3
Israela chengchi my samrang Oka ai pajau nai
(Kati 21:31-35)
1 “Hunaibaly achi ly tosyh ngan mang y awm nai Bashan pri mang y asyh u bo. Huna nai khala Bashan samrang Oka ly my i tavaimi bawibawichi hawi achi ai tiu ai nai Edrei mary sahawi y tym u nai ne.
2 Na i py Areng my kai teng y, “Ni ai jei u moh. Kai ly ni ai py, ni i khumi bawibawichi ai py, ni i pri ai py, nang teng y kang pei ai. Nang ly Hesabon mary y peang nai Amori samrang Sihon ai tiu nai kamta, ni ai py tiu teang,’ ang napi.”
3 “Hunai deaungkho y Areng ly samrang Oka hawi ni i khumichi ai py, achi teng y ang pei ai i, achi ly leaungrei py tleaung y pa-rei tleh chauchau bo.
4 Huna nai khala my achi ly ni i peang nai mary ngiereichi ai peang vui nai ne. Achi my peang y nai mary harei py by y. Achi my mary vui tariurei, Bashan samrang Oka i peang nai meingtym Arkoba pri verei nga vui nai ne.
5 Huni mary bawibawichi ly apai ka-sang, apai katheu pa-khochi hawi apai katheu pa-kho lengteaungchi awm nai deaungkho y, khaw parai nai marychi ne. Apai by y nai avangchi py neangneang awm.
6 Achi ly Hesabon samrang Sihon i peang nai marychi hawi, mary i khumichi ai tamyh pawn nai kamta, samrang Oka i peang nai mary bawibawichi ai taphra vui iy, neampacho, neampachy hawi cho deaungdi bawibawichi ai py tleh pawn bo.
7 Tawnbawichi hawi marychi theung i vawnsaichi py la pi pawn vui bo.
8 “Hunai deaungkho y huni neng y achi ly Arnon tavo dengdai Heramon mawi khrairei kau nai Jordan tavo nisi mang i khu ly huni Amori i samrang leaung nyhrei teng i nga vui bo.
9 (Heramon mawi ai ly Sidon chengchi my Sirion, nanai palau, Amori chengchi my ly Senira, nanai palau.)
10 Achi ly Bashan samrang Oka i peang nai adym angdengra i marychi py, nisi mang i Salekah mary hawi Edrei marychi khrairei kau nai Kilead pri hawi Bashan pri bawibawi ai py peang vui nai ne.
11 (Samrang Oka ly tleungtlang len nai Rephaim theaung theung i, kangkhym keh nai samrang ne. Ni i veu khai nai tlangnote 3:11 tlang; ti y baly tlaiveu khaira. ly lengseaungnote 3:11 lengseaung; ti y baly tamo ngan.hawi sa nai ne i, kasau miu takawrei vi, ka-kalen ly miu palyhrei awm. Huni samrang i tlang ly Ammon khumichi i Rabah mary vaini khrairei niu pajau nai ne.)
Jordan tavo nisi mang y awm nai theaungchi
(Kati 32:1-42)
12 “Achi ly hini pri ai peang nai thym khala, Arnon tavo sahawi i Aroer mary dengdairei, Kilead mawitleaung pri phyrei hawi, hu i mary ai Ruben theaung hawi Kad theaungchi teng y kaimy phy pi bo.
13 Kilead pri phyrei hawi samrang Oka i peang nai Bashan pri verei napi nai Arkoba pri verei ai, Manase theaung ka-hyhreichi teng y kaimy phy pi bo,” napi.
(Bashan pri verei ai Rephaim khumichi i pri, nanai py palau.
14 Manase theaung i Ja-ira ly keshura hawi Makah khujyh khrairei kau nai Bashan pri, napi nai Arkoba pri verei peang vui nai ne. Ni ly avangchi ai my i amyn pathi i, vai khrairei Ja-ira avangchi, nanai amyn lo bo.)
