ESTHER
1
Samrangnu Vasati ly samrang Ahasuru i leu ei vui nai
1-2 Samrang Ahasuru ly Pasia pri Susa mary pui samrang i atehra bailang tleaung y ateh iy, India pri dengdairei Ethiopia pri tym pa-rei, pri khu ka-peang 127 reichi ai peang nai ne.Ref 1.1: Ezara 4:6
3 Ni ly peang nai pa-thom saneng y mymy i bangtangchi hawi, peang nai miteaungkeh bawibawichi ai palau iy cha nei pawi pui sa i, pacho panei bo. Huni pawira y Pasia hawi Medi pri i tavaimichi, samrang i khu ka-peang bangtang kalenchi hawi, samrang i bangtangchi py jeu u nai ne.
4 Ni ly mymy yhm i nang chawn nai hawi nang parai naira ai lo tariurei patei pi bo.
5 Naibaly samrang ly kamawn, kanang patleh takhra y naimy, Susa mary i khumi mipuichi ai py cha nei pawi pui sa pi i, pacho panei nai ne. Huni cha nei pawi pui ly samrang i yhm akho apai theung y kani saryhrei sa pi.
6 Huni akho apai theung y tangka sengtleng tai nai leungtau kangleung yhmmawmchi ra y, kanih mai ka-syn kangleung kamngauchi ly kalang kangdauchi hawi thang iy ka-pu sa nai ne. Naibaly leungtau kangleung, leungtau kamsen, khawisaleng lengseaung, lengseaung kamngau-achi hawi mawi sa iy padai; samrang i akho apai theung y muku tangkachi hawi sa nai jawnrachi py khai pi.
7 Samrang ly kreip hang ai muku khauchi hawi tleng iy panei hai bo. Huni khauchi ly ha harei atawm y. Kreip hang ly ngai nai ryrei nei hai.
8 Khumi luteng ngai nai ryrei nei pajau thai ai nai samrang yhm i miseaungchi teng y leu pei yb bo.
9 Huna nai thym khala y samrangnu Vasati py, samrang yhm theung y neampachychi ai cha nei pawi pui sa pi iy pacho panei nai ne.
10 Pawi sa nai saryh kani tym nai khala samrang ly kreip hang nei nai amo theu nai thym y, mymy i sahawi y awm nai tli chum nai leaung saryhrei Mehuman, Bizatha, Habona, Abakatha, Zetha hawi Kakachi ai palau i,
11 samrangnu Vasati ai areng lukhym amyn hai iy, mymy i mo y tym ai nai leu pei bo. Samrangnu ly mo-cha hawi parai nai neampachy ne nai deaungkho y, samrang ly ni i mo hawi nai ly samrang i bangtangchi hawi angvyn bawibawichi teng y patei ai nai ngai.
12 Na i py samrangnu Vasati ly tli chum naichi my thui pi nai samrang i leu pei nai tangai y i, mymy i mo y tym pi y nai deaungkho y samrang ly khri pa-rei kado theu bo.
13 Samrangchi nanai ly ka-jo ka-thui by y, amrip sup ai nai molam y reita leaungsai pany kawp nai khumichi teng y leu khulym deng reng nai awm i, samrang ly huni molam y mana sa ai nai avo ai mo, nanai tau pei nai miteaungkehchi ai palau bo.
14 Samrang i adeng ahui nai nawikeh naichi ly Pasia hawi Medi bangtang leaung saryhreichi napi nai Kashina, Shetha, Adamatha, Tarshish, Miret, Masena hawi Mamukanchi ne. Nichi ly pri theung y tahm asangkeh nai meingtym nga nai khumichi ne.
15 Samrang my nichi teng y, “Kai, Ahasuru samrang ly kai i miseaungchi ai samrangnu Vasati teng y kapato iy kai i leu pei nai thui hai i, ni ly kai i leu tangai y! Hunai deaungkho y kai ly ni i tlang tleaung y reita kamta mana sa ai nai avo mo?” nanai deng.
16 Naibaly Mamukan ly samrang hawi bangtangchi teng y, “Samrangnu Vasati ly samrang ai mei anui y nai khyh ny y; samrang i bangtang kalenchi ai py mei aniu y nai tla. Meitang khyp thui ai na baly, ni ly empara pri verei y awm nai neampacho bawibawichi ai py mei aniu y nai ne.
17 Empara pri verei y awm nai neampachy bawibawichi ly samrangnu i sa nai sai thai u nai khala y, mymychi i juvochi tlang tleaung y tahm khai u y ai. Nichi my, ‘Samrang Ahasuru ly samrangnu jeu ai nai palau teu i py samrangnu my tangai pi y, ‘nanai thui u ai.
18 Samrangnu i sa nai sai thai u nai Pasia hawi Medi bangtangchi i ajuchi ly kani dym y naimy juvochi teng y, huni satang amti pi ai. Naibaly neampachychi ly mymychi i juvochi tlang tleaung y tahm khai u y ai i, neampachochi ly mymychi i ajuchi tlang tleaung y kado theu u ai.
19 Samrang nangmy ngai na baly, samrangnu Vasati ai mo mang y mana khala py nang i mo y kun ai nai pei y, nanai leu pei ba. Huni leu pei nai ai mo mang y mana khala py alie vui y na pa-rei, Pasia hawi Medi pri i reita cha-iu theung y tajiu typ iy khai ba. Naibaly samrangnu i meingtym y, ni tleaung y hawikeh nai neampachy leaungrei ai palyn ba.
20 Samrang nang i leu pei nai ai, hini kau parai nai empara pri verei y thai hai nai khala y neampachy bawibawichi ly mymychi i juvochi tlang tleaung y kamawn py ne sy, kanang py ne sy, tahm khai u ai,” napi.
21 Samrang hawi mymy i bangtangchi ly huni leu ngai u bawibawi nai ne. Huna nai y samrang ly Mamukan i tau pei nai kamta sa bo.
22 Ni ly mymy i khu ka-peang tleirei y savaichi pato iy, meingtym tleirei i cheng leu hawi satang thai hai nai ly “Juvo napi nai ly mymy i yhm dengtheungra y lu sa nai keung lawm ai nai tla. Ni i leu ei vui pajau y,” napi.