3
Samrang Nebukhadnezar my muku myn pui y chiu ai nai leu pei nai
1 Samrang Nebukhadnezar ly ka-sang miu vui tariurei, ka kalen miu tariurei awm nai muku myn pui sa hai iy, huni ai ly Babulon theung i Dura adym y khai hai bo.
2 Samrang ly samrang i cho chanauchi, bangtang kalenchi, pa-nyh i bangtang kalenchi, peang nai keung kalenchi, tangka kry keungchi, tara chih nai keungchi, risa luchi napi nai miteaung keh bawibawichi ai, jeu achu ai nai leu pei bo. Nichi ly samrang Nebukhadnezar i sa nai muku myn pui khai takhra nai pawira y tym u achu nai ne.
3 Miteaung keh bawibawichi ly muku myn pui i mo y angdo u nai khala y,
4 satang thai hai nai keung leaungrei my,”Leu cheaungkhang katheu nai khumi bawibawichi hawi pri tleirei i khumi bawibawichi awi!
5 Nangchi ly baw eng nai katyn thai u baly byhlyh, atym, taro katheang kalenchi beu nai katyn hawi takhra katyn kapauchi beu nai katyn py thai u ai. Katyn kapau beu amteaung nai dengdairei, samrang Nebukhadnezar my sa nai muku myn pui ai, nangchi lu meung u.
6 Ami py ne sy, lu meung iy chiu y nai khumi ai ly mai pui kangveaung theung y vaimy aphi ai,” nanai tao pajeng parai naimy aeu nai ne.
7 Hunaibaly leu cheaungkhang katheu nai khumi bawibawichi hawi, pri tleirei i khumichi ly katyn kapau beu nai katyn thai phai thai baly, samrang Nebukhadnezar i sa nai muku myn pui ai lu meung naimy chiu u bo.
Daniela i ahawi leaung thomreichi ai pajeng nai
8 Naibaly Babulon pri i khumi phyreichi ly Juda chengchi ai, thui tamawn ai nai neng ka-vo nga u bo.
9 Samrang Nebukhadnezar teng y, “Samrang awi, nang ly heng sau sy!
10 Katyn kapau beu amteaung nai dengdairei, muku myn pui ai khumi luteng lu meung iy chiu u.
11 Huni myn pui ai lu meung y nai khumi ngierei ai ly mai pui kangveaung theung y aphi vui ai, nanai nang my leu pei yb nai awm bo.
12 Babulon pri khu ka-peang ai peang ai nai, samrang nangmy kalop au nai Sadraka, Meshaka hawi Abedaneko napi nai Juda chengchi ly nang i leu pei nai tangai y nai ne. Nichi ly nang i tameuh ai chiu u y. Nang i sa nai muku myn pui ai py, lu meung u y,” napi u.
13 Naibaly samrang ly khrikhri pa-rei kado theu nai deaungkho y, huni khumi leaung thomreichi ai mymy teng y, jeu hai ai nai leu pei.
14 Samrang my, “Sadraka, Meshaka hawi Abedanekochi awi, nangchi ly kai i tameuh ai chiu y, kai i leng nai muku myn pui ai lu meung u y, nanai ly teng a?
15 Vai nangchi ly bawchi, byhlyhchi, atymchi, taro katheang kalenchi hawi takhra katyn kapauchi beu nai katyn thai phai thai u baly, muku myn pui ai lu meung u. Huna nai kamta so u y lawh baly, nangchi ai mai pui kangveaung theung y vaimy aphi ai. Nangchi ai atleu pajau nai tameuh awm, nanai nangchi athang khai u a?” napi.
16 Sadraka, Mesheka hawi Abedanekochi my, “Samrang awi, kaichi ly kaimychi law tleaung naira nga ai nai, atho kasa u ai ny y.
17 Kaichi i chiu nai Tameuh ly kaichi ai mai pui kangveaung theung i nai py, nang i kiu i nai py, atleu pajau baly atleu ai.note 3:17 Kaichi... atleu ai. ti y baly kaichi ly nang i tameuh ai chiu y nai ne khyp baly, kaichi i chiu nai Tameuh ly mai pui kangveaung theung i nai py, nang i kiu i nai py atleu pajau ai, atleu pi takengkei ai.
