24
Ei cha nai kheupaja laawm
1 Achi pri pala naira avum nai takawrei saneng, lo horei, lo si kani horei kani y Areng i leu ly kai teng y tym nai ne.
2 Ref 24:2 2 Areng 25:1; Jer 52:4. Mymy ly “Nang khumicho awi, vaini i kani y tajiu typ ba; ati mana nai mo na baly hini kani ly Babulon samrang my Jerusalem mary ai katanmeuh nai amteaung nai kani ne nai deaungkho y ne.
3 Atiu reng nai kai i khumichi teng y, nichi i vui sa thai naira angym nai kai, Areng my pata nai leu thui pi nai amti pi; huni pata nai leu ly:
laawm ai maithu salo y pateang iy
tui sa chum baly
4 nganbawi hawi keh naichi ai laawm theung y thiu;
paleang hawi phaichira i hawi keh nai bawi kahawichi ai py
laawm kawi pa-rei thiu teang ba.
5 Veung hawi keh nai beram mawichi naini theaung ba;
laawm anui mang theng tei ly
tui kado hai thluthlu iy
hiu hawi nganbawichi byh ba,” napi.
6 Sa thai naira angym nai Areng my leu pei nai ly “Khumi ai padei naichi i mary ly taham si! Huni ai ly mana khala py kachi vai y naimy khai nai deaungkho y, eicha nai laawm hawi atawm. Laawm theung i mawi akawichi ai akawi akawirei takhyh ly laawm theung y by y pa-rei takhyh.
7 Huni mary theung y khumi ai padei nai kahm awm; na i py thi ly khaileaung y beu y, chaipyn nai lengseaung bailang salo y beu nai deaungkho y, spryh hawi taphum ai nai ngo y.
8 Huni thi my kado theu hai iy vawitheung tha ai nai molam y, huni thi ai taphum thai y nai meingtym y beu hai nai ne,” napi.
9 Naibaly sa thai naira angym nai Areng my leu pei nai ly “Khumi ai padei naichi i mary ly taham si! Kaimy thengchi tei ai.
10 Thengchi jeu hai bi rai! Mai angveaung ai nai ho pi! Ngan bawichi theaung ly kamui kalangchi thiu iy byh hang tie pa-rei theaung! Hiuchi ly mai y veang pawn veng!
11 Naibaly kheupaja laawm ka-keu angngo jo na pa-rei mai-ai tleaung y khai. Hunaibaly kakhawi kaeng ai ly mai my kang pyn ai i, laawm ly reita leaungsai kamta kachai lawm teang ai.
12 Na i py laawm kakhawi kaeng bawibawi ly mai kangveaung y kang pyn ai ny y.
13 Aw Jerusalem mary, nang ly kaja hawi y nai molam y, nangmy ai chai hai y bo. Kai ly nang ai chai pa-rei sa teu i py, nang ly chai y naimy awm nai ne. Kai i kado katheu pajeng naira avum y ryrei ly nang ly chai lawh ai ny y.
14 Hini ly Areng i leu pei nai ne. Kaimy pajeng ai nai neng ly tym bo. Kai ly nang i kamngochi khen teu ai ny y, kang pahen ai ny y, kang tamen ai ny y. Nangmy i sa nai molam y kamngo pajeng naira avum ai,” napi. Hini ly sa thai naira angym nai Areng i leu pei nai ne.
15 Areng i leu ly kai teng y tym.
16 Mymy ly “Nang khumicho awi, nang i khrei keh nai khumi ai tlenrei khyhmy kang la pi vui ai. Nang ly vo tangam ai nai ngo y ai, meikatui tla ai nai py ngo y ai.
17 Nang i vo sang-eng nai katyn khumichi thai moh sy; paleung si nai meimai amteng nai lupeu ajeng y nai hawi, phainai amchiu y naimy tako moh. Nang i meimai tamym moh. Paleungsi paleung mawn nai khumichi cha nai teicha teinei py cho moh,” napi.
18 Kai ly khawn mang y khumichi hawi leu arum nai ne. Huni kani dym mang y kai i aju ly dei teu i py, khawn mang y kai ly mymy i leu pei nai kamta kasa bo.
19 Khumichi my, “Nang ly ati mana nai y hina nai sa lawh mo?,” nanai kai teng y deng u nai ne.
20 Hunai deaungkho y kai my, “Kai teng y Areng i leu tym,
21 mymy ly mymy i leu pei nai ai nangchi Israela chengchi teng y thui pi ai nai kai ai pato nai ne. Nangchi ly Achura yhm khaw nai ai amlyh u bo. Achura yhm khen ai nai ngai, Achura yhm y chei ai nai ngai; na i py Areng ly huni Achura yhm y chai hai y ai. Jerusalem mary y awm rai nai nangchi i yhm dengtheung cho chanauchi py, tavai keung y dei u ai.
22 Huna nai khala nangchi ly kai i sa nai kamta sa u ai. Nangmychi i meimaichi py atamym u ai ny y. Paleungsi paleung mawn nai khumichi ly teicha teinei cha u ai ny y.
23 Nangchi ly lupeu ajeng y nai hawi phainai amchiu y naimy tako u ai ny y, paleung si vo tangam u ai ny y. Amymychi i kamngo molam y nangchi ly veung jei iy, leaung leaungrei mo y tangam u ai.
24 Huna nai khala kai ly nangchi i vui rengrang ka-ma-ra lawm iy, nangchi ly kai i sa nai sai ngiereichi sa u ai. Huna nai thym khala mymy ly Areng ne, nanai nangchi pany u ai nai mymy ly leu pei nai ne,” napi.
25 Areng my, “Nang khumicho awi, vai kai ly nichi i amlyh ai naira, paleung amo theu ai naira lawm nai khaw parai nai Achura yhm ai nyn kava vui ai. Nichi ly huni Achura yhm khen ai nai hawi, huni Achura yhm mang y chei ai nai ngai u bo. Nichi i cho chanauchi ai py la pi vui ai.
26 Huna nai kai sa nai kani y, dei naira i nai law tleaung nai khumi leaungrei ly atiti tym nai leaungsaichi ai nang teng y jeu iy ang thui pi ai.
27 Huni kani y my nang i labeaung py am-eaung iy, huni khumi hawi leu arum pajau ai, awm pypy ai ny y leang bo. Huna nai kamta nang ly khumichi i vui rengrang ka-ma-ra lawm ai. Kai ly Areng ne, nanai py nichi pany u ai,”napi.