19
1 Israela samrang i chapo leaung nyhrei i vui vo tangam nai khulym ly anui mang i kamta thui ai nai Areng my kai ai leu pei nai ne.
2 Ngamhm ly khrangsinu atawm khyp!
Ni ly chengthli nai khrangsi kataichi theung y
mymy i chochi ai len pa-rei pacho iy kry bo.
3 Amso mawichi kei kawp thai ai nai patiu pi nai deaungkho y,
khrangsi cho ly len ryh i, khumi ngan cha nai khrangsi lawm bo.
4 Khumi cheng cheaungkhangchi ly ni i satang thai nai khala,
hum tai i patiu chum baly nodo tai iy,
Aikupta pri mang y pahawi jo bo.
5 Khrangsinu ly my i athang khai naira by y veng bo, nanai pany nai khala,
takhra khrangsi cho harei ai len pa-rei pacho bi bo.
Huni khrangsi cho py ka-jei awm nai khrangsi lawm teang.
6 Ni ly tleaungri acheang iy atho awm nai khala,
takhra khrangsichi hawi vanrei teicha hau ai nai amki naimy,
amso mawi kei kawp ai nai amtiu iy, khumi ngan cha nai khrangsi lawm teang.
7 Ni ly amtangrachi panawi iy marychi taphra bo.
Ni my hang nai tleirei y khumi mipuichi ly
jei hyn naimy kaso theu u nai ne.
8 Huna nai khala y ni i tengpang sahawi meingtym tleirei i,
khumi cheng cheaungkhangchi ly ni ai tiu ai nai akachu u.
Ni ai pypui hawi patym iy
hum angawm theung y patiu u bo.
9 Naibaly ni ai tamo leangkhawn hawi ryh iy
paeungra theung y khai i, Babulon samrang teng y syn u bo.
Israela mawichi salo y ni i hang nai katyn ly
vai mo mang y mana khala py thai bi y ai nai
tamcheaung khai iy theaung y paeung bo.
10 Ngamhm ly tavo micheaung sahawi y ui nai
kreip keung hawi atawm.
Tui bym pa-rei nga nai deaungkho y
huni keung ly ngam hawi athaichi pasu nai ne.
11 Changpichi ly tangkhryh nai deaungkho y
areng cheaungvawi palawn ai nai nga.
Kreip keung ly khupanym y khrairei lo bo.
Huni keung i asang nai ly ngam changpichi veng-u nanai ai, khumichi my niu nai ne.
12 Na i py huni kreip keung ly kado theu nai khumichi my
tangjyn akheaung na pa-rei akyn vui i, khaileaung y atlym vui bo.
Nisi ali deaungkho y kreip athaichi jei pawn bo.
Kreip changpichi py dei i,
mai y kang nai avum bo.
13 Vai ly huni keung ai jengha iy
tui by y nai daichi ka-vymra y ui bo.
14 Huni keung i keungma y mai my kang nai deaungkho y,
changpi hawi athaichi py kang teang.
Huni keung i changpichi ly mana khala py tangkhryh teang y leang bo.
Mana khala py areng cheaungvawi lawm ai ny y leang bo.
Hini ly vo tangam nai khulym ne; huni vo tangam nai khulym ai avaw avawrei thui u ai nai tla.