7
1 Saneng neangneang kra nai khala Pasia empara samrang Artazeret deung y, Ezara napi nai khumi leaungrei awm. Ni ly pathyp pi nai keung kalen keh Aron i kangpreang ne; hunichi ly: Ezara i ampo ly Seraiah, Seraiah i ampo ly Azariah, Azariah i ampo ly Helkia,
2 Helkia i ampo ly Shalum, Shalum i ampo ly Zadok, Zadok i ampo ly Ahitub,
3 Ahitub i ampo ly Amariah, Amariah i ampo ly Azariah, Azariah i ampo ly Meraioth,
4 Meraioth i ampo ly Zerahiah, Zerahiah i ampo ly Uzi, Uzi i ampo ly Buku,
5 Buki i ampo ly Abishua, Abishua i ampo ly Phineha, Phineha i ampo ly Eleaza, Eleaza i ampo ly Aron ne.
6-7 Ezara ly Israela chengchi i Areng Tameuh my Mosi teng y pei nai Reita leu angym pa-rei kawp nai khumi kacheng ne. Ezara ly my i Areng Tameuh teng i amtheaung naira nga nai khumi ne nai deaungkho y, samrang ly ni i hnei nai ngiereichi pei pi nai ne. Ezara ly pathyp pi nai keungchi, Levi theaungchi, Achura yhm katyn kapau beu kawp naichi, Achura yhm tamcheaungchi hawi kalop sa naira y abawi nai Israela chengchi hawi vanrei, empara samrang Artazeret my peang nai saryh saneng y Babulon mary i dengdairei Jerusalem mary y jeu nai ne.
8-9 Nichi ly angchei lo kani harei kani y Babulon mary i dengdairei theu u iy, Tameuh my sabawm nai deaungkho y pa-ngo lo kani harei kani, Jerusalem mary y tym u bo.
10 Ezara ly mymy deungrei Areng i Reita leu amtiu nai, tangai nai hawi atyp nai ne i, huni Reita theung y awm nai leu pei naichi hawi reita tanynchi ai Israela chengchi teng y patiu pi nai ne.
11 Empara samrang Artazeret ly Israela chengchi teng y Areng my pei nai leaungsaichi hawi reita leu pei naichi kawp angym nai pathyp pi nai keung hawi khumi kacheng Ezara teng y, hini leu pei pi bo;
12 “Empara samrang Artazeret teng i dengdairei kani pri mang y awm nai Tameuh i reita leu kawp nai pathyp pi nai keung Ezara teng y tajiu nai ly
13 “Kai i empara pri verei y awm nai Israela chengchi, pathyp pi nai keungchi hawi Levi theaungchi ly nang hawi vanrei Jerusalem mary y chei ai nai ngai baly chei pajau mang; hini ly kai i leu pei nai ne.
14 Kai, samrang hawi kai ai tau pei nai leaung saryhreichi my ly nang ai Jerusalem mary hawi Juda pri i awm nai sai pany ai nai kang pato bo. Nang ly nang teng y ang au nai Tameuh i Reitachi ai, khumichi my mana tanrei tangai u mo, nanai satang lo ba.
15 Nang ly Jerusalem mary Achura yhm theung y awm nai, kai hawi kai ai tau pei nai keungchi my Tameuh teng y talam nai muku hawi tangka syn ba.
16 Huni bo y nang ly Babulon pri ka-peang verei y cheaungra i nga nai kahm hawi tangka py, Israela chengchi hawi pathyp pi nai keungchi my Jerusalem mary y awm nai, mymychi i Tameuh teng y talam nai kapathyprachi py syn jo ba.
17 Nang ly hini tangka ai hawihai palai pasum ly si katai beaungjeaung, beram katai, beramcho, chohpui chomaw hawi kreip hangchi van iy, Jerusalem mary Achura yhm maichamra y talam ba.
18 Huni bo i muku tangka kamlai ly nang hawi nang i chengchi my ngai nai kamta, nangchi i Tameuh i kangai pasum pajau.
19 Achura yhm i chiu naira y teaung ai nai nang teng y pei nai ateaung alangchi ai Jerusalem mary y awm nai Tameuh teng y talam ba.
20 Huni bo y Achura yhm y ngai rai na baly samrang i peang nai tangka-yh theung i la iy van ba.
21 “Kai samrang Artazeret ly kani pri mang y awm nai Tameuh i Reita leu kawp nai pathyp pi nai keung hawi khumi kacheng Ezara i hnei nai bawibawi ai pei u kaliki ai nai Euphrat tavo pui nidym ka-peang i, tangka kry keung bawibawichi teng y leu kang pei.
22 Nangchi ly tangka kaji sie 5,208 rei, chohpui chomaw teaung 1,333 rei, kreip hang palang 3,300 rei, olive asitui palang 3,300 rei hawi, palawi ly ngai nai ryrei pei pi u na sy.
23 Kani pri mang y awm nai Tameuh ly mymy i Achura yhm i vui ngai nai bawibawi pei ai nai nangchi adawn ai nai tla; huna khala naini mymy ly kai hawi kai bo y peang nai samrangchi i tlang tleaung y, kado theu y naimy awm ai.
24 Nangchi ly pathyp pi nai keungchi, Levi theaungchi, katyn kapau beu kawp naichi, tamcheaung risachi hawi kalop sa nai khumichi teng i nai py, Achura yhm hawi amtawn nai takhra khumichi teng i nai py, ati akeu py hnei u moh.
25 Nang, Ezara ly nang teng y Tameuh my ang pei nai cheng naira ai teaung iy Euphrat tavo pui nidym ka-peangra y, nang i Tameuh i leu tangai u nai khumi bawibawichi ai peang ai nai molam y, peang nai keungchi hawi tara chih nai keungchi ai khai takhra ba. Nang ly huni reita leu pany y nai khumichi ai patiu pi ba.
26 Tameuh i reita leu pei naichi py ne sy, empara pri i reita tanynchi py ne sy, tangai y nai khumi awm lawh baly padei vui nai mo, pri pala vui nai mo, ni i vawnsaichi la pi vui nai mo, ti y baly theaung y pala vui nai mo, huni amjychi hawi vaimy pajeng praw sy,” nanai tajiu nai ne.
27 Ezara my, “Achi i amsi pajochi i Areng Tameuh ai ly palo u! Mymy ly empara samrang teng y Jerusalem mary y awm nai Areng Tameuh i Achura yhm ai, hina nai tahm khai ai nai paleung pei pi lawh bo.
28 Tameuh i saho y kai ly samrang hawi vanrei ni ai tau pei nai keungchi, sa thai naira awm nai miteaung kehchi i mo y, meimai nga bo. Kai i Areng Tameuh ly kai teng y sorai paleung ang pei nai deaungkho y, kai ly Israela cheng theaung i miteaung keh neangneangchi ai, kai hawi vanrei abang ai nai kapahawi pajau nai ne,” napi.