7
Daniela ly mymy i paleung mei hawi niu nai satang ai pany hai nai
Daniela ly mawi kasi palyhrei ai paleung mei hawi niu nai
1 Babulon samrang Belshazar my peang nai angchei saneng y, kai ly vum y paleung mei y niu nai amang amang bo. Huni amang satang ai hina nai kamta, katajiu typ nai ne.
2 Ali ly khuteng taki palyhrei mang aho nai deaungkho y,
pangli tui saleung y tuisampyh khri pa-rei amsau na.
3 Huna nai khala y mo-cha atawm y nai, mawi kasi palyhreichi ly pangli theung i dengdairei theu bo. Ref 7.3: Amt 13:1, 17:8
4 Angchei i mawi kasi ly khrangsi hawi atawm i, ahm kamta pakhichi awm. Kai ly khen nai thym khala y huni mawi kasi ly pakhichi amui pawn i, khaileaung salo y achaw naimy, khumi kamta angdo bo. Naibaly ni ly khumi paleung nga nai ne.Ref 7.4-6: Amt 13:2
5 Kai ly pa-nyh mawi kasi ai niu. Huni mawi kasi ly nithun mang i kheu nyhrei hawi angdo nai tavym hawi atawm. Ni i labeaung y pana sa reng thomrei kei hau nai ne. Katyn harei my ni teng y, “Nganbawi ai kajeu kawi pa-rei cho!” napi.
6 Kai ly khen patawm nai thym y, takhra mawi kasi harei ai niu. Huni mawi kasi ly takaikheng hawi atawm. Ni i nithun anam y tavo pakhichi hawi atawm nai, pakhi palyhrei awm. Ni ly lu palyhrei awm. Ni ly sa thai naira awm nai atawm.
7 Kai ly khen nai thym khala y, palyh i mawi kasi ai niu. Huni mawi kasi ly atho len iy jei ai nai hawi parai. Ni i ho kalenchi hawi paleung ka-echi ai kei piupa iy kheu hawi chiu piupa bo. Hini mawi kasi ly takhra mawi kasi hawi atawm y. Ni ly taki horei awm.Ref 7.4-6: Amt 13:2
8 Huni takichi ai khen nai thym khala, hunichi sala i taki katheang harei theu nai kaniu. Huni taki katheang my, awm yb nai taki thomrei ai takheaung vui nai ne. Huni taki katheangra y khumi kamta meichi hawi, amlyh reng nai labeaung awm.Ref 7.8: Amt 13:5-6
Deungtasarei heng nai keung leaungrei ai paleung mei hawi niu nai
9 Kai ly khen nai thym y, areng atehrachi awm nai py, atehra harei salo y deungtasarei heng nai keung ateh nai py, kaniu nai ne. Mymy i ateaungchi ly ji kamta kaleung iy, sam py beram mui tatang hawi atawm. Aai nanai amlira kheuchi tai nai, mymy i areng atehra ly mai kangveaung kamta angvang na bo.Ref 7.9: Amt 20:4, 1:14
10 Huni areng atehra mang dengdairei, tavo leaung nai kamta kangvang sangso theu. Huni meingtym y ly mymy i kalop sa nai khumi sang neangneangchi awm. Mymy i mo y angdo naimy kalop sa nai py, meaung neangneangchi awm nai ne. Tara chih nai neng amteaung ai bo i, cha-iuchi kadai u bo. Ref 7.10: Amt 5:11, 20:12
11 Kai ly khen nai thym y taki katheang ly amlyh naimy awm jo rai. Huna nai thym khala y, palyh i nai mawi kasi ai ly padei vui iy, ni i ngan ai ly mai kangveaung theung y aphi vui bo.
12 Takhra mawi kasichi ly mychi i sa thai naira la pi vui nai ne teu i py, neng khai pi nai ka-vo ryrei, heng ai nai nga u bo.
