36
Israela chengchi i vui Areng i amtheaung naira
1 Areng my, “Nang khumicho awi, Israela mawichi teng y nichi i vui
2 sa thai naira angym nai kai, Areng teng i leu tangai ai nai thui pi. Israela pri i paleung ka-echi my, ‘Jangni jangkhawn i ka-so awm nai hini mawichi ai vai, achi my peang bo!’ nanai amo theu sau nai paleung hawi thui u bo.
3 “Huna nai y sa thai naira angym nai kai, Areng my leu pei nai thui pi. Pri deaungpachi my tiu vui nai khala, khumi luteng my ly Israela chengchi ai panui hai u nai ne.
4 Hunai deaungkho y Israela mawichi awi, sa thai naira angym nai kai, Areng i leu pei nai tangai u. Tengpang sahawi i prichi my tiu nai, panui hai naichi avum iy khumi angso savai tlang nai marychi, phra seaungkhrang nai meingtymchi, mawichi, tavo micheaungchi hawi leaunghawichi teng y, sa thai naira angym nai kai, Areng my hina nai leu pei nai ne.
5 Sa thai naira angym nai kai, Areng ly tengpang prichi hawi, Edom pri tlang tleaung y khrikhri pa-rei kado theu hai i, hina nai leu thui bo. Nichi ly kai i pri y mei anui y nai paleung, amo theu seu nai paleung hawi sui tlairachi raurei, kai i pri la u vui nai ne.
6 “Hunai deaungkho y Israela pri ai amo leu thui pi; mawichi, mawi aheungchi, tavo micheaungchi hawi leaunghawichi ai, khumi cheng cheaungkhangchi my mei aniu y nai kangji pei nai molam y, sa thai naira angym nai kai, Areng ly khri pa-rei kado theu i, hina nai leu thui pi.
7 Tengpang sahawi i prichi ly kangji nga u ai, nanai sa thai naira angym nai kai, Areng ly vaineng abeu kheng bo.
8 Na i py Israela mawichira y dengkeaung keungchi ly ngam sai angpho ali teang iy, kai i khumi nang Israela chengchi i vui, athaichi athai ai. Nangchi ly kra y nai sala y nangmychi i pri y vawi ai nai nga u ai.
9 Kai ly nangchi ai kang dawn hai iy nangchi mang y asa hai bo. Nangchi ai li hlauchi lop pan hai takengkei iy, amti amjangchi pati hai ai.
10 Nangchi Israela cheng verei y khumi peung hai ai. Nangchi ly marychira y awm u ai i, phra seaungkhrang nai ngiereichi ai py sa palum u teang ai.
11 Kai ly khumi hawi tawnbawichi peung hai ai. Nangchi ly cho chanauchi neangneang sa u ai. Jangni i kamta awm ai nai kang pei ai. Jangni tleaung y nang chawn hai ai. Huna nai khala kai ly Areng ne, nanai nangchi pany u ai.
12 Kai i khumi Israela chengchi awi, kai ly nangchi ai huni pri y awm u ali teang ai nai kang pahawi ai. Huni pri ly nangmychi peang nai pri tatang lawm ai. Naibaly nangchi i cho chanauchi ly mana khala py, kajeu alam u bi ai ny y.
13 “Sa thai naira angym nai kai, Areng my leu pei nai ly khumichi my huni pri ly khumichi ai cha nai pri, huni pri i cho chanauchi ai tama hai nai pri, nanai thui nai ly teng khyp bo.
14 Na i py huni pri ly vai i dengdairei vai mo mang py, khumichi ai cha nai pri, nang i cho chanauchi ai tama hai nai pri lawm bi y leang bo. Hini ly sa thai naira angym nai kai, Areng i thui nai leu ne.
15 Huni pri ly khumi cheng cheaungkhangchi my panui hai nai raawi thai u bi ai ny y; labeaung pi hai nai py niu ali bi ai ny y. Huni pri ai py phra hai bi ai ny y. Hini ly sa thai naira angym nai kai, Areng i pei nai leu ne,” napi.
Israela chengchi i deung kangtha
16 Areng i leu ly kai teng y tym.
17 Mymy ly “Nang khumicho awi, Israela chengchi ly mymychi i pri y awm u nai thym khala, awm nai sai hawi amhi amtlau nai saichi molam y huni pri y chai hai y bo. Nichi i amhi amtlau nai sai ly neampachy leaungrei tlangchai tym nai thym y reita my chai y nai kamta chai y, nanai kadawn.
18 Nichi ly khumichi ai padei iy mynchi hawi huni pri y chai hai y nai deaungkho y, nichi i tlang tleaung y kai i kado theu nai tym hai nai ne.
19 Nichi i sa nai hawi amhi amtlau nai molam y nichi ai pajeng iy, pri tleirei y amprei phro i, pri takhrachira y ahei hai bo.