15 Manase theaung i Makhira nupaichi teng y Kilead mary phy paji pi nai ne.
16 Ruben hawi Kad theaungchi teng y Kilead mary dengdai Arnon tavo khrairei khu ka-peang phy pi. Huni tavo umtang jeungrei ly nichi i tokalawi khujyh kamtleh ne i, Ammon pri khu ka-peang phyrei i, Jabbok tavo ly nichi i tosyh khujyh kamtleh ne.
17 Nichi i khu ka-peang ly nidym mang Jordan tavo tym pa-rei, tosyh mang Kalili ang tym pa-rei, tokalawi mang pangli kadei tym pa-rei, nisi mang Piska mawi kheutang y tym pa-rei kau nai ne.
18 “Huna nai khala my, kai ly nichi teng y leu pei nai ly: ‘Achi i Areng Tameuh ly Jordan tavo nisi mang y awm nai hini pri nangchi ai peang hai bo. Vai nangchi i tavaimichi ai tavai ateaungchi amthyp hai. Takhra Israela theaungchi i vui khu ka-peang nga ai nai molam, kasabawm tavaimichi ai Jordan tavo angpeang hai man ai nai tla.
19 Kaimy ka-vo khai nai marychira y nangmychi i aju chanauchi hawi tawnbawichi ai naini khai ai nai tla. Nangchi ly tawnbawi neangneang awm, nanai kai pany.
20 Areng my nangchi ai tlamsa naimy awm ai nai pei nai kamta, takhra Israela theaungchi teng y nidym mang i khu ka-peang vui iy, tlamsa naimy awm ai nai nga nai pa-rei, nangchi ly nichi ai sabawm ai nai tla. Huni bo y nangchi ly kaimy phy pi nai pri y vawi u teang ai nai tla,’ kang napi bo.Ref 3.18-20: Josua 1:12-15
21 “Naibaly kai my Josua teng y leu pei nai ly: ‘Nang i Areng Tameuh ly Sihon hawi Oka samrang leaung nyhrei ai tiu nai kapany nai ne. Mymy ly nangmy tiu nai pri i samrangchi ai py, huna nai kamta sa teang ai.
22 Nangchi i Areng Tameuh ly nang mang y asa hai nai deaungkho y, nichi ai jei moh,’ nanai thui pi bo.
Mosi ai Kanan pri kun ai nai pei y nai
23 “Huni neng khala kai ly paleung hawi vereimy chiu sa nai ly
24 “Sa thai naira awm nai Areng awi, nang i sa ai nai nang parai iy lyh ai hawi naichi ly kai ai pany huihai nai ryrei patei kyh ba. Kani mang py, khaileaung mang py nang ka-tawm nang parai nai Tameuh by y leang!
25 Aw Areng, kai ai Jordan tavo angpeang ai nai pei kyh ly humang vai i paitiu khuta hawi nai pri ai py, apu parai nai mawitleaung pri hawi Lebanon mawichi ai py niu ai nai pei kyh,’ nanai takeng bo.
26 “Na i py nangchi molam y Areng ly kai ai kado ang theu hai i, kai i takeng nai py tangai pi y. Areng my, ‘Hnei bi moh! Hini molam takeng bi moh!
27 Nang ly Piska mawi saleung y lyn iy nidym, nisi, tosyh, tokalawichi mang y khen angdeang cham. Nang ly Jordan tavo angpeang ai nai ngo y nai deaungkho y, nang i niu nai ngierei hawihai palai khen. Ref 3.23-27: Kati 27:12-14; Leu 32:48-52
28 Nang ly Josua teng y kalop au ba; ni ly hini khumichi ai lu sa ai. Nang i niu nai pri mang y angpeang iy peang ai nai deaungkho y, ni ai atho pei, ni ai ham hai,’ nanai kai ai leu ang pei,’’
29 “Hunai deaungkho y achi ly Bethpeora mary kangka i leaunghawira tai u nai ne.”