12
Deung tlum nai neng
1 Ateaung kanem amthyp nai kani pri amtaw thau naimy, “Huni neng khala y tahm asang parai nai kani pri amtaw thau nai Mikhaela ly amteng ai. Ni ly nang i chengchi ai kry nai keung ne. Naibaly khumi neangneangchi awm angchei khala i dengdairei, mana khala py avum vai y nai ngari kamtang avum nai neng tym ai. Huni neng tym nai khala y Tameuh i cha-iu theung y amyn abawi yb nai khumi, nang i cheng bawibawichi ly law tleaung naira nga u ai. Ref 12.1: Mt 24:21; Mk 13:19; Amt 7:14, 12:7
2 Dei chum nai khumi neangneangchi ly heng u ali teang ai. Nichi theung i phyrei khumichi ly deungtasarei hengra nga u ai. Phyreichi ly deungtasarei tahm anem naira avum u ai. Ref 12.2: Is 26.19; Mt 25.46; Jh 5.29
3 Lu sa nai khumi kachengchi ly kani mang i kangvang kamta, angvang phang na ai. Khumi neangneangchi ai teng nai kalopchi sa ai nai, thui parip pi nai khumichi py, ka-si taukichi kamta deungtasarei angvang ai,” napi.
4 Ni my kai teng y, “Aw Daniela awi, nang ly huni cha-iu pakhym vui ly khaileaung pri tem nai neng ryrei, huni salo y pajawp typ nai ka-ma-ra nip typ ba. Hina nai thym khala y khumi neangneangchi malawn py, huni leaungsaichi tym nai pany thai ai nai, atho sa u atyhtyh ai,” napi. Ref 12.4: Amt 22:10
5 Naibaly kai, Daniela ly tavo vai adengdang nai mang y, khumi leaung leaungrei angdo nai kaniu bo.
6 Leaungrei my tavo syh mang angdo nai kani pri amtaw thau teng y, “Hini lyh ai hawi parai nai leaungsaichi ly ati mana khala tem ai mo?,” nanai deng.
7 Huni kani pri amtaw thau nai ly kiu nyhrei kani mang y pheu iy, deungtasarei heng nai Tameuh i amyn y vaineng abeu nai ly “Huni ly saneng thomrei bo y lo tariurei ateng ai. Tameuh i khumichi avum nai, ana nai leaungsaichi tem nai neng khala y, hini leaungsai bawibawichi py tem ai,” nanai thui nai kathai bo.Ref 12.7: Amt 10:5, 12:14
8 Ni i thui pi nai leu thai teu i py, kai ly pany thai y nai deaungkho y kai ly “Na i py areng awi, huni leaungsaichi ly mana khala tem ai mo?,” nanai deng.
9 Ni my pathang nai ly “Daniela awi, khaileaung pri tem khala khrairei, hini leuchi ai tamym me nai deaungkho y vai, nang ly chei ai nai tla ai.
10 Khumi neangneangchi ly paleung chai u ai. Khumi hawi y naichi ly pany thai naira by y i, hawi y naira sa u veangveang ai. Khumi kacheng naini, pany thai naira nga ai.Ref 12.10: Amt 22:11
11 “Kani tleirei kapathyprachi anawn hai nai neng, ka-jei hawi parai nai amso ngai naira tym nai neng dengdairei, kani 1,290 rei dym vui ai. Ref 12.11: Dan 9:27, 11:31; Mt 24:15; Mk 13:14
12 Kani 1,335 rei dym nai neng tym pa-rei, ka-ym awm nai khumi ly taham hawi nai ne.
13 “Aw Daniela awi, nang py tem khala khrairei ka-ym awm ba. Hunaibaly nang ly dei ai. Na i py nang ly kani kangkhym i neng tem nai khala ly kawn vang nga ai nai ang thau ali teang ai,” napi.