30
1 Naibaly Areng i leu ly kai teng y tym bi bo.
2 Mymy ly “Nang khumicho awi, sa thai naira angym nai kai, Areng i leu pei nai ai tao pajeng parai naimy thui pi ai nai ly:
Ka-jei awm nai kani ly ang tym ai bo!
3 Areng my bawi la ai nai kani ly kasa bo;
khupanymchi my khiu ai nai kani, khumi cheng cheaungkhangchi patang ai nai kani kasa bo.
4 Aikupta pri y tavai atiu ai.
Ethiopia pri ly ka-jeira avum ai.
Khumi neangneangchi ly Aikupta pri y tleh nai avum u ai.
Huni pri ly lawm nai hawi taphra naira avum ai i,
phra seaungkhrang naimy awm ai.
5 “Tavai keung y Ethiopia pri, Libia pri, Ludia pri, Arabia pri, Kuba prichira i alai nai tavaimichi hawi, kai i khumichi theung i phyrei khumichi dei u ai,” napi.
6 Areng my, “Tosyh mang Mikadol mary i ka-so, tokalawi mang Asavan mary y khrairei, Aikupta pri mang y asa iy amtang nai khumichi ly tavai keung y dei u ai. Aikupta pri my amlyh hai nai tavaimichi py phra pawn ai. Hini ly sa thai naira angym nai kai Areng i pei nai leu ne.
7 Aikupta pri ly khaileaung pri y khumi angso savai tlang keh nai pri lawm iy, huni pri i marychi ly phra bebe ai.
8 Kai ly Aikupta pri ai mai kang hai iy huni pri ai asa hai nai khumi bawibawichi dei nai khala, kai ly Areng ne, nanai nichi pany u ai.
9 Aikupta pri phra nai neng tym nai khala y, kai ly dawndan y naimy awm nai, Ethiopia pri khumichi teng y satang thai hai ai nai samphochi hawi pato ai. Nichi ly jei hyn u ai. Huni kani ly kasa bo!,” napi.
10 Sa thai naira angym nai Areng my, “Kai ly Aikupta pri i nang chawn naichi tama hai ai nai, Babulon samrang Nebukhadnezar ai teaung ai.
11 Ni ly pahyp y naimy ana nai tavaimichi hawi jeu iy, huni pri taphra pawn ai. Nichi ly Aikupta pri y haisau hawi tiu iy, huni pri y khumi veuchi hawi kawi hai ai.
12 Kai ly Naing tavo tui kang hai iy Aikupta pri ai, khumi hawi y naichi i kiu y tym hai ai. Cheng takhra khumichi my ly huni pri verei phra hai ai. Hini ly kai, Areng i pei nai leu ne,” napi.
13 Sa thai naira angym nai Areng my, “Kai ly Nopha mary i mynchi hawi tameuh mynchi taphra pawn ai. Aikupta pri ai peang nai keung leaungrei py awm ai ny y. Kai ly khumi bawibawichi ai jei hyn hai ai.
14 Aikupta pri tokalawi mang y ly khumi angso savai tlang nai lawm hai iy, tosyh mang y awm nai Zoan mary ai mai leng vui ai. Thebe mary pui ai ly pajeng ai.
15 Aikupta pri i amtangra mary napi nai Pelusium mary ai kai i kado theu naira avum hai ai. Thebe mary i nang chawn nai taphra ai.
16 Kai ly Aikupta pri ai mai angveaung hai ai i, Pelusium mary ai py khri pa-rei no patang hai ai. Huni mary i mary apaichi ly panawi pawn ai i, tui my um biu ai.
17 Heliopoli mary hawi Bubasti marychira i thawndeang deaungdichi ly tavai keung y dei iy, khumi takhrachi ai ly langheng y hawi u ai.
18 Aikupta pri i sa thai naira haiho jum hai nai khala, nichi i amlyh am-e nai sorai paleung tama hai ai. Taphan mary ly veng naimy awm ai. Aikupta pri y khupanym my khiu cheng i, mary bawibawichira i khumichi ly langheng y hawi pawn nai avum u ai.
19 Hina nai kamta Aikupta pri ai pajeng nai khala, kai ly Areng ne, nanai nichi pany u ai,” napi.
20 Achi pri pala naira avum nai saneng holai harei saneng angchei lo, lo si kani saryhrei kani y, Areng i leu ly kai teng y tym bo.
21 Mymy ly “Nang khumicho awi, Kai ly Aikupta samrang i kiuban tleu hai vui bo. Hiuchi amtawn teang iy, haisau pa bi pajau ai nai huni kiu ai ly ami my py bam nai, niprawn hawi awi hai pi y leang bo.
22 Huna nai y vai, sa thai naira angym nai kai, Areng my leu pei nai ly kai ly Aikupta samrang i paleung ka-e ne. Ni i kiuban nyhrei khei vui ai. Tleu nai kiu hawi tleu y nai kiu ai py khei ai. Huna nai khala ni kiu i haisau ly tla vui ai.
23 Kai ly Aikupta pri i khumichi ai khumi cheng cheaungkhangchi hawi khaileaung pri meingtym tleirei y ahei hai ai.
24 Hunaibaly Babulon samrang ai atho len hai ai i, ni i kiu y kai i haisau au ai. Na i py Aikupta samrang i kiuban ai ly kakhei vui ai. Ni ly vo tangam naimy mymy i paleung ka-echi i mo y dei ai.
25 Kai ly ni ai jy hai angchi khyp ai i, Babulon samrang ai atho ham hai lawh ai. Kai i haisau ai Babulon samrang i kiu y au iy, ni ly Aikupta pri mang y haisau bo patheung nai khala, kai ly Areng ne, nanai khumi luteng my pany u ai.
26 Kai ly Aikupta pri khumichi ai khumi cheng cheaungkhangchi hawi, khaileaung pri meingtym tleirei y ahei hai vui ai. Huna nai khala kai ly Areng ne, nanai nichi my pany u ai,” napi.