6
Leu pei nai kalen
1 “Hini ly nangchi ai patiu pi ai nai nangchi i Areng Tameuh my kai tang y ang pei nai reita leu pei nai bawibawichi ne. Nangchi peang ai nai pri y hini reitachi tangai iy patawm u.
2 Nangchi hawi nangchi i kangpreangchi ly heng nai sala ryrei, nangchi i Areng Tameuh ai tahm khai ai nai tla. Nangchi ly huni pri y awm jojo pajau ai nai kaimy kang pei nai reita leu bawibawichi tangai iy patawm u.
3 Aw Israela khumichi awi, huni reitachi tangai u ly patawm u! Huna nai sa baly amsi pajochi i Areng Tameuh my adeu nai kamta, nangchi ly nang chawn iy haiho len nai khumi cheng lawm ai; paitiu khuta hawi nai pri y awm ai nai nga u ai.
4 “Aw Israela chengchi awi! Areng naini achi i Areng Tameuh ne, nanai tami u moh.note 6:4Areng ... achi i Tameuh; ti y baly achi i Areng Tameuh; ti y baly achi i Areng Tameuh ly harei khyh. \x*Ref 6.4: Mk 12:29.
5 Nangchi i Areng Tameuh ai ly nangchi i paleung verei hawi, nangchi i phailo verei hawi, nangchi i atho bawibawi hawi tamen ai nai tla.Ref 6.5: Mt 22:37; Mk 12:30; Lk 10:27.
6 Vaini nangchi teng y kang pei nai reitachi ly mana khala py tami u moh.Ref 6.6-9: Leu 11:18-20.
7 Huni reitachi ly nangmychi i cho chanauchi teng y patiu pi ai nai tla. Nangchi yhm y awn nai khala py, khuleaung keung py, anawn khala py, kalop sa nai khala py, huni reitachi avaw avawrei dawn ryhpatyh jo ai nai tla.
8 Nangchi ly huni leu reitachi pany jo ai nai, nangmychi i kiubanra py, lu katira py akawm u ai nai tla.
9 Nangmychi i yhm katheu laibeaungchira py, apai pa-kho lukauchira py tajiu ai nai tla.
Leu pei nai tangai ai nai
10 “Nangchi i Areng Tameuh ly nangchi i amsi pajo Abraham, Isaka hawi Jakob teng y adeu nai kamta, nangmychi my palum pacheang y nai sareaung hawi nai mary puichi, nangchi teng y ang pei ai.
11 Nangchi pateung achu y naimy yhmtheaung kahawichi angym nai yhmchi py, nangmychi tai y nai tuikanchi py, nangmychi ui y nai kreip akhochi hawi olive akhochi py, nangchi amtym u ai. Areng my nangchi ai pahawi nai huni pri y tym iy, nangchi kajeu kawi pa-rei cha ai nai nga u nai khala,
12 Aikupta pri miseaung i nai nangchi ai atleu nai keung Areng ai tami y ai nai dawn u jo.
13 Nangchi i Areng Tameuh ai tahm khai u ly mymy ai phai chiu u; mymy i amyn y naini tau iy vaineng adeu u.Ref 6.13: Mt 4:10, Lk 4:8
14 Tameuh takhrachi ai chiu u moh. Nangchi tengpang sahawi y awm nai khumichi i tameuhchi ai py chiu u moh.
15 Nangchi hawi vanrei awm nai nangchi i Areng Tameuh ly tameuh takhrachi ai niu ngai y nai Tameuh ne. Hunai deaungkho y nangchi ly tameuh takhrachi ai chiu lawh baly, kado theu naira ly mai kamta angveaung iy, nangchi bawibawi ai tama hai be ai.
16 Nangchi ly Massah meingtym y sa nai kamta ly nangchi i Areng Tameuh ai ly cham u moh.Ref 6.16: Theu 17:1-7, Mt 4:7 Lk 4:12
17 Mymy i nangchi teng y reita leu pei nai bawibawichi ai nangchi ly tangai iy hawihai patawm u.
18 Nangchi ly Areng i mo y kateng hawi kahawichi sa baly, atitira py eaung ai. Nangchi i amsi pajochi teng y Areng my adeu nai pa-tiu khuta hawi nai pri ai peang u pajau ai.
19 Mymy i adeu nai kamta, nangchi i paleung ka-echi ai py ang patheu pi pawn vui ai.
20 “Vai mo mang y nangchi i cho chanauchi ly nangchi teng y, ‘Achi i Areng Tameuh my hini reitachi tangai ai nai, ati mana nai deaungkho y pei mo?,’ nanai ang deng u baly,
21 nichi teng y, ‘Achi ly Aikupta samrang teng y miseaung achei nai thym khala, Areng my sa thai naira len parai nai hawimy achi ai atleu pi bo.
22 Mymy ly Aikupta chengchi teng py, nichi i samrang hawi bangtang bawibawichi teng py, rengrang ka-ma-rachi patei iy ka-jei awm nai patangrachi tym hai nai sai amychi i mei y niu u bo.
23 Achi i amsi pajochi teng y adeu nai kamta, achi ai Aikupta chengchi teng i nai law tleaung hai iy, hini pri y awm ai nai ang pahawi nai ne.
24 Naibaly achi i Areng Tameuh ly reita bawibawichi patawm ai nai hawi mymy ai tahm khai ai nai py leu pei nai ne.
25 Achi ly hunai kamta patawm baly mymy ly achi i pri ai kry iy, paitiu khuta hawi hai ai. Achi ly Tameuh i leu pei nai ngiereichi ai hawihai palai patawm baly, Areng ly achi ai ang kawn ai,’ napi.