10
Mosi ly leu sai horei la bi nai
(Theu 34:1-10)
1 “Naibaly Areng my kai teng y, ‘Angchei i kamta lengseaung phei nyhrei si ly khaira dengkeaung tengta py so. Naibaly kai i awm nai mawi saleung y lyn kalau;
2 nangmy kawi hai vui nai lengseaung phei nyhreira y kai i tajiu nai reitachi, hini lengseaung phei nyhreira y kang tajiu pi teang ai. Naibaly lengseaung phei nyhrei ai tengta theung y khai me ai nai tla,’ napi.
3 “Hunaibaly kai ly Akasia dengkeaung hawi tengta sa iy, angchei i lengseaung phei nyhrei hawi ka-tawm khyp si chum baly, hunichi syn naimy mawi y lyn kalau bo.
4 Naibaly Areng ly mawi kheutang y nangchi akachu u nai kani y my, mai kangveaung theung mang dengdairei nangchi teng y pei nai leu sai horei ai, angchei i tajiu pi nai kamta huni lengseaung phei nyhreira tajiu pi bo. Huni lengseaung phei nyhrei ly Areng my kai teng y ang pei;
5 naibaly kai ly mawi i nai satla kathiu bo. Areng my leu pei nai kamta kai ly huni lengseaung phei nyhrei ai, kaimy sa nai tengta theung y khai me i, vaini khrairei awm jo nai ne.
6 (Israela chengchi ly Jaakan khumichi i tuikan dengdairei theu u iy Moserah tai naira mang y chei u bo. Aron ly huni tai naira y dei i, hu y up nai ne. Ni i chapo Eleaza ly ampo i pathyp pi nai keung kalop amtym bo.Ref 10.6: Kati 20:28, 33:38
7 Nichi ly hu i nai Kudkodah tai nai mang py, huni bo baly tui hawi nai Jobatha meingtym mang y chei u.
8 Mawinote 10:8 mawi; ti y baly huni neng y.salo y Areng ly Levi theaungchi teng y Leu Maikawm Pawm kry ai nai py, pathyp pi nai keung kalop sa ai nai py, mymy i amyn y amtheaung hai nai kalop py au nai ne. Nichi ly vaini khrairei huni kalopchi sa u bo.Ref 10.8: Kati 3:5-8
9 Huna nai y Levi theaungchi ly takhra theaungchi kamta, khu ka-peang ngo takhra y nai ne. Nangchi i Areng Tameuh my adeu nai kamta, nichi ai ly Areng i pathyp pi nai keungchi lawm ai nai khai takhra pi nai ne.)
10 “Kai ly angchei i sa nai kamta mawi salo y kani vui palyhrei, kaawm nai ne. Nangchi ai tamyh y ai nai kaimy takeng pi nai y Areng ly hini tlenrei py tangai pi bo. Ref 10.10: Theu 34:28
11 Naibaly nangchi i amsi pajochi teng y pei ai adeu nai pri nangchi peang u ai nai nangchi ai pahawi ai nai tla,” nanai kai ai ang napi.
Tameuh i kangaichi
12 “Aw Israela chengchi awi, nangchi i Areng Tameuh i kangaichi tangai u: Areng ai chiu u ly mymy i leu pei nai bawibawichi phai tangai u. Areng ai paleung hawi verei tamen iy mymy i kalop so u;
13 mymy i reita leu pei nai bawibawichi tangai u. Nangchi hawira nga ai nai vaini nangchi teng y hini reitachi kang pei nai ne.
14 Areng ly kani khusang salo y malawn py peang; khaileaung pri hawi huni theung y awm nai bawibawichi ai py peang nai ne.
15 Na i py Areng i tamen naira ly nangchi i amsi pajochi tlang tleaung y khri pa-rei len nai deaungkho y, khumi neangneangchi theung i nai nangchi ai vawi takhra nai ne i, nangchi ly vaini khrairei mymy i khumichi ne.
16 Hunai deaungkho y nangchi ly vai i ka-so Areng i leu pei naichi tangai u iy, nangchi i paleung tang naichi ly anawn u jau.
17 Nangchi i Areng Tameuh ly tameuh bawibawichi hawi areng bawibawichi tleaung y py len keh. Areng ly nang parai iy sa thai naira angym nai Tameuh, tahm khai iy jei kaji ai hawi nai Tameuh ne. Mymy ly khumi ai patleh takhra y i, un py cho y nai ne.Ref 10.17: Ataw 10:34, Rom 2:11, Kal 2:6, Ephe 6:9, 1Tim 6:15, Amt 17:14, 19:16
18 Mymy ly nurochochi hawi lumai nuchi ai pajyh patleh y naimy pahen pi. Nangchi hawi vanrei awm nai cheng takhrachi ai py tamen nai deaungkho y, nichi cha nei ateaung ai nai molam ka-vo sa pi.
19 Hunai deaungkho y cheng takhrachi ai tamen u, ati mana nai mo na baly nangchi py, vaichi khala Aikupta pri y cheng takhra kamta awm u vai nai deaungkho y ne.
20 Nangchi i Areng Tameuh ai jei kaji iy, mymy ai naini chiu u ai nai tla. Mymy ai ka-ym awm iy mymy i amyn hawi phai leu adeu u.
21 Mymy ai palo u, mymy ly nangchi i Tameuh ne; mymy ly nangchi i vui rengrang tlai naichi ang sa pi nai ly nangmychi i mei y niu u bo.
22 Nangchi i amsi pajochi ly Aikupta pri y tym nai khala, leaung vui saryhrei awm khyh. Na i py vai ly nangchi i Areng Tameuh my nangchi ai kani mang i ka-sichi tanrei ang peung hai bo.Ref 10.22: AA 15:5, 22:17, 46:27