18 Atleu y lawh teu i py, kaichi ly nang i tameuh ai chiu y, nang i muku myn pui ai py, lu meung ai ny y, nanai pany ba,” nanai pathang u.
Daniela i ahawi leaung thomreichi ai, mai pui theung y aphi nai
19 Naibaly Nebukhadnezar ly my i paleung apatawn pajau y i, Sadraka, Meshaka hawi Abedanekochi i tlang tleaung y, kado theu nai meimai amangrang na bo. Hunaibaly samrang ly mai pui ai, angchei i tleaung y phy saryhrei bi pa-rei, mai kangveaung pareaung ai nai leu pei.
20 Mymy i tavaimi theung y atho awm keh nai khumichi teng y, huni khumi leaung thomreichi ai, mai pui kangveaung theung y aphi ai nai leu pei bo.
21 Naibaly nichi ly huni khumi leaung thomreichi ai, lupeuchi, baichuchi, baichu kasauchi hawi ateaungchi raurei, kawm cheng iy mai pui kangveaung theung y aphi u bo.
22 Samrang my leu pei kheng nai kamta, mai pui ly khri pa-rei bi ai nai pareaung nai deaungkho y, Sadraka, Meshaka hawi Abedanekochi ai, mai pui kangveaung theung y aphi nai khumichi ly mai kabi my ang nai deaungkho y dei u bo.
23 Naibaly Sadraka, Mesheka hawi Abedanekochi ly kawm cheng naimy, mai pui kangveaung theung y tym u nai ne.
24 Naibaly Nebukhadnezar ly lyh parai naimy, ang thau praw iy mymy ai tau pei nai miteaung kehchi teng y, “Achi ly khumi leaung thomreichi ai kawm cheng iy, mai pui kangveaung theung y aphi u nai ny y a?” nanai deng.
Nichi my, “Ne, samrang awi,” napi u.
25 Samrang my, “Huna baly mai theung y khumi leaung palyhreichi aleaung nai ati mana kaniu lawh mo? Nichi ai kawm cheng nai py by y, nichi ai maimy kang nai py amny y. Huni bo i palyh i nai khumi ly angelnote 3:25 angel; ti y baly tameuhchi i chapo, ti y baly Tameuh i chapo. hawi atawm,” napi.
Huni khumi leaung thomreichi ai patleaung iy kalop kalenra y palyn nai
26 Hunaibaly samrang Nebukhadnezar ly khri pa-rei angveaung nai mai pui kangveaung pa-khora chei iy, “Tahm asang keh nai Tameuh i miseaung Sadraka, Meshaka hawi Abedanekochi awi, mai pui theung i nai theu u,” napi. Naibaly nichi ly vaimy theu u bo.
27 Samrang i cho chanauchi, bangtang kalenchi, pa-nyh bangtang kalenchi hawi samrang ai tau pei nai miteaung keh bawibawichi ly mai my kang y nai khumi leaung thomreichi ai khen u kaleuteu bo. Nichi i sam amairei py kang y, baichu ateaungchi py kang y, nichi tlang i nai maikhyh mui py ngo y.
28 Samrang my, “Sadraka, Meshaka hawi Abedanekochi i chiu nai Tameuh ai palo u! Mymy ly kani pri amtaw thau ai pato iy, mymy ai ym u nai hini khumi leaung thomreichi ai atleu bo. Nichi ly mychi i Tameuh ai ny y baly, tameuh takhra teng y meung iy chiu ai nai tleaung y ly mychi i tlang dei vam nai, kai i leu tangai u y nai ne.
29 Naibaly leu cheaungkhang katheu nai khumi bawibawichi hawi pri tleirei i ami py ne sy, Sadraka, Mesheka hawi Abedanekochi i Tameuh ai tahm khai y nai leu thui lawh baly, huni khumi ai tawp piupa iy ni i yhm py, maidym satlawi lawm hai sy, nanai vai, kaimy leu pei. Nichi leaung thomreichi i Tameuh kamta, mani tameuh py atleu pajau y leang,” napi.
30 Naibaly samrang ly Sadraka, Mesheka hawi Abedanekochi ai Babulon pri ka-peang theung y, len keh nai kalopchira y tahm pasang nai ne.