13 Vum y huni paleung mei hawi niu naira y, kai ly khumi leaungrei ka-tawm niu bo. Ni ly khupanym my taki teungtareung iy, kai teng y ang jeu. Hunaibaly deungtasarei heng nai keung teng y tym vui nai deaungkho y, ni ly mymy i mo y kun ai nai nga.Ref 7:13 Mt 24:30, 26:64; Mk 13:26, 14:62; Lk 21:27; Amt 1:7, 13, 14:14
14 Naibaly cheng leu cheaungkhang katheu nai khumi ngiereichi ly ni i kalop sa hai ai nai mymy ly ni teng y, peang ai naira hawi sa thai naira py, samrang i sa thai naira py, pei pi nai ne. Ni i sa thai naira haiho ly deungtasarei khaw jo ai i, ni i pri ly mana khala py phra ai ny y. Ref 7.14: Amt 11:15
Paleung mei y niu naichi ai thui pachai nai
15 Kai i paleung mei y niu naichi molam y kai ly kaso theu i, paleung adi-adiu bo.
16 Huni meingtym y angdo nai khumi leaungrei teng y chei i, hunichi i awm nai sai deng nai khala y, ni my ang thui pi pachai bo.
17 Huni khumi my, “Huni mawi kasi pui palyhrei ly khaileaung pri y ang tym ai nai empara pri palyhreichi ne.
18 Na i py tahm asang parai nai Tameuh i khumichi ly samrang i sa thai naira haiho nga u iy, deungtasarei peang u jojo ai,” napi.Ref 7.18: Amt 22:5
19 Naibaly kai ly takhra mawi kasichi hawi atawm y nai, khri pa-rei takhra iy kheupaja kiu pachynchi hawi tamo hochi hawimy, paleung ka-echi ai chiu piupa reng nai, palyh i mawi kasi satang pany ai nai ngai.
20 Naibaly kai ly ni i lu y awm nai taki horei satang ai py, huni bo y sai nai takhra taki thomrei ai takheaung vui iy, meichi hawi amlyh reng nai labeaung awm naimy, takhra takichi tleaung y jei ai hawi nai taki katheang satang py, pany ai nai ngai.
21 Kai ly khen nai thym y huni taki katheang ly Tameuh i khumichi ai tiu amteaung i, pajau vui bo.Ref 7.21: Amt 13:7
22 Naibaly deungtasarei heng nai keung ly tym i, tahm asang parai nai Tameuh i khumi kachaichi molam y, tara chih pi nai ne. Tameuh i khumichi ly samrang i sa thai naira nga ai nai neng tym bo. Ref 7.22: Amt 20:4
23 Huni khumi my, “Palyh i mawi kasi ly khaileaung pri y ang tym ai nai palyh i empara pri ne iy, takhra prichi hawi atawm y ai. Huni empara ly khaileaung pri verei y pajawn ai i, chiu piupa vui ai.
24 Taki horei, nanai ly huni empara y peang ai nai samrang leaung horeichi ne. Huni bo y takhra samrang leaungrei theu ai. Ni ly angchei i samrangchi hawi takhra ai. Samrang leaung thomreichi ai py tiu iy pala vui ai.Ref 7.24: Amt 17:12
25 Ni ly tahm asang parai nai Tameuh ai ka-awi leu katheu iy, mymy i khumichi ai ana ai. Ni ly Tameuh i khumichi i reita pawichi hawi reita leaungsaichi py, takhra hai vui ai nai atho sa ai. Tameuh i khumichi py, ni i sa thai naira anui y saneng thomrei bo y lo tariurei awm u ai.Ref 7.25: Amt 12:14, 13:5-6
26 Naibaly kani pri mang i tara chih nai keung ly tara chih ai nai ateh iy ni i sa thai naira la pi veng ai i, ni ai tamyh vui ai.
27 Tahm asang parai nai Tameuh i khumichi ly khaileaung pri y awm nai pri bawibawichi i, sa thai naira hawi phum-ang nga u ai. Nichi i sa thai naira ly mana khala py, tama vui ai ny y. Khaileaung pri i samrang bawibawichi py, nichi i miseaung y awm ai i, nichi i leu tangai u ai,” nanai thui pachai pi bo.Ref 7.27: Amt 20.4, 22:5
28 Hini ly tym ai nai leaungsai i tem naira ne. Kai ly khri pa-rei kaso theu nai deaungkho y, meimai takhuisui vui bo. Hini leaungsai bawibawichi ai paleung theung y pateung me jo nai ne.