahei tliutla nai niu u.
31 Naibaly Areng ly mymy i nang parai nai sa thai naira hawimy Aikupta chengchi ai pasum naichi, Israela chengchi ly niu nai khala y, nichi ly Areng ai jei kaji naimy tahm khai u; naibaly Areng ai py, mymy i miseaung Mosi ai py ym u bo.