12
1 Areng i leu ly kai teng y tym.
2 Ref 12.2: Is 6:9,10; Jer 5:21; Mk 8:18. Mymy ly “Nang khumicho awi, nang ly atiu ham nai khumi cheng theung y awm nai ne. Nichi ly mei awm i py ati sai py niu u y, kano awm i py ati sai py thai u y. Ati mana nai mo na baly nichi ly atiu ham naichi ne nai deaungkho y ne.
3 “Nang khumicho awi, vai nang ly ngari patang nai khumi leaungrei kamta, nangmy i vawnsaichi tapau iy kani thuntang y theu ba. Nang ly huna nai meingtym takhra y chei jo nai ly khumi luteng my niu sy. Atiu ham nai khumichi py, nang i theu nai ai dawn pany tan pany thai lym ai.
4 Nichi niu pajau nai kani thuntang y my, nang ly langheng hawi nai leaungsai ka-tawm vawnsai angpau angvei ly dym mang y nichi i mei ka-niu y langheng hawi nai khumi amlawn iy theu.
5 Nichi mei ka-niu y my nang ly nangmy i yhm angpang ateng vau iy, huni kho mang nang i vawnsai angpau theu hai.
6 Huni vawnsai angpau ai paleang tleaung y atheng nai py, nangmy i chei ai nai lam niu thai y ai nai meimai atleang iy kaveng theung y theu nai py, nichi niu u sy. Nang i sa nai leaungsai ly Israela chengchi i vui pany hai nai ka-ma-ra lawm ai,” napi.
7 Kai ly Areng i leu pei nai kamta kasa khyp nai ne. Huni kani y ngari kamtang leaungrei ka-tawm kai ly vawnsai angpau angvei iy, dym mang veng-en nai khala y yhm angpang ka-teng vau i, nichi i mei ka-niu y vawnsai angpau paleang tleaung y ka-theng naimy theu vui bo.
8 Kani pa-nyh khawn y Areng i leu ly kai teng y tym.
9 Mymy ly “Nang khumicho awi, atiu ham nai Israela chengchi my vai, nang ly ati sa mo, nanai ang deng u lengleang bo i,
10 nichi teng y sa thai naira angym nai kai, Areng my ati mana leu pei mo, nanai thui pi. Hini leu pei nai ly Jerusalem mary y peang nai samrang hawi, huni mary y awm nai khumi bawibawichi i vui ne.
11 Nang i sa nai leaungsaichi ly nichi teng y tym ai nai pany hai yb nai ka-ma-ra ne i, nichi ly ngari patang nai khumichi, langheng y hawi nai khumichi lawm u ai, nanai thui pi.
12 Nichi ai peang nai samrang ly vum aneng y, mymy i vawnsai angpau ai paleang tleaung atleang iy khumichi my apai kho sa pi nai mang preang ai nai tla ai. My i mei atleang khyp nai deaungkho y mymy i preang nai lam niu ai ny y.
13 Ref 12:13: 2 Areng 25:7; Jer 52:11* Na i py kai ly py kajang iy huni py ra man hai i, Babulon mary mang y kahawi vui ai. Ni ly huni mary ai niu y naimy, huni mary y dei ai.
14 Kai ly ni i samrang bangtangchi, tau pei nai keungchi hawi tamcheaung risachi ai, meingtym tleirei y ahei hai pawn ai. Khumichi ly nichi ai haisau hawi tleh ai nai hau u ai.
15 “Kai ly nichi ai pri tleirei hawi khumi cheng cheaungkhangchi theung y ahei hai nai khala, nichi my kai ly Areng ne, nanai pany u ai.
16 Nichi theung i khumi maidenreichi ai ly tavai takai y, tahum takang y hawi no kanghawichira i nai kapaheng ai. Huna khala y naini khumi cheng cheaungkhangchi theung y tym nai khumichi ly mymychi i sa nai leaungsaichi ly amso ngai hawi nai ne, nanai pany u vau iy, kai ly Areng ne, nanai py pany u ai”, napi.
17 Areng i leu ly kai teng y tym.
18 Mymy ly “Nang khumicho awi, nang ly kaso theu naimy teicha teinei cho ly jei hyn naimy tui py nei.
19 Sa thai naira awm nai Areng my pei nai hini leu ai ly Israela pri Jerusalem mary y vai, awm u rai nai khumichi i vui ne, nanai thui pi. Huni khumichi ly kaso theu naimy teicha teinei cha u ai nai tla ai i, jei hyn naimy tui py nei u ai nai tla ai. Khumi luteng ly reita leu ai pipi dawn y nai deaungkho y, nichi i pri ai khumi angso savai tlang nai lawm hai ai.
20 Khumi angso bi-ai nai mary puichi ai kataphra ai i, pri verei y khumi angso savai tlang nai daichi ka-vym lawm hai ai. Huna nai khala kai ly Areng ne, nanai nichi pany u ai,” napi.
21 Areng i leu ly kai teng y tym.
22 Mymy ly “Nang khumicho awi, ati mana nai y Israela chengchi ly ‘Neng-tu naini khei jo iy leu pei naichi ly amcheang hai y,’ nanai thui achih nai leu ai avaw avawrei thui u tamyhtyh nai mo?
23 Huni thui achi nai leu molam y sa thai naira angym nai kai Areng my ati mana leu pei mo, nanai nichi teng y vaimy thui pi. Kai ly huni thui achi nai leu ai tama hai ai. Israela pri y mana khala py huni ly teaung u ali bi ai ny y. Neng ang tym dudu bo i, leu pei naichi ly ang tym ai bo!, nanai nichi teng y thui pi.
24 Israela chengchi theung y ka-chawi naimy paleung mei y niu naichi hawi, teng y nai amo leu pei naichi tym bi ai ny y.
25 Kai, Areng my nichi teng y leu pei nai kamta sa khyp ai nai tla ai, kra ai ny y. Nangchi atiu ham naichi awi, nangchi ai kaimy pany hai nai kamta ly nangchi heng nai deung y my kang sa ai. Hini ly kai i thui nai leu ne,” nanai sa thai naira awm nai Areng my leu pei bo.
26 Areng i leu pei nai ly kai teng y tym;
27 “Nang khumicho awi, Israela chengchi my nang i paleung mei y niu naichi hawi, nang i amo leuchi ly palo parai nai mo mang i vui teu, nanai athang khai u bo.
28 Hunai deaungkho y kra ai ny y leang bo. Kai i thui pi nai kamta tym ai, nanai sa thai naira awm nai kai, Areng my leu pei chum veng bo!, nanai huni khumichi teng y thui pi. Hini ly sa thai naira angym nai kai, Areng i thui nai leu ne,” napi.