THEU NAI
Aly len keh nai ly hini cha-iu theung y Tameuh ly mymy i khumichi ai miseaung achei naira i alaw hai chum baly, vai momang y athang khai naira awm nai cheng hawi, pri harei lawm pa-rei palum pi nai ne.
Hini cha-iu theung y sangum tla keh nai khumi ly Israela chengchi ai lu sa iy, Aikupta i dengdairei pahawi ai nai Tameuh my vawi takhra nai Mosi ne. Leu sai horei pei nai ai pany hai nai pakeung 20 rei nai ly khumi bawibawichi my pany nawi keh.
1
Aikupta pri y Israela chengchi ana naira avum nai
1 Aikupta pri y Jakob hawi vanrei tym nai chapochi i amynchi ly
2 Ruben, Simeon, Levi, Juda,
3 Isakhar, Zebulun, Benjamin,
4 Dan, Naphtali, Kad hawi Aser ne i, nichi i yhm dengtheungchi py abawi nai ne.Ref 1.1-4 AA. 46:8-27
5 Jakob i kangpreang ly leaung vui saryhrei awm; Josepha ly Aikupta pri y awm yb veng bo.
6 Neng tym baly Josepha hawi amjo amnauchi hawi vanrei, huni deung i amjo amnauchi py dei be bo.
7 Na i py Israela cheng kangpreangchi ly cho chanau neangneang tapen iy, khri pa-rei peung nai deaungkho y, Aikupta pri verei y kawi na bo.Ref 1.7 Ataw 7:17
8 Naibaly Aikupta pri y Josepha ai pany vai y nai samrang kangtha leaungrei samrang lyn bo.Ref 1.8 Amtaw 7:8
9 Huni samrang ly mymy i chengchi teng y, “Hini Israela chengchi ly khri pa-rei peung i, atho awm nai ly achi i vui ka-mawn awm nai ne.
10 Nichi ly achi i paleung ka-echi hawi amkawm iy achi ai ang tiu lawh baly, hini pri theung i nai achi theu pawn ai nai tlo lawh na. Nichi ai ana iy patang hai ai nai lam hau u sina,” napi.Ref 1.10 Ataw 7-19
11 Hunai deaungkho y Aikupta chengchi ly Israela chengchi tlang tleaung y miseaung lu kalenchi khai iy, paleung phra na pa-rei atho no kalopchi sa hai akhikan bo. Hunaibaly samrang Pharao i cha nei vawn kachurachi kachu ai nai Pithom mary hawi Ramese mary sa hai nai ne.
12 Na i py Aikupta chengchi my Israela chengchi ai ana ra, peung ra i, pri verei y kawi na bo. Aikupta chengchi ly Israela chengchi ai jei u nai ne.
13 Naibaly Israela chengchi ai miseaung kalop sa hai akhikan iy ana u bi bo.
14 Yhm pui savang pui sa naira y py, li hlau sa naira y py, pahyp y naimy kho-bai na pa-rei sa hai nai ne.
15 Aikupta samrang ly Hebrai neampachychi ai deaungdi syn pi keung Shiphrah hawi Puah teng y,
16 “Nangni ly Hebrai neampachychi chanau tapen nai khala y neampacho ka-so ngierei ai ly padei ryp padei ryp ai nai tla; na i py neampachy ka-so ai ly kang heng khai,” nanai leu pei bo.
17 Na i py Shiphrah hawi Puah ly Tameuh ai jei kaji nai deaungkho y samrang i leu pei nai kamta so hawi vam y i, nini ly neampacho deaungdichi ai padei y bo.
18 Hunai deaungkho y samrang ly deaungdi syn pi keung ni ai palau hai i nini teng y, “Ati mana nai kai i leu pei nai kamta so hawi y lawh? Ati mana nai y neampacho ka-so ngiereichi ai padei hawi y lawh mo?” nanai deng.
19 Huna nai khala Shiphrah hawi Puah nimy, “Hebrai neampachychi ly Aikupta neampachychi atawm y; nichi ly tapen rai y i, kaichi tym y rai khala my tapen pajau veng bo,” nanai pathang.
20-21 Deaungdi syn nai keung nini ly Tameuh ai tahm khai nai deaungkho y Tameuh my nichi ai yhm dengtheung cho chanauchi amtheaung hai. Naibaly Hebrai chengchi py peung ryh peung ryh i, haiho py len ra nai ne.
22 Naibaly samrang my mymy i chengchi teng y kangkhym kangtem leu pei nai ly “Hebrai neampachychi i tapen nai neampacho ka-so ngierei ai ly Naing tavo y aphi u; na i py neampachy ne lawh baly kang heng khai u,” napi.Ref 1.22 Ataw:19