12
Chiu ai nai harei khyh nai meingtym
1 “Nangchi i amsi pajochi i Areng Tameuh my pei nai pri y awm nai sala ryrei patawm ai nai reitachi kang thui pi ai; nangchi hunichi tangai u!
2 Nangchi peang nai pri mawi saleung, mawi aheung, ngam heng-yh nai dengkeaungchi anui i, huni pri khumichi my chiu nai meingtym bawibawichi taphra u pawn ai nai tla.
3 Nichi i maichamchi panawi iy, nichi i tameuh leungchengchi py taphra pawn ai nai tla. Nichi i chiu nai tameuh nu Aserah i leungchengchi py mai veang pawn ai nai tla. Nichi i mynchi ai pakhau piupa pawn ai nai tla. Hina nai kamta sa iy huni meingtymchira i, huni tameuhchi ai chiu nai tama ai. Ref 12.3: Leu 7:5
4 Nangchi ly nichi i tameuhchi ai chiu nai leaungsai kamta, nangchi i Areng Tameuh ai chiu u moh.
5 Areng ly nangchi cheng theaung bawibawichi awm nai khu ka-peang dengdairei, mymy i mo y khumichi jeu achu iy mymy ai chiu ai nai meingtym harei vawi pi takhra ai.
6 Nangchi ly huni meingtym y leng patlum nai kapathypra hawi takhra kapathypra tawnbawichi, horei y harei hawi katalamrachi, Areng teng y adeu nai katalamrachi, paleung kangai talam naichi, nangchi i si hawi beram cho chaluchi, hunichi ai Areng teng y talam ai nai tla.
7 Nangchi i Areng Tameuh ly nangchi ai amtheaung hai nai deaungkho y, nangchi kalop sa iy nga nai teicha teineichi ai nangchi hawi vanrei, nangmychi i yhm dengtheungchi ly huni meingtym mymy i mo y amo theu parai naimy cha u ai nai tla.
8 “Nangchi ly adeu nai pri y kun u nai khala, Areng ai chiu naira y, jangni i chiu nai kamta chiu u moh; nangchi i Areng Tameuh my pei nai pri y tlamsa naimy awm ai nai neng tym y rai khala my,
9 nangchi bawibawi ly nangmychi ngai nai kamta, vaini khrairei chiu u nai ne.
10 Nangchi ly Jordan tavo angpeang nai bo y Areng my nangchi ai, huni pri peang iy awm hai ai. Mymy ly nangchi ai paleung ka-e bawibawichi teng i nai ama hai nai deaungkho y, nangchi ly tlamsa naimy awm u ai.
11 Areng ly nangchi i vui mymy ai chiu ai nai meingtym harei ang vawi pi takhra ai. Kaimy leu pei nai kamta nangchi leng patlum nai kapathypra hawi takhra kapathypra bawibawichi, horei y harei hawi katalamrachi, huni meingtym y syn u ai nai tla.
12 Naibaly nangchi i cho chanauchi, nangchi i mary theung y awm nai Levi theaungchi hawi vanrei, mymy i mo y amo theu u. Levi theungchi ly mychi i vui khaileaung by y, nanai pany u.
13 Nangchi ly nangmychi i ngai nai meingtym y apathyp ai nai ngo y;
14 nangchi cheng theaungchi theung i theaung harei i khu ka-peangra y Areng my vawi takhra pi nai meingtym y naini, apathyp u ai nai tla. Huni meingtymra naini leng patlum nai kapathypra talam iy, nangchi teng y kaimy thui pi nai ngierei sa u ai nai tla.
15 “Na i py nangchi awm nai marychira tawnbawichi tleh iy cha pajau. Areng my nangchi ai nang chawn hai nai kamta cha pajau. Nangchi bawibawi ly sisiu chakhi mawichi cha ai nga nai kamta, reita leaungsai y chai nai khumi py ne sy, chai y nai khumi py ne sy, huni amso mawichi cha pajau nai ne.
