24
Akhai nai hawi yhmtheaung sa bi nai
1 “Neampacho leaungrei ly neampachy leaungrei hawi apom chum nai bo y, huni neampachy i tlang tleaung y khrei y ai naira niu nai deaungkho y akhai ai nai ngai lawh baly, ni ly huni neampachy teng y akhai nai cha pei iy yhm i nai satla hai ai nai tla. Ref 24.1: Mt 5:31; 19:7; Mk 10:4
2 Huni neampachy ly takhra neampacho leaungrei hawi yhmtheaung sa bi iy,
3 pa-nyh juvo my py, huni neampachy ai akhai ai nai ngai nai molam y akhai nai cha pei iy, yhm i nai satla hai nai khala py ne sy, mymy dei nai khala py ne sy,
4 angchei i juvo ly huni neampachy ai pom ali teang moh sy; ati mana nai mo na baly huni neampachy ly chai y leang bo, nanai dawn ai nai tla. Areng ly huna nai yhmtheaung sa bi nai ai paso nai ne. Nangchi i Areng Tameuh my pei nai pri y huna nai amso ngai nai kamngo so u moh.
Reita leu pei nai takhrakhrachi
5 “Aju la ang vawi nai Neampacho ai tavai keung y palau moh, ati mo pri kalopra py so hai moh. Ni ly yhm y aju hawi amo theu parai naimy awm ai nai, huni kalopchi sanengrei so hai moh.
6 “Nang ly khumi leaungrei ai sai sairei alai ai pei nai khala, ni i choh nip nai sum ai ly ka-peaung talam moh. Talam lawh baly kalai keung i hengra ai ka-peaung talam nai hawi atawm.
7 “Israela cheng tengtawi leaungrei ai athorei my patiu iy miseaung y palawn nai, ti y baly miseaung y jo nai khumi ai ly padei vui ai nai tla. Hina nai sa iy nangchi ly hawi y nai amjy ai tama hai pajau ai. Ref 24.7: Theu 21:16
8 “Nangchi theung y ka-jei awm nai nganpeih no man nai khala, Levi theaung pathyp pi nai keungchi teng y kaimy leu pei yb nai kamta sa ai nai dawn patyp ai nai tla. Nichi teng y kaimy leu pei yb nai kamta tangai u. Ref 24.8: Lev 13:1-14:54
9 Achi ly Aikupta pri dengdairei theu u nai thym khala, nangchi i Areng Tameuh ly Miriam ai mana pajeng mo, nanai pany u. Ref 24.9: Kati 12:10
10 “Nangchi ly khumi leaungrei teng y sai sairei alai ai pei nai khala, huni khumi i ka-peaung khai nai baichu ateaung la ai nai, ni i yhm theung y kun ai nai tlo y. Ref 24.10-13: Theu 22:26-27
11 Mymy naimy ang syn nai ka-peaung vawn ai yhm angam mang ajeng iy talam ai nai tla.
12 Ni ly khumi kamawn leaungrei ne lawh baly, huni baichu ai kani dym y naimy pei pi teang ai nai tla.
13 Ni ly huni baichu amchiu iy i nem pajau ai nai dym tleirei pei pi. Naibaly ni ly nang ai ang kawn ai, nangchi i Areng Tameuh my py kawn ai.
14 “Nangchi i mary theung y awm nai khumi kamawn Israela cheng tham nai khumi ai py, cheng takhra tham nai khumi ai py, li-tapawp moh.Ref 24.14-16: Lev 19:13
15 “Kani tleirei kani dym y naimy, ni ai ka-tham vang pei pi ai nai tla; nichi ly kamawn nai deaungkho y ka-tham tangka ngai nai ne. Nang ly vang pei y baly ni my Areng teng y hnei ai i, nang ly kamngo sa nai lawm ai.
16 “Cho chanauchi i kamngo nai molam y, amhm ampochi ai padei moh. Hunai kamta amhm ampochi i kamngo nai molam y, cho chanauchi ai padei moh. Khumi luteng ly amy i kamngo molam y naini padei ai nai tla. Ref 24.16: 2 Areng 14:6, 2 Neng 25:4, Ezek 18:20
17 “Nangchi ly cheng takhra khumichi hawi nurochochi i nga ai avo nai ly pei pi ai nai tla. Naibaly lumai nu i baichu ateaungchi ka-peaung vawn palawn iy talam pi moh.Ref 24.17* 24.17-18: Theu 23:9, Lev 19:33-34, Leu 27:19
18 Nangchi ly Aikupta pri y miseaung achei vai nai ai py, nangchi i Areng Tameuh ly nangchi ai atleu nai ai py pany u; hunai deaungkho y kai ly nangchi teng y hini reita kang pei nai ne.
19 “Nangchi amti amjangchi pakym u nai khala, pakym bawi y nai chohvuichi ai ali teang iy, pakym u moh. Huni chohvuichi ai cheng takhrachi, nurochochi hawi lumai nuchi i vui daw pi ai nai tla. Huna nai kamta sa baly nangchi i Areng Tameuh my nangchi i sa nai ngiereichi ai amtheaung hai ai. Ref 24.19-21: Lev 19:9-10; 23:22
20 Olive athaichi py tlenrei jaw nai bo y, jaw kamthu ly ali teang iy jaw u bi moh; huni awm rai nai athaichi ly cheng takhrachi, nurochochi hawi lumai nuchi i vui pahai pi ai nai tla.
21 Kreip akho theung i kreip athaichi py tlenrei jaw chum nai bo y, jaw kamthun ly ali teang iy jaw bi moh; huni awm rai nai athaichi ly cheng takhrachi, nurochochi hawi lumai nuchi i vui pahai pi ai nai tla.
22 Nangchi ly Aikupta pri y miseaung achei vai nai ai mana khala py tami u moh; hunai deaungkho y kai ly nangchi teng y hini reitachi kang pei nai ne.