27
Lengseaungchira tajiu nai Tameuh i Reitachi
1 Naibaly Mosi hawi Israela cheng lu sa nai keungchi my khumi mipuichi teng y, “Vaini nangchi teng y kaimy pacheang nai bawibawichi tangai u.
2 Jordan tavo angpeang chum baly nangchi i Areng Tameuh my pei nai pri y tym u nai kani y lengseaung puichi leng iy, angkadeng pajui u.Ref 27.2-8: Josua 8:30-32
3 Huni lengseaung puichira y hini reitachi hawi amtiu nai ngiereichi tajiu ai nai tla. Nangchi i amsi pajochi i Areng Tameuh my adeu nai kamta, paitiu khuta hawi nai pri y tym u nai khala,
4 Vaini kaimy nangchi teng y leu kang pei nai kamta, Jordan tavo vai mang y tym baly Ebal mawi saleung y, hini lengseaung puichi leng iy angkadeng pajui ai nai tla.
5 Tamo hawi si nai lengseaung ny y naimy, lengseaung hawi maicham so u,Ref 27.5-6: Theu 20:25
6 ati mana nai mo na baly nangchi i Areng Tameuh i vui maicham ly khawi y nai lengseaung hawi sa ai nai tla. Huni maicham salo y leng patlum nai kapathyprachi talam ai nai tla.
7 Amkawm nai kapathypra py talam ai nai tla. Nangchi i Areng Tameuh i mo y kawn naimy cho u.
8 Angkadeng pajui nai lengseaungchi tleaung y, Tameuh i reita leu pei nai bawibawichi hawihai palai tajiu u typ,” napi.
9 Naibaly Mosi my Levi theaung pathyp pi nai keungchi hawi vanrei Israela cheng bawibawichi teng y, “Israela chengchi awi, kai i thui nai ngiereichi ai dawn patyp iy, tangai u. Vaini nangchi ly nangmychi i Areng Tameuh i khumi lawm u bo;
10 hunai deaungkho y mymy i leu tangai iy, vaini nangchi teng y kaimy pei nai reita leu bawibawichi tangai iy patawm u,” napi.
Leu tangai y nai y amsawi lawi nai
11 Naibaly Mosi my Israela chengchi teng,
12 “Nangchi Jordan tavo angpeang chum nai bo y, khumichi teng y amtheaung nai leu pei nai khala, Simeon, Levi, Juda, Isakar, Josepha hawi Benjamin theaungchi ly Kerizim mawi saleung y angdo u ai nai tla.Ref 27.12: Leu 11:29; Josua 8:33-35
13 Naibaly amsawi pasawi nai khala: Ruben, Kad, Aser, Zebulun, Dan hawi Naphtali theaungchi ly Ebal mawi saleung y angdo u ai nai tla.
14 Levi theaungchi ly tao pajeng parai naimy,
15 “Lengseaung, dengkeaung, tamo hawi mynchi sa iy, hunichi ai ka-vym y chiu nai khumichi ly Tameuh teng i amsawi lawi ai. Areng ly myn chiu nai ai paso nai ne,’ nanai vaineng tauh nai khala,
“Khumi bawi bawichi my ‘Amen!’ nanai pathang u sy.Ref 27.15: Theu 20:4, 34:17, Lev 19:4, 26:1, Leu 4:15-18; 5:8
16 “ ‘Amhm, ti y baly ampo ai tahm khai y nai khumi ly Tameuh i amsawi lawi sy,’ nanai vaineng tauh nai khala,
khumi bawibawichi my ‘Amen!’ nanai pathang u sy.Ref 27.16: Theu 20:12, Leu 5:16
17 “Israela cheng tengtawi i khaileaung khujyh leungcheng kasyh vui nai khumi ly Tameuh i amsawi lawi sy,’ nanai vaineng tauh nai khala,
“Khumi bawibawichi my ‘Amen!’ nanai pathang u sy.Ref 27.17: Leu 19:14
18 “Mei kamju leaungrei ai lam tamang hai nai khumi ly Tameuh i amsawi lawi sy,’ nanai vaineng tauh nai khala,
“Khumi bawibawichi my ‘Amen!’ nanai pathang u sy.Ref 27.18: Lev 19:14
19 “Cheng takhrachi, nurochochi, lumai nuchi i nga ai avo naichi sum hai nai khumi ly Tameuh i amsawi lawi sy,’ nanai vaineng tauh nai khala,
“Khumi bawibawichi my ‘Amen!’ nanai pathang u sy.Ref 27.19: Theu 22:21, 23:9, Lev 19:33-34, Leu 24:17-18
20 “ ‘Ampo i aju leaung leaungrei hawi tamang iy, ampo ai kangji pei nai khumi ly Tameuh i amsawi lawi sy,’ nanai vaineng tauh nai khala,
“Khumi bawibawichi my ‘Amen!’ nanai pathang u sy.Ref 27.20: Lev 18:8; 20:11, Leu 22:30
21 “ ‘Tawnbawi hawi apajang nai khumi ly Tameuh i amsawi lawi sy,’ nanai vaineng tauh nai khala,
“Khumi bawibawichi my ‘Amen!’ nanai pathang u sy.Ref 27.21: Theu 22:19, Lev 18:23, 20:15
22 “ ‘Tuicho ampro py ne sy, amhm vanrei ampo takhra nai tuicho hawi py ne sy, ampo vanrei amhm takhra nai tuicho hawi py ne sy, ta-pui ta-chi apha nai khumi ly Tameuh i amsawi lawi sy,’ nanai vaineng tau nai khala,
“Khumichi bawibawichi my ‘Amen!’ nanai pathang u sy.Ref 27.22: Lev 18:9, 20:17
23 “ ‘Amy i ampi hawi ta-pui ta-chi apha nai khumi ly Tameuh i amsawi lawi sy,’ nanai vaineng tauh nai khala,
“Khumi bawibawichi my ‘Amen!’ nanai pathang u sy.Ref 27.23: Lev 18:17, 20:14
24 “ ‘Khumi leaungrei ai kangviu y padei nai khumi ly Tameuh i amsawi lawi sy,’ nanai vaineng tauh nai khala,
“Khumi bawibawichi my ‘Amen!’ nanai pathang u sy.
25 “ ‘Kamngo by y nai khumi ai padei ai nai un tangka cha nai khumi ly Tameuh i amsawi lawi sy,’ nanai vaineng tauh nai khala,
“Khumi bawibawichi my, ‘Amen!’ nanai pathang u sy.
26 “ ‘Tameuh i reita leu pei naichi hawi amtiu nai leaungsai bawibawichi tangai y nai khumi ly Tameuh i amsawi lawi sy,’ nanai vaineng tauh nai khala,
“Khumi bawibawichi my ‘Amen!’ nanai pathang u sy.Ref 27.26: Kal 3:10