16 Na i py tawnbawichi i thichi ly cho u moh; tui lai nai kamta khaileaung y lai vui ai nai tla.Ref 12.16: AA 9:4, Lev 7:26-27, 17:10-14, 19:26, Leu 15:23
17 Areng teng y talam nai kapathyprachi ly nangchi awm nai marychira y cho u moh. Chohnei chokram, kreip hang, olive asituichi theung i horei y harei, si hawi beramchira i cho chaluchi, Areng teng y adeu yb nai katalamrachi, amy i paleung kangai katalamchi hawi takhra talam nairachi ly nangchi i marychi theung y cho u moh.
18 Nangchi hawi nangmychi i cho chanauchi, miseaungchi hawi nangchi i mary theung y awm nai Levi theaungchichi ly hini kapathyprachi ai nangchi i Areng Tameuh my vawi takhra pi nai chiu ai nai meingtym hareira y naini, cha nei u ai nai tla. Nangchi ly huni meingtym y nangmychi kalop sa iy nga nai teicha teineichi ai amo theu seu naimy cho u.
19 Nangchi ly huni pri y awm nai sala ryrei ly Levi theaungchi ai tami y ai nai dawn u patyp.
20 “Nangchi i Areng Tameuh ly mymy i adeu nai kamta, nangchi i khu ka-peang kau hai nai khala, nangchi ngai nai neng y mawi cha u pajau.
21 Areng ai chiu nai meingtym harei khyh nai ly nangchi hawi palo ala lawh baly kaimy thui pi nai kamta, nangchi ngai nai khala Areng my pei nai si, ti y baly beram ha harei tleh iy nangmychi i yhm y cha u pajau.
22 Nangchi amimi py sisiu chakhi mawi cha ai nga nai kamta, reita leaungsai y chai nai khumi py ne sy, chai y nai khumi py ne sy, huni amso mawichi cha pajau nai ne.
23 Na i py thi ly hengra ne i, cho ngau y. Hunai deaungkho y thi abawi nai mawi ly cho u moh.
24 Thi ly cho u moh. Tui lai nai kamta khaileaung y lai vui ai nai tla.Ref 12.23-24: Lev 17:10-14
25 Hini reitachi ai tangai iy patawm nai ly Areng my kawn nai ne. Hunai deaungkho y nangchi hini reitachi patawm baly, nangchi hawi nangmychi i kangpreangchi py hawira nga u ai.
26 Nangchi i kapathypra hawi talam ai nai adeu nai langseaungchi ly Areng ai chiu nai meingtym harei khyh naira y syn u ai nai tla.
27 Huni chiu naira meingtym Areng i maicham tleaung y leng patlum nai kapathypra talam ai nai tla. Maicham tleaung y tawnbawi thi lei iy nangchi cha ai nga nai apathyp nai tawnbawi mawichi py, talam u ai nai tla.
28 Nangchi ly kai i leu pei nai ngiereichi tangai u baly, nangchi i Areng Tameuh i mo y kateng lam hawi kawn ai hawi naichi sa nai deaungkho y, nangchi hawi nangmychi i kangpreangchi ly tlamsa naimy awm jojo ai nai nga u ai.
Myn chiu y ai nai pany hai nai
29 Nangchi awm ai nai pri y awm yb nai khumi chengchi ai nangchi i Areng Tameuh my tamyh pi pawn ai nai deaungkho y, nangchi ly huni pri y peang iy awm ai nai nga u ai.
30 Areng my huni chengchi ai tamyh pi pawn nai bo y, nangchi ly nichi i reita tanynchi teaung y ai nai amkyn u. Nichi i reitachi mang y abang lawh baly, nangchi ly dei naira avum u ai.
31 Nichi i tameuhchi ai chiu nai leaungsaichi amtiu u moh. Huni khumichi ly mychi i tameuhchi ai chiu naira y Areng i niu ngai y nai amso ngai naichi sa nai deaungkho y, nangchi i Areng Tameuh ai chiu nai khala nichi i kamta chiu u moh. Huni khumichi ly mymychi i cho chanauchi ai malawn py, maicham tleaung y leng patlum u nai ne.
32 “Nangchi teng y kaimy kang thui pi nai ngiereichi so u; panawi py panawi bi moh, pajaw py pajaw moh. Ref 12:32: Leu 4:2. Amt 22:18-19