8
Amtym ai nai pri kahawi
1 Areng my nangchi i amsi pajochi teng y pei ai adeu nai pri peang iy peung naimy heng u thai ai nai, vaini nangchi teng y kang pei nai reita bawibawichi ai ka-ym awm naimy atyp u.
2 Nangchi i Areng Tameuh ly law veng nai saneng vui palyhrei sala, nangchi ai pahawi iy daichi ka-vym tako hai prei bo. Huni thym khala nangchi ly reita leu pei naichi patawm ai nai ngai mo, ngai y mo, nanai cham ai nai nangchi teng y ngari kamtang cheaungkhang tym hai nai ly pany u.
3 Mymy ly nangchi ai kajeu kanglam ang khai. Naibaly nangchi hawi nangchi i amsi pajochi cho vai y nai Manna tako ang pacho. Huna nai molam y khumi ly teicha cha naira y heng nai ny y leang, Areng i leu y naini heng ai khyh, nanai nangchi ai kang thui pi nai ne.Ref 8.3: Mt 4:4; Lk 4:4
4 Huni saneng vui palyhrei sala y nangchi i baichu ateaungchi mawn vai y, nangchi i kheuchi py bau vai y.
5 Ampo ly mymy i cho chanauchi ai parip nai kamta, nangchi i Areng Tameuh my nangchi ai parip nai ly pany u jo ba.
6 Hunai deaungkho y nangchi ai Areng my leu pei nai kamta tangai u; mymy i reita leu pei naichi tangai iy mymy ai tahm khai u.
7 Nangchi i Areng Tameuh ly nangchi ai paitiu khuta hawi nai pri mang y pahawi nai ne. Huni pri i leaunghawi hawi, mawi aheungchira y tavochi, micheaungchi, khaileaung theung i tuino achawn hai bo.
8 Huni pri i chohpui, chamaw, kreip athai, thaidu athai, thengsi athai, olive athai hawi khawihangchi theu nai ne.
9 Huni pri y teicha teinei avaw by ai ny y. Ati sai py ngai nai awm ai ny y. Lengseaung mang tamo py, mawi aheungchi mang kheupaja kamsen py, tai baly nga ai.
10 Nangchi ly teicha teinei kajeu kawi pa-rei cha ai nai nga nai deaungkho y, paitiu khuta hawi nai pri ang pei nai nangchi i Areng Tameuh ai palo u ai.
Areng ai tami y ai nai pany hai nai
11 “Nangchi i Areng Tameuh ai tami y ai nai dawn patyp u; vaini nangchi teng y kang pei nai mymy i reitachi patawm ai nai tami u moh.
12 Nangchi kajeu kawi pa-rei cha iy yhm hlau kahawichi sa naimy awm ai nai nga u nai khala,
13 nangchi i sichi hawi beramchi, muku, tangka hawi yhmtheaung katuichi nang chawn nai khala py,
14 nangchi ly amlyh am-e iy Aikupta pri miseaungra i nai atleu pi nai keung, nangchi i Areng Tameuh ai tami y ai nai dawn u.
15 Mymy ly nangchi ai pavui kangso hawi kani taaichi peung iy, kau parai nai hawi ka-jei awm nai daichi ka-vym jeungrei pahawi prei nai ne. Khaileaung jengha iy tui by y nai meingtym y, mymy ly lengseaung pui mang tui theu hai bo.
16 Daichi ka-vym theung y nangchi i amsi pajochi cho vai y nai Manna tako ang pacho bo. Mymy ly kangkhym y nangchi amtheaungra nga u ai nai molam y, nangchi ai ngari kamtang avum hai bo. Huna nai ngari kamtang avum hai nai ly nangchi ai cham nai ne. Ref 8.11-16: Hos 13:5-6
17 Hunai deaungkho y nangchi i sa thai naira hawi yhmtheaung katuichi nang nai ne, nanai athang khai u moh.
18 Nangchi i Areng Tameuh my pei nai sa thai naira y naini yhmtheaung katuichi nang nai tei, nanai pany u. Huna nai sa thai naira ang pei nai ly mymy ly nangchi i amsi pajochi hawi asa nai leu Maikawm ai vaini khrairei, khaw hai nai deaungkho y ne.
19 Nangchi i Areng Tameuh ai tami vui iy, tameuh takhrachi ai chiu u moh. Huna nai sa lawh baly nangchi ly phra takengkei ai, nanai nangchi teng y vaini kang pany hai nai bo.
20 Nangchi ly Areng i leu tangai u y lawh baly, nangchi tako nai khala nangchi ai paka nai khumichi ai Areng my tama hai nai kamta ly nangchi ai py tama hai ai.