20 Nichi i tym naira tleirei y khumichi my, ‘Hini khumichi ly Areng i khumichi ne; na i py mymy i pri i nai theu u ai nai tla,’ nanai thui u nai deaungkho y, kai i amyn kachai ly tahm by y na bo.
21 Nichi ly tym naira tleirei y kai i amyn kachai ai tahm khai y nai deaungkho y, kai ly kaimy i amyn molam y paleung hawi y nai ne.
22 Huna nai y Israela chengchi teng y sa thai naira angym nai kai, Areng my leu pei nai ly vai, kai i sa ai tau nai ly nang Israela chengchi i vui ny y; nangchi tym nai pri tleirei y kai i amyn kachai taphra nai molam y sa ai nai teu.
23 Khumichi i mo y nangchi my tahm khai y nai, kai i nang parai nai amyn kachai ly mana tanrei chai mo, nanai khumi cheng cheaungkhangchi teng y kapatei ai. Nichi i mo y kai ly kachai ne, nanai nangchi ai teaung iy pany hai ai. Huna nai khala kai ly Areng ne, nanai nichi pany u ai. Hini ly sa thai naira angym nai kai, Areng i pei nai leu ne.
24 Kai ly nangchi ai pri tlei tleirei i nai pangym achu iy, nangmychi i saleaung khutengra y pahawi ali teang ai.
25 Kai ly nangchi ai tui kachai hawi katheng iy, nangchi i mynchi hawi nangchi ai chai hai y nai ngiereichi ai py chai hai bawibawi ai.
26 Ref 36.26-28: Ezek 11:19,20. Kai ly nangchi ai paleung kangtha hawi ka-dawn kangtha kang pei ai. Nangchi theung i lengseaung kamta tang nai paleung la vui iy, leu tangai nai paleung kang pei ai.
27 Kai i phailo nangchi teng y kang pakun pi iy, nangchi ai kai i reita leaungsaichi patawm hai ai. Kai i leu pei naichi py tangai hai ai.
28 Huna nai khala nangchi ly nangmychi i amsi pajochi teng y awm ai nai nga u ai. Nangchi ly kai i khumichi lawm iy, kai py nangchi i Tameuh lawm ai.
29 Nangchi ai chai hai y nai ngiereichira i nai chai hai vui ai. Tahum takang avum bi y ai nai choh bai palo nang hai ai.
30 Kai ly thengthaichi hawi amti amjangchi thawn hai ai. Hunaibaly khumi cheng cheaungkhangchi theung y nangchi ai tahm phra hai nai tahum takang ly theu hai bi ai ny y.
31 Nangchi ly nangmychi i chai y nai sa nai saichi hawi, sa tamang naichi pany u ali teang ai. Nangmychi i kamngochi hawi, hawi y nairachi molam y nangmychi ai apaso u ai.
32 Israela chengchi awi, kai ly nangchi ai kang dawn hai nai molam y hinichi sa nai ny y, nanai nangchi ai pany hai ai nai ngai. Vai, nangchi i sa nai molam y kangji nga hai ai nai ngai. Hini ly sa thai naira angym nai kai, Areng i pei nai leu ne.”
33 Sa thai naira angym nai Areng my, “Nangchi ai kamngo cheaungkhangra i nai kang pachai nai khala, kai ly nangchi ai nangmychi i marychira y awm teang ai nai pei ai. Phra seaungkhrang naichi ai py, palum ali teang ai nai pei ai.
34 Sahawi mang amki aleaung nai khumichi my niu nai, achachi beng mang nai li hlauchi pachai hai ali teang ai.
35 Vaichi khala teaung ai ngo y nai, daichi ka-vym lawm nai khaileaungchi ly Eden akho lawm bo nanai py, vaichi khala taphra nai hawi tiu naira avum iy phra seaungkhrang nai marychira py, vai ly khaw parai nai tavai amtangrachi sa naimy khumichi awm teang bo, nanai khumi lutengchi my thui u lengleang ai.
36 Huna nai khala Areng ly phra pawn nai marychi sa palum teang iy, khai su nai li hlauchi pachai ali teang bo, nanai deira i tleaung nai tengpang sahawi i khumichi pany u ai. Kai, Areng ly hina naichi sa khyp ai, nanai adeu bo,” napi.
37 Sa thai naira angym nai Areng my, “Kai ly hini tleaung y malawn py sa ai. Israela chengchi ai kai teng y kasabawmra hnei bi ai nai pei ai. Beram kanghu kamta vuikanai peung hai ai.
38 Vaichi khala Jerusalem mary ly pawi kanichira y apathyp nai beramchi hawi kawi mang nai kamta, vai, phra pawn nai marychi ly khumichi hawimy kawi mang na ai. Huna nai khala kai ly Areng ne, nanai nichi pany u ai,